EZRAH 5 - BUKUIT NE TILIIL Sireet ne Dutero Kanon

¹ Kingo maoten maotichu; maotyot Haggai ak Zekariah weeriitap Ido, komaotenji Yahudik che ki mi Judah ak Jerusalem eng' kainetap Kiptaiyat Kamuktaindetap Israel,

² kong'eet anyun Zerubabel weeriitap Shealtiel ak Jeshua weeriitap Josadak ak kotoi koteech kootap Kamuktaindet ne mi Jerusalem. Ki mi kobooto icheek maotigap Kamuktaindet kotoreti.

³ Ki pwanji icheek eng' peetuusyechooto Tatenai ne ki pounindet eng' aineet pitoniin, Setar-bosenai ak choronokwak ak koteebe icheek koleenji, “King'ataak ng'oo ogetyigei teekseetap kooi ak ogesu inatuni?”

⁴ Kotep kogeny kole, “Ng'oo kainaigap piik che teechei kooi?”

⁵ Ago ki riip konyegap Kamuktaindennywa poisyegap Yahudik ak ma mwachi icheek kobagaach poisyonooto. Ki riip kot koit ng'olyoot kap Darius ak keeweech waluunet eng' parweet agobo ng'olyoondoniito.

⁶ Chu ng'aleegap parweet ne ki iyookto Tatenai pounindet ne po aineet pitoniin, Setar-bosenai ak choronokyik Aparsakitik, che ki mi aineet pitoniin, koyookyi Laitoryat Darius.

⁷ Ki iyookyi ineendet parweet, ne ki kisir ko uu ni: Kisirchini Laitoryat Darius, taach chametapkei.

⁸ Myee konaak eng' laitoryat kole ki kibe emetap Judah agoi kootap Kamuktaindet ne oo, ne kiteechee koik che eecheen ak kindoi pagoinik inatusyek; wendi tai poisyoni eng' kagiiletapkei ak koberuurot eng' eunekwak.

⁹ Ki kiteebe anyun poisyechooto, keleenji, “King'ataak ng'oo ogetyigei teekseetap kooi ak ogesu inatuni?”

¹⁰ Ki kiteebe kainaikwak kogeny si kobiit kiboorun, si kimuuch kesir kainaigap piik che ki indochin icheek.

¹¹ Ak kiwolwech anyun, kole, “Ki otwogigap Kamuktaindetap kipsengwet ak ng'wony, ak kiteeche kogeny koot ne kiga keteech eng' kenyisyechu chaang' ki kosiirto ne kiteechei laitoryat ne oo ne po Israel ak kogees.

¹² Ago kingo kagotach `kwanisyekyok Kamuktaindetap kipsengwet kot konereech, konde icheek eutap Nebukadnezar laitoryatap Babilon, Kaldeindet ne king'em kooi ak komut piik koba Babilon.

¹³ Ago eng' kenyiit ne po tai ne po Cyrus laitoryatap Babilon, kong'at Laitoryat Cyrus keteech kooi po Kamuktaindet.

¹⁴ Ki inem Laitoryat Cyrus eng' hekaluutap Babilon, tereenigap thahabu ak che po fedha ak icheek che po kootap Kamuktaindet, che kiga ip Nebukadnezar eng' Hekaluut ne ki mi Jerusalem kobwa hekaluutap Babilon ak ki kigoochi chiito age ne kiguure Sesbasar ne kiga koeet ineendet koek pounindet,

¹⁵ ak ki leenji ineendet, ‘Ip tereenichu ak iwe Hekaluut ne mi Jerusalem ak ingeteech kootap Kamuktaindet eng' ole kimi yeginye.’

¹⁶ Ki nyo anyun Sesbasar niito ak kolum lumeiywegap kootap Kamuktaindet ne miitei Jerusalem. Kobooch peetuusyechooto agoi ra, keteechei kora, ago tomo kogeskei.

¹⁷ Ara anyun, ngot kogeer laitoryat kole myee, kecheeng' eng' koot ne kigonoree tuguugap laitoryat, ne mi olooto po Babilon, si kegeer ngo uu nooto, ngo ki ng'at Laitoryat Cyrus keteech koiito po Kamuktaindet eng' Jerusalem. Ingoyokwech laitoryat ng'olyoot komwaiwech kiit ne chamei eng' ng'olyoondoniito.”