EZEKIEL 46 - BUKUIT NE TILIIL Sireet ne Dutero Kanon

Kagoochinoik alak

¹ Mwaei Kiptaiyat Kamuktaindet ne Toroor kole: Kigerei eng' peetuusyek lo che po poisyet ormariichet ne po seremut ne po oriit, ne tokyingei kong'asiis; ak kiyatei eng' peetuutap sabato, ak kiyatei eng' peetuut ne kaleel arawet.

² Ak kwo oriit pounindet kobunei ooreet ne po keterut ne po ormariichet ne po saang', ak kotonone ye neegitee tugatukyetap ormariichet, ak kochop tisiik kagoochinennyi ne kibeelei ak kagoochinoikyik che po kaalyeet, ak kosa eng' tugatugigap ormariichet; yeityo komanda: ago ma kigerei ormariichet agoi koimen.

³ Ak kosa piigap emet eng' kurgeetap ormariichet eng' taitap Kamuktaindet ne Toroor eng' sabatoisyek, ak eng' ye kaleel arawet.

⁴ Ak kagoochinet ne kibeelei ne igoitoi pounindet kogoochin Kamuktaindet ne Toroor eng' peetuutap sabato, ko aarek lo che libwoben che po keechiir, kobooto mengit ne libwoop;

⁵ ak kobooto mengit age tugul ko ibu kagoochinetap peek che ng'ootiin litainik taman ak tisap ak kebeberyat, ak kobooto aaregap keechiirek age tugul ko koon ko uu ye imuuchi. Ak agobo kagoochinet age tugul ne po peek ko koon litainik somok che po mwanik.

⁶ Ak eng' peetuut ne kaleel arawet kigoito kirgit ne libwoop ne parnotyot; ak aarek lo che po keechiir, ak mengit; libwoben tugul:

⁷ Ak agobo kirgit age tugul ak agobo mengit age tugul ko nyolu kochop ineendet litainik taman ak tisap ak kebeberyat che po kagoochinetap peek che ng'ootiin. Ak agobo che po aarek ko ingochop ko uu ye imuuchi, ak kobooto tugul kogoitoi kora mwaita litainik somok.

⁸ Ak ye wendi pounindet oriit, kobunei ooreetap keterut ne po ormariichet, ak komanda kobun oranooto.

⁹ Ago ye pwa piigap emet taitap Kamuktaindet ne Toroor eng' igoorwek che ki king'at, ko ineendet ne wendi oriit kobunei ooreet ne po ormariichetap murot kaataam, kowendi kosaaei, komandoe ooreet ne po ormariichetap murot tai; ak ineendet ne wendi oriit kobunei ooreet ne po ormariichetap murot tai, komandoe ooreet ne po ormariichetap murot kaataam: maweegunegei ooreetap ormariichet ne kabunei kowendi oriit, ago wendi kochuuldos.

¹⁰ Ak ye pendi oriit, kowendi pounindet kobooto icheek, ak ye mandoi, komandoi tugul.

¹¹ Ak eng' peetuusyegap igoorwek ak igoorwek che ki king'at, ko agobo kagoochinetap peek che ng'ootiin kogoito litainik taman ak tisap ak kebeberyat kobooto kirgit age tugul anan ko mengit. Ak agobo che po aaregap keechiir ko ingochop ko uu ye imuuchi, ak kobooto tugul kogoitoi kora mwaita litainik somok.

¹² Ak ye chobei pounindet kagoochinetap chamyet, kagoochinet ne kibeelei anan kagoochinoigap kaalyeet koek kagoochinetap chamyet ne igoochin Kamuktaindet ne Toroor, keyatyin ormariichet ne tokyingei kong'asiis, ak kochop kagoochinennyi ne kibeelei kobooto kagoochinoikyik che po kaalyeet, ko uu ye yaei eng' peetuutap sabato: yeityo komanda; ak ye kagomanda, keger ormariichet.

Kagoochinoigap peetut age tugul

¹³ Ak ichobe aarwetap keechiir ne libwoop ne ma siirei kenyiit agenge koek kagoochinet ne kibeelei kigoochin Kamuktaindet ne Toroor peetuut age tugul: ichobe nooto karonet age tugul.

¹⁴ Ak ichop kagoochinetap peek che ng'ootiin kiloinik aeng' eng' karonet age tugul kobooto arwanooto po keechiir ak litaiyat agenge ne po mwaita si keburukto peek che ng'ootiin che tambululeen. Egu niito ng'atuutyet ne po agoi ne po kagoochinetap peek che ng'ootiin ne kigoochin Kamuktaindet ne Toroor kotugul.

¹⁵ Kichobei anyun ko uu nooto aarwetap keechiir, kobooto kagoochinetap peek che ng'ootiin, ak mwaita, karonet age tugul, koek kagoochinet ne kibeelei ne po kotugul.

Pounindetap emet

¹⁶ Mwaei Kiptaiyat Kamuktaindet ne Toroor kole: Ngot kogoochi pounindet kagoochinet age eng' weeriikyik, koegu nooto poroteetap weerooto, punjin weeriikyik; punjin icheeget amu porotennywa.

¹⁷ Ago ngot kogoochi kebebertap porotennyi age eng' otwogikyik, kobunjin otwogindonooto agoi kenyiitap katyaget; si keeweekyi pounindet; ago punjin porotennyi weeriikyik.

¹⁸ Ago ma ibei pounindet poroteetap piik, si korebe icheek tuguukwak; igoochin poroteet weeriikyik eng' tuguukyik: si ma kiseer piikyuk, kobagaakta chii age tugul tuguukyik.

Ole kichobe kagoochinoik

¹⁹ Ki imutwaa anyun abun ole kibunei kebendi oriit, ne ki mi tabandap ormariichet, anyo kooriik che tiliileen che po tisiik, che kitokyingei murot kaataam: ak ogeero, kimi komosta ole po patai ne kitokyingei cherongo.

²⁰ Ak ki leenjo, Olito ole iyoe tisiik kagoochinetap chalwokto ak kagoochinetap tengekto, ole watane kagoochinetap peek che ng'ootiin; si ma ip koba seremut ne sip kemong'jin, si koanyiny piik.

²¹ Yeityo komutwaa anyun anyo seremut ne sip kemong'jin, ak komuta abun luukwek ang'wan che po seremut; ak ogeero, kimi seremut luuita age tugul ne po seremunooto.

²² Ki mi seremusyek che mengeechen che ki king'ot eng' luukwechooto ang'wan che po seremut, che koindonywa ko ki mitainik artam che po euut, ak mitainik sosom che po euut tebeesindo: ki aechin seremusyechuuto ko ang'wan che ki mi luukwechooto.

²³ Ak ki kiteech inaatut koyiem seremusyechooto ang'wan, ak ki kichop ole kiyoise eng' kurereetap inatusyechooto komoswek tugul.

²⁴ Ki leenjo anyun, Chuuto kooriik che kiyoise, ole iyoe kiboitinigap koot kagoochinoigap piik.