EZEKIEL 8 - BUKUIT NE TILIIL Sireet ne Dutero Kanon

Tuguuk che wechotin eng' hekaluut

¹ Ki nyoonjo eutap Kiptaiyat Kamuktaindet ne Toroor eng' kenyiit ne po lo, eng' arawetap lo, eng' peetuut ne po muut ne po arawanooto, ye ki atebye eng' koonnyu, ak kotebyei poisyegap Judah eng' tainnyu.

² Ageer anyun, ogeero, kergeindo ne uu itoondap maat; kong'etee itoondap suennyi ak kwo ng'wony, ko ki uu maat, ak kong'etee suennyi ak kwo parak, ko uu itoondap kakweng'et, ko uu itoondap taet.

³ Ak ki iyogoi kiit ne uu euut, konam suumeekyuk ak kiganaba Kabuuset ne Tiliil eng' kwenutap ng'wony ak kipsengwet, ak komutwaa eng' ng'ang'utigap Kamuktaindet anyo Jerusalem, agoi kurgeetap ormariichet ne po seremut ne po oriit ne tokyingei murot kaataam; ole ki mi ng'echereetap kanamwetap ng'etkonda, ne tagisyei kogoonu ng'etkonda.

⁴ Ak ogeero, kimi olooto liilindap Kiptaiyat Kamuktaindetap Israel, ko uu itoondo ne ki ageer ami warenget.

⁵ Ki leenjo anyun ineendet, Ee weeriitap chii, tooben anyun komostap murot kaataam. Atoben anyun komostap murot kaataam, ak ogeero, kimi kanamwonooto po ng'etkonda komostap murot kaataam ne po ormariichetap kaptisisyet eng' ole kimandoe.

⁶ Ak ki leenjo ineendet, Ee weeriitap chii, igeere kiit ne yaei icheek? Chooto ko tuguuk che eecheen che kiwechei che yaei kootap Israel eng' yu, si awo alooit eng' oldanyu ne tiliil? Ago ta igeere kogeny tuguuk alak che eecheen che kiwechei.

⁷ Ak ki imutwaa anyo kurgeetap seremut; ak kinga keer, ogeero, kimi konda tooteet.

⁸ Yeityo koleenjo, Weeriitap chii, undur tooteet: ak kinga undur tootoonooto, ogeero, kimi kurgeet.

⁹ Ak ki leenjo, Ui oriit, si igeer tuguuk che yaach che kiwechei che yaei icheek eng' olito.

¹⁰ Ki awe anyun oriit, ak ageer, ak ogeero, kimi itoondap age tugul ne po tyong'ik che ichuutegei, ak tyong'ik che kiwechei, ak kanamonik tugul che po kootap Israel, che ki kisirchi itoonwekwak tooteet komoswekwak tugul.

¹¹ Ak kitononie taitap kanamonichooto piik tamanwogik tisap che po poisyegap Israel, ak kitonone kwenunnywa Jaasania weeriitap Sapan, kotinyei chii age tugul tereennyi eng' eunnyi, ne kibeelse; ak kitogosta iyeto ne po ng'uunetap nyamdutik.

¹² Ki leenjo anyun ineendet, Ee weeriitap chii, tos kaigeer kiit ne yaei poisyegap kootap Israel, eng' ole imen, komi chii age tugul kooriikyik che po oriit che po kanamonik? Amu leen icheek, Mageerech Kamuktaindet ne Toroor; ki kometo Kamuktaindet ne Toroor emoni.

¹³ Ki leenjo kogeny, Ta igeere kogeny tuguuk alak che eecheen che kiwechei che yaei icheek.

¹⁴ Yeityo komutwaa anyo kurgeetap ormariichet ne po kootap Kamuktaindet ne Toroor ne kitokyigei murot kaataam; ak ogeero, kimi kwonyiik eng' olooto che kitebyei koriirchin Tamus.

¹⁵ Yeityo koleenjo, Kaigeer niito o, weeriitap chii? Ta igeere tuguuk alak che eecheen che kiwechei kosiir chuuto.

¹⁶ Ak ki imutwaa seremut ne po oriit ne po kootap Kamuktaindet ne Toroor, ak ogeero, kimi piik che neegit tiptem ak muut eng' kurgeetap Hekaluutap Kamuktaindet ne Toroor, eng' kwenutap keterut ak kaptisisyet, che kaituktoochi patai Hekaluutap Kamuktaindet ne Toroor, ak kotokyigei kong'asiis; ak ki sa asiista kotokyingei kong'asiis.

¹⁷ Yeityo koleenjo, Kaigeer niito o, weeriitap chii? Tos kiy ne ming'in eng' kootap Judah ngo yai icheek eng' olito tuguuk che kiwechei? Amu kigonyiit emet koroomnateet, ak ki kowelelgei kogeny kotacha: ak keero, indoi temetap keetit seruunekwak.

¹⁸ Ayae anyun agane eng' nereegek che ng'woneen: ma rireenen kondanyu, ama riira moo: agot nganda riircho eng' waagaat ne oo, koma kasyini.