EZRAH 6 - BUKUIT NE TILIIL Sireet ne Dutero Kanon

Kochamdoi Laitoryat Darius kigees teekseet

¹ Ki ng'at anyun Laitoryat Darius ak ki kicheeng' koot ne po bukuisyek ole ki kigonoree tuguuk eng' Babilon.

² Ak ki kinyoorchi kitabuut Ekbatana eng' kootap laitoryat ne mi emetap Media, ne ki kisir ko uu ni koek kabwaatet:

³ Eng' kenyiit ne po tai ne po Laitoryat Cyrus, koyai Cyrus ng'atuutyet agobo kootap Kamuktaindet eng' Jerusalem kole ngeteech koot, ole kigoitoe tiseiywek, ak kelumda lumeiywekyik kouegitu; ingoek kooindap tononennyi mitainik tamanwogik lo che po euut ak tebeesindanyi mitainik tamanwogik lo che po euut,

⁴ kobooto ortinwek somok che po koik che eecheen, ak ooreet agenge ne po pagoinik che leelach. Ingobun kootap laitoryat tuguuk che keyaaktoe tuguuchooto.

⁵ Kora ko ingeweekta kogeny tereenik che po thahabu ak che po fedha che po kootap Kamuktaindet, che kiga ip Nebukadnezar eng' Hekaluut ne ki mi Jerusalem kobwa Babilon. Ingeip kogeny koba Hekaluut ne mi Jerusalem ak inde kiit age tugul komostanyi ak inde kotebee kootap Kamuktaindet.

⁶ Ki ng'at Laitoryat kole; “Ara oistegei anyun inyee Tatenai pounindetap aineet pitoniin, Setar-bosenai ak choronoguk Aparsakitik che mi aineet pitoniin.

⁷ Oistoegei poisyetap kootap Kamuktaindet, ingoteech pounindetap Yahudik kobooto poisyegap Yahudik koyooto po Kamuktaindet eng' ole ki mi ye kinye.”

⁸ Kang'at kogeny agobo kiit ne oyachini poisyechooto po Yahudik agobo teekseetap koiito po Kamuktaindet. Kigoochin pichooto eng' kagiiletapkei tuguuk che kiyaaktoi che po laitoryat che tuguugap aisuruut eng' aineet pitoniin, si ma ki kirinda icheek.

⁹ Tuguuk che makyingei ko uu kiruugik che mengeechen, mengichik, aaregap keechiir, koek kagoochinoik che kibeeljin Kamuktaindetap kipsengwet ak nganuuk, muunyuk, divaik, ak mwanik, ko uu eng' ng'olyootap tisiik che mi Jerusalem; ingigoochi icheek peetuut age tugul amat keele ma mi,

¹⁰ si kobiit kogoochi Kamuktaindetap kipsengwet korosegap nyamdutik che anyiny ak kosa agobo saboondap laitoryat ak weeriikyik.

¹¹ Kang'at kogeny ale, chii age tugul ne walei ng'olyoondoniito ko ingeng'us pambaniat eng' koonnyi ak keganapchi ineendet ak keratyi keetoto ak keyai koonnyi koek kapng'atat agobo niito.

¹² Ngo par Kamuktaindet ne ki inde kainennyi komeny olooto, laitorinik tugul ak piik tugul che iitoi eunekwak kole kowal ng'olyoondonooto ak kong'em kootap Kamuktaindet ne miitei Jerusalem. Kaang'at anee Darius. Ara ingoyaak ng'atuutyoniito eng' kagiiletapkei tugul.

Kitabaani Hekaluut

¹³ Ki yai anyun ko uu nooto kochokyi Tatenai pounindetap aineet pitoniin kobooto Setar-bosenai ak choronokwak, amu kiga koyookto piik Laitoryat Darius.

¹⁴ Kiteekso anyun poisyegap Yahudik ak koboor eng' maonateetap maotyot Haggai ak Zekariah weeriitap Ido. Kiteekso ak ki iges ko uu ng'atuutyetap Kiptaiyat Kamuktaindetap Israel ak ko uu ng'atuutyetap Cyrus, Darius ak Artaserses laitoryatap Persia.

¹⁵ Ki kigees anyun koyooto eng' peetuut ne po somok eng' arawetap Adar ne ki po kenyiit ne po lo eng' laitornatetap Laitoryat Darius.

¹⁶ Ki itabaan koyooto po Kamuktaindet eng' poiboiyet piigap Israel, tisiik kobooto Lawiik ak piik tugul che ki luulenik che ki weeksei.

¹⁷ Ki igoito kiruugik pogol agenge, mengichik pogol aeng', aaregap keechiir pogol ang'wan eng' peetuutap katabaanetap koyooto po Kamuktaindet. Ak ki igoito kwesik taman ak aeng' koek kagoochinetap tengekto agobo Israel tugul kobee koitetap ortinwegap Israel.

¹⁸ Ki inde `icheek tisiik ko uu pcheutikwak ak Lawiik ko uu riipsosyekwak agobo otisyetap Kamuktaindet ne mi Jerusalem, ko uu ye siraat eng' bukuitap Musa.

¹⁹ Ki riip anyun paska `lagogap luulenik eng' peetuutap taman ak ang'wan ne po arawet ne po tai.

²⁰ Amu kiga koanyinygei Tisiik ak Lawiik, kitiliileen tugul. Ki eeny aarwetap paska agobo lagok tugul che po luulenik ak agobo tupchosyekwak tisiik, ak agobo icheeget.

²¹ Ki am paska piigap Israel che ki weeksei kobunu ole kiga kiluulji ak tugul che kiga istoegei simdap pororyosyegap emonooto, kocheeng' Kamuktaindet ne Toroor, Kamuktaindetap Israel.

²² Kiboiboitu eng' poiboiyet ne oo, koboiboenji igoorto ne po magatiinik che ma kinde mermereek peetuusyek tisap, amu ki igoochi `Kamuktaindet ne Toroor icheek koboiboitu ak ki wal muguleldap laitoryatap Assyria kotokyigei icheek si kogimit icheek eng' poisyetap kootap Kamuktaindet, Kamuktaindetap Israel.