EZEKIEL 6 - BUKUIT NE TILIIL Sireet ne Dutero Kanon

Kirwooget ne ityin Israel

¹ Ak ki nyoonjo ng'olyootap Kamuktaindet ne Toroor koleenjo,

² Ee weeriitap chii, tokyi togeng'ung' tuloonoogap Israel, ak imaotenji,

³ ileenji, ogas okweek tuloonoogap Israel, ng'olyootap Kiptaiyat Kamuktaindet ne Toroor: mwachin Kiptaiyat Kamuktaindet ne Toroor tuloonook che eecheen ak che mengeechen, kereruusyek ak atebwosyek: Ogeero, aibwok agane rotwetap chok, ak ang'em komoswekwok che torooreen.

⁴ Ak koek karatwek kapkorosusyekwok, ak ketui kanamonikwok che po asiista: ak awirte piikwok che kigebar, eng' taitap kanamonikwok.

⁵ Ak ande muuswegap piigap Israel taitap kanamonikwak; ak aseerchi kawekwok komoswek tugul che po kapkorosusyekwok.

⁶ King'emei nganasook eng' meng'otosyekwok tugul, ak koek karatwek komoswek che torooreen; si kobiit keng'em kapkorosusyekwok ak keyai koek karatwek, ak ketui kanamonikwok kobetyo, ak keep kanamonikwok che po asiista, ak kigees poisyonikwok.

⁷ Ak kobutyo eng' kwenung'wong' che tuun ki parei, si onai ole aa Kamuktaindet ne Toroor.

⁸ Ago atuuchi che ng'etu, si kobiit onyooru che chilildos eng' rotwetap chok eng' pororyosyek, ye kiseerak obe emotinwek.

⁹ Ak kobwaata icheek che chilildos eng' okweek eng' pororyosyek ole tuun kimutyin koek luulenik, ko uu ye ki komea mugulel agobo kugoinatetap mugulelwekwak, che ki koistoenagei, ak agobo konyekwak, che ibotegei ak kanamonikwak: ak wechegei icheegei agobo yaitwogik che ki koyai eng' tuguukwak tugul che kiwechei.

¹⁰ Ak konai kole aa Kamuktaindet ne Toroor: ma amwa puch ale ayachini icheek yaityoni.

¹¹ Mwaei Kiptaiyat Kamuktaindet ne Toroor kole: “Irabaach eng' eung'ung' ak ityech eng' keeldong'ung',” ak ile, pwo amu tuguuk tugul che kiwechei che po kootap Israel: amu parei icheek rotwetap chok, ak rubeet, ak koroito.

¹² Parei koroito ineendet ne mi ole loo; ak parei rotwetap chok ineendet ne neegit; ak parei rubeet ineendet ne ng'etu ne ki kigerchi nganaseet: ayae nereegekyuk che ng'woneen kosulda ko uu nooto eng' icheek.

¹³ Ak onai ole aa Kamuktaindet ne Toroor, ye tuun mi piikwak che kigebar, kobooto kanamonikwak, che mi kapkorosusyekwak komoswekwak tugul eng' tulweet age tugul ne ming'in ne toroor, eng' walisyek tugul che po tuloonook, ak eng' kelutap keetit age tugul ne tuon, ak eng' kelutap keetit age tugul ne nyigiis, ole kibeeljine kanamonikwak tugul nyamdutik.

¹⁴ Ak achuulji icheek eunnyu, ak ayai emet koguber ak koek karaatya, kobooch surkwen kotokyigei Dibla, eng' meng'otosyekwak tugul: si konai icheek kole aa Kamuktaindet ne Toroor.