EZRAH 4 - BUKUIT NE TILIIL Sireet ne Dutero Kanon

Kiring'daetap teekseetap Hekaluut

¹ Kingo kas anyun puunigap Judah ak Benjamin kole kateekyi Kamuktaindet ne Toroor, Kamuktaindetap Israel Hekaluut, luulenik,

² koriikta anyun ole mi Zerubabel ak kandoigap kooriigap kwanisyek, ak koleenji icheek, “Ongeteech tugul, amu kicheeng'e Kamuktaindeng'wong' ko uu okweek, ak keeng'jini ineendet tiseiywek kobooch peetuusyegap Esarhaddon laitoryatap Assyria ne ki imutwech kebwa olito.”

³ Ago ki leenji icheek `Zerubabel kobooto Jeshua ak kandoik tugul che po kooriigap kwanisyek che po Israel, “Ma kiting'egei yamdao ak okweek keteech tugul kootap Kamuktaindennyo. Ago kiteekyini acheegei `koot Kamuktaindet ne Toroor, Kamuktaindetap Israel, ko uu ye king'atech laitoryat Cyrus laitoryatap Persia.”

⁴ Ki yai anyun `piigap emonooto piigap Judah komeiyo mugulelwogik ak koim icheek eng' teekseet.

⁵ Ki igoochi `asoya kandoik che pcheu melekto, si kogirinda icheek kowal magennywa koek puch eng' peetuusyek tugul che po Cyrus laitoryatap Persia, agoi koit laitornatetap Darius laitoryatap Persia.

⁶ Eng' taunetap laitornatetap Aasuerus, kosiir pichooto kataamset agobo piik che ki menyei Judah ak Jerusalem.

⁷ Ak eng' peetuusyegap Artaserses kosirchi parweet Bislam, Mitredat Tabeel, kobooto choronokwak tugul, kosirchi Artaserses laitoryandanooto po Persia. Ki kisire parwaanooto siruutigap Syria ak kemwae kutitap Syria.

⁸ Ki sir anyun parweet Reum pounindetap kirwooget ak Simsai siriindet, kosirchi Laitoryat Artaserses, kotaam Jerusalem ko uu ni:

⁹ Ki sir anyun Reum pounindetap kirwooget ak Simsai siriindet, kobooto choronokwak tugul, Dinaik, Aparsakitik, Tarpelik, Aparsik, Arkebik, Babilonik, Susankik, Deaik ak Elamik,

¹⁰ ak pororyosyek alak che ki imutu Osnaper ne oo ak ko tagunoot, kolong' kobwa nganaseetap Samaria ak emet ne mi aineet pitoniin.

¹¹ Chu anyun ng'aleek che po parwaanooto ki kiyooktochin Laitoryat Artaserses: “Kigotiin acheek otwogiguk che kemi pitoni.

¹² Ingonaak eng' laitoryat kole Yahudik chooto kobunu oldang'ung' ko kogoitwech ak kogoit Jerusalem ak koteechei kogeny nganasanooto ya ago ngelelyo. Teechei kogeny irimoik ak lumeiywot ne kiga kobutok.

¹³ Ingonaak nguno eng' laitoryat kole ngot koteech nganasani ak kogees irimoikyik, koma kogoitoi konunoik, kodi, anan aisuruutap tuguuk alak tugul ak eng' let, kong'em mogornateetap pounatet.

¹⁴ Ara anyun, amu ki ame munyugap kootap laitoryat, koma nyoljinech kegeer keng'emjin laitoryat teegisto. Ara kagiyogu parwaani anyun amu nooto kiboorchi laitoryat,

¹⁵ si kobiit kecheeng' eng' bukuit ne po ng'aleegap peetuusyegap kwanisyeguk. Inyooru eng' bukuinooto po ng'aleegap peetuusyek ak inai ile ngelelyo nganasani ak koiimi laitorinik ak emotinwek, ak kigong'eet chaamset kobooch keny. Nooto anyun amu ne si keng'em nganasaniito.

¹⁶ Kiboorchini anyun laitoryat keleenjini, ngot keteech nganasani ak kigees irimoik, kobooru nooto kole, ma itinye kebeberta eng' aineet pitoni.”

¹⁷ Ki iyookyi anyun laitoryat waluunet Reum pounindetap kirwooget ak Simsai siriindet ak choronokwak tugul che ki menyei Samaria, ak emet tugul ne mi aineet pitoniin kole ingotep kaalyeet ko uu nooto.

¹⁸ Parweet ne ki kooyokwech ko kagesomannywa komyee eng' tainnyu.

¹⁹ Koang'at ak kogecheeng', ak koginyoor keele kobooch keny ko ki kongelelji `nganasaniito laitorinik ak ki kobiitune ngelelnateet ak chaamset.

²⁰ Ki miitei kogeny laitorinik che ki kiimeen che ki pou Jerusalem che ki pou emet tugul ne mi aineet pitoniin ak ki kigoochin konunoik, kodi, ak aisuruutap tuguuk.

²¹ Ong'at anyun kiit ne igoochin pichooto kosiisyo, si mata koteech nganasani agoi tuun ang'at.

²² Oriipkei anyun si mogaegei ng'olyoondonooto. Amu nee si kotesak ng'emisyet ne inyalili laitorinik?

²³ Kingo kagesoman ng'aleegap parweetap Laitoryat Artaserses eng' taitap Reum ak Simsai siriindet ak choronokwak, kochaakta Jerusalem ole mi Yahudik, kwo kong'at icheek eng' koroomnateet ak kimnateet kobagaakta poisyet.

²⁴ Ki tonon anyun poisyetap kootap Kamuktaindet ne mi Jerusalem agoi kenyiit ne po aeng' ne po laitornatetap Darius laitoryatap Persia.