EZEKIEL 47 - BUKUIT NE TILIIL Sireet ne Dutero Kanon

Peek che ki mang'une hekaluut

¹ Ak ki imutwaa aweek anyo kurgeetap koot; ak ogeero, ki mang'une peek kurereetap tugatugigap koot che kitokyingei kong'asiis, amu kitokyingei koot kong'asiis: ak ki mang'une peek kurere, eng' komostap tai ne po koot, eng' murot tai ne po kaptisisyet.

² Yeityo komutwaa among' abun ooreetap ormariichet ne tokyingei murot kaataam, ak komuta abun ooreet ne po saang' agoi ormariichet ne po saang', abun ooreetap ormariichet ne tokyingei kong'asiis; ak ogeero, kisururtogei peek eng' komostap tai.

³ Ye ki wo chiito kotokyigei kong'asiis, kotinyei porowet, kokwa mitainik eliphuut agenge che po euut, ak king'ata abun peek, peek che kiitu kwarinik.

⁴ Ki ikwa kogeny eliphuut agenge, ak kong'ata abun peek, peek che kiitu kutung'oik. Ki ikwa kogeny eliphuut agenge, ak kong'ata abun peek, peek che kiitu suet.

⁵ Ye ibata, kokwa eliphuut agenge; ki ek aineet ne ma amuuch alandae: amu kitesak peek miising', peek che yamei kebir, aineet ne ma kimuuchi kelandae.

⁶ Ak koleenjo, Ee, weeriitap chii, kaigeer niito? Yeityo komutwaa ak kong'ata aweek ngeguutap aineet.

⁷ Ye kinga weege anyun, ogeero, kimi keetiik che chaang' miising' ngeguutap ainonooto komosi ak komosin.

⁸ Ki leenjo anyun, Pendi peechu kotokyingei emet ne mi kong'asiis, ak kochoortagei koba Arabah, ak koba kotokyigei nyanjet; pendi nyanjet peechooto ki king'at komong'; ak ki anyiny peegap nyanjet.

⁹ Ak kosap kiy age tugul ne sabei, ne uoti, eng' komosta age tugul ne punei ainoosyechooto; ak piitu njireenik che chaang' miising': amu kait olooto peechooto, ak ki anyiny peegap nyanjet, ak kosap kiy age tugul eng' ole itei aineet.

¹⁰ Ak kotononse ngeguut ramiigap njireenik: ak koek ole kiitoe regereiywek che kiname njireenik kobooch En-gedi agoi En-eglaim; isubi njireenikwak kergeindonywa, ko uu njireenigap nyanjetap Mediterenian, che chaang' miising'.

¹¹ Ago ma ki anyinyi komoswekyik che mi ng'atateek, ak nyanjosyekyik; kibagaaktoi kobunji muunyuk.

¹² Ak kobiit keetit age tugul ne ki amei eng' ngeguutap ainonooto, eng' komosi ak komosin, ne marestos sogekyik, ama petos logoekyik: ago yiei logoek eng' arawet age tugul, amu mang'une peekyik ole-tiliil: ak koek amitwogik logoekyik, ak ki anyinyisye sogekyik.

Kiwotosyegap emet

¹³ Mwaei Kiptaiyat Kamuktaindet ne Toroor kole: Egu niito kiwoteet, ye opcheitoi emet koek poroteet, kobee ortinwek taman ak aeng' che po Israel: nyooru kebeberwek Joseph.

¹⁴ Punjinok niito, kogergeit tugul; emet ne ki ayosye ale agoochini kwanisyekwok: ak kobunjook emoni koek poroteng'wong'.

¹⁵ Ak egu niito kiwotetap emet: eng' komostap murot kaataam, kobooch nyanjetap Mediterenian, eng' ooreet ne wendi Hetlon, agoi ole kimandoe Sedad;

¹⁶ Hamath, Berota, ak Sibraim, ne mi kwenutap kiwotetap Damasko ak kiwotetap Hamath; Haser-hatikon, ne mi ole neegitee kiwotetap Hauran.

¹⁷ Ak koek kiwoteet ne punu nyanjetap Mediterenian agoi Hasar-enon ne mi murot kaataam, ne po kiwotetap Damasko, kobooto kiwotetap Hamath ne mi murot kaataam. Egu niito komostap murot kaataam.

¹⁸ Ak egu Jordan kiwotetap kong'asiis, kwenutap Hauran ak Damasko ak Gilead, ak emetap Israel; okwaa kobooch kiwotetap murot kaataam agoi nyanjet ne mi kong'asiis. Egu niito komostap kong'asiis.

¹⁹ Egu kiwotetap komostap tai kobooch Tamar agoi peegap Meriboth-kadesh, agoi kererutap Misiri, agoi nyanjetap Mediterenian. Egu niito komostap murot tai.

²⁰ Egu kiwotetap cherongo nyanjetap Mediterenian, kobooch kiwotetap murot tai agoi ole kibunei kebendi Lebo-hamath. Egu niito komostap cherongo.

²¹ Opchechinigei anyun emoniito kobee ortinwegap Israel.

²² Opchei anyun eng' seretap parbareek koek poroteng'wong' kobooto toek che kitebee kwenung'wong', che sichei lagok eng' kwenung'wong'; ak koek icheek eng' okweek lagok che ki kisikyin kaa eng' kwenutap piigap Israel; nyooru poroteet kobootok eng' kwenutap ortinwegap Israel.

²³ Ak eng' ooreet age tugul ne katebee toondet, ogoochini porotennyi eng' olooto, mwaei Kiptaiyat Kamuktaindet ne Toroor.