EZEKIEL 5 - BUKUIT NE TILIIL Sireet ne Dutero Kanon

Rotwetap chok agobo Jerusalem

¹ Ee inyee, weeriitap chii, cheeng'jingei rotwetap chok ne ng'atip, ak iboisyee ko uu rotwetap chiito ne inemu metit, si icherunee meting'ung' ak tamneng'ung': yeityo inam kiit ne kirogendoisye, ak igere, si ipchee sumeechooto.

² Ak ibeel kebeberta agenge eng' somok eng' kwenutap nganaseet, ye kagosulda peetuusyegap yiemet; ak iip kebeberta age eng' somok ak irarate iep kotuiyo eng' rotwonooto po chok; ak iseerte kebeberta agenge eng' somok koip usoonet, ak ang'usu rotwetap chok asube icheek.

³ Ak inam suumeek che ng'ering', ak iratyi ngoryeeng'ung'.

⁴ Ak inemu alak eng' chuuto kogeny, ak iwiirchi ma, ak ibeel eng' ma; si komang'une maat sumeechooto ak kobeel koot tugul ne po Israel.

⁵ Mwaei Kiptaiyat Kamuktaindet ne Toroor kole niito ko Jerusalem: ki ande kwenutap pororyosyek, ak mi emotinwek komoswekyik.

⁶ Ak ki kongelelji kirwoogutikyuk amu ki yai sogornateet kosiir pororyosyek alak, ak kongelelji ng'atuutikyuk kosiir emotinwek che mi komoswekyik tugul: amu ki koeesyo kirwoogutikyuk, ama pendate icheek ng'atuutikyuk.

⁷ Mwaei anyun Kiptaiyat Kamuktaindet ne Toroor kole: Amu oo piik che wasegei kosiir pororyosyek che mi komoswekwok, ama obendate ng'atuutikyuk, ama oriip kirwoogutikyuk, ama osup ng'atuutigap pororyosyek che mi komoswekwok;

⁸ mwaei anyun Kiptaiyat Kamuktaindet ne Toroor kole ogeero, aboryenen agane; ak ayai kirwoogutik eng' kwenung'ung' eng' taitap pororyosyek.

⁹ Ak ayai eng' inyee kiit ne tomo ayae, ak kiit ne ma tuun ayae ne uu nooto kogeny, amu tuguuguk tugul che kiwechei.

¹⁰ Amei anyun kwanisyek weeriik eng' kwenung'ung', ak koam weeriik kwanisyekwak; ak ayai kirwoogutik eng' inyee, ak aseer piik tugul che ng'etu eng' okweek, aseerchi usoonaik tugul.

¹¹ Mwaei anyun Kiptaiyat Kamuktaindet ne Toroor kole, ko uu ye asabe aming'inin iman, amarirenen kondanyu, anan koriira moo, amu ki ing'wanit oldanyu ne tiliil eng' tuguuguk tugul che samisen, ak tuguuguk tugul che kiwechei.

¹² Meei kebeberta agenge eng' somok eng' inyee eng' koroito, ak kigeesu icheek eng' rubeet eng' kwenung'ung'; ak kobek eng' rotwetap chok kebeberta agenge eng' somok, eng' komosweguk tugul; ak aseer kebeberta agenge eng' somok koba koriswek tugul, ak ang'usu rotwetap chok koosup icheek.

¹³ Isuldoi anyun nereegekyuk ko uu nooto, ak anereekyini icheek eng' nereegekyuk che ng'woneen, kot koyama, si kigaigaa: si konai icheek kole anee Kamuktaindet ne Toroor ne ki ang'alaal eng' kagiilennyu pogei, ye kaayai nereegekyuk che ng'woneen kosulda eng' icheek.

¹⁴ Kogeny ayain iegu karaatya ak ne kiteweeri, eng' pororyosyek che mi komosweguk tugul, eng' taitap icheek tugul che siirtoi.

¹⁵ Egu ko uu nooto anyun teweernateet ak sasisyet, kaneetisyet ak kwong'eet, eng' pororyosyek che mi komosweguk tugul, ye ayae kirwoogutik eng' inyee eng' nereegek, ak eng' nereegek che ng'woneen, ak eng' kereetap kong' ne ng'waan: kaamwa anee Kamuktaindet ne Toroor ng'olyoondoniito:

¹⁶ ye amwoge icheek kipchabonik che yaacheen che po rubeet, che po ng'emisyet, che ayoogu kong'emak, ak ateswok rubeet, ak atile amitwogikwok.

¹⁷ Ak ayookwok rubeet, ak tyong'ik che yaacheen, che parenen piik; ak kobun kwenung'ung' koroito ak korotiik; ak aibun rotwetap chok konyo paragung'ung': kaamwa anee Kamuktaindet ne Toroor ng'olyoondoniito.