EZEKIEL 9 - BUKUIT NE TILIIL Sireet ne Dutero Kanon

Kebarei che saae kanamonik

¹ Yeityo komwaiwo eng' kutit ne oo, agase, koleenjo, Mwachji icheeget che riibei nganaseet koriik, kotinyei chii age tugul karnennyi ne parisye eng' eunnyi.

² Ak ogeero, ki pwa piik lo kobunu ooreetap ormariichet ne po meto, ne tokyingei murot kaataam, kotinyei chii age tugul karnennyi ne parisye; ak ki ilaachi chiito agenge eng' icheek ngoryeetap katanit, kotinyei age tugul laletap wino eng' suennyi. Ak ki pa oriit, ak kotononie ole neegitee kaptisisyetap sugunwet.

³ Ak kitogosta liilindap Kiptaiyat Kamuktaindetap Israel eng' ole mi kerubindet, ole kitebee, kwo ole po tugatugigap koot: ak kitwekyi chiito ne ki ilaachi ngoryeetap katanit, ne ki tinyei laletap wino eng' suennyi.

⁴ Ak ki leenji `Kamuktaindet ne Toroor ineendet, Ui pun kwenutap nganaseet, kwenutap Jerusalem, ak ing'ooch turyosyegap togoochigap piik che tigendos ak koriirtos agobo tuguuk tugul che kiwechei che ki yai eng' kwenunnyi.

⁵ Ak ki mwachi alak agase, koleenji, oba obun nganaseet, osup ineendet, ak obarisyote amat koriiree konyekwok, anan koriiraak moo:

⁶ obar ogesu poiyo, muren, chepto, ak lagok che mengeechen, ak kwonyiik: ago amat ooriikyi chii age tugul ne ki king'ooch; ak otaune oldanyu ne tiliil. Kitaune anyun poisyek che ki mi taitap koot.

⁷ Ak ki leenji icheek, Ong'wanit koot, ak onyiit seremusyek piik che kagebar: oba anyun. Ki pa anyun ak ki paris eng' nganaseet.

⁸ Ak ye kita kobarisyoti, ak kigang'etu eng' yooto, abut kot kotiiny togeennyu ng'wony, ak ariir, ak amwa ale, ee, Kiptaiyat Kamuktaindet ne Toroor! Tos ibare piik tugul che ki ng'et che po Israel eng' nereegeguk che ng'woneen che roong'jingei Jerusalem?

⁹ Koleenjo anyun, Oo kot tengektap kootap Israel ak ne po Judah, kanyi emoni korotiik, ak kanyi nganasani kamaaset ne po kirwoogutik: amu mwaei kole ki kometo Kamuktaindet ne Toroor emoni, ama keerei Kamuktaindet ne Toroor.

¹⁰ Ago ne uu anee, ko marire kondanyu, ama riira moo, ago aipchini ooreenywa metowekwak.

¹¹ Ak ogeero, kimwaita ng'olyoondonooto chiichooto ki ilaachi ngoryeetap katanit, ne ki tinyei laletap wino eng' suennyi, kole, kaayai ko uu ye kageng'ata.