EZEKIEL 45 - BUKUIT NE TILIIL Sireet ne Dutero Kanon

Emetap tisiik, lawiik ak pounindet

¹ Ak ye opchee emet eng' seretap parbareek koek poroteet, ogoochi Kamuktaindet ne Toroor kagoochinet, kebeberta ne tiliil ne po emet: egu koindo tegat eliphuusyek tiptem ak muut, ak koek tebeesindo eliphuusyek taman: egu emonooto ne tiliil eng' kiwotennyi tugul eng' komoswek tugul.

² Punjin kebebertap emonooto komosta ne tiliil ne egu koindo pogol muut, koek tebeesindo pogol muut, aechin komoswek tugul ko ang'wan; ak emotinwekyik che kiyagisye, koegu mitainik konom che po euut komoswek tugul.

³ Ak eng' niito kaikwa, ikwa koindo koek eliphuusyek tiptem ak muut, ak koek tebeesindo eliphuusyek taman: ak komi olooto ole-tiliil eng' ye Tiliil Miising'.

⁴ Nooto ko kebeberta ne tiliil ne po kooret, punjin tisiik, kiboitinigap ole-tiliil, che riikyin Kamuktaindet ne Toroor koboisyechin; ak kobunji olooto kooriikwak, ak kobunji ole-tiliil komosta ne tiliil.

⁵ Punjin Lawiik kiboitinigap koot, koindo ne po eliphuusyek tiptem ak muut, ak tebeesindo ne po eliphuusyek taman, konamjigei kobunji, koek nganasook che menyei.

⁶ Ak omarar komosta ne punjin nganaseet koek eliphuusyek muut tebeesindo, koek koindo eliphuusyek tiptem ak muut, kotetkei ak kagoochinetap kebeberta ne tiliil: punjin koot komugul ne po Israel.

⁷ Ak kobunji pounindet emet ne mi komosi ak komosi ne po kagoochinet ne tiliil ak ne po emet ne punjin nganaseet, eng' taitap kagoochinet ne tiliil, ak eng' taitap emet ne punjin nganaseet eng' ole tokyingei cherongo, ak eng' ole tokyingei kong'asiis. Ak aechin koindonyi ak age eng' kebeberwechooto, kobooch kiwoteet ne po cherongo agoi kiwoteet ne po kong'asiis.

⁸ Punjin ineendet emonooto eng' Israel. Ama kousei kogeny pounikyuk piikyuk; ago igoochin emet kootap Israel kobee pororyosyekwak.

Keruutik ak Kakwautik

⁹ Mwaei Kiptaiyat Kamuktaindet ne Toroor kole: Ingoyamak nooto, ee pounigap Israel: oiste koroomnateet ak ng'emisyet, ak oyai kirwooget ak imanda; oiste yaakset ne oyaache piikyuk eng' kimnateet, mwaei Kiptaiyat Kamuktaindet ne Toroor.

¹⁰ Oboisyee keruutik ak mitainik che po iman.

¹¹ Aechin epah ak debeisyek aeng', ak debeisyek aeng' che kanyi tuguuk ko kergei ak kebeberta agenge eng' taman che po homer, ak epah agenge ko kergei ak kebeberta agenge eng' taman ne po homer; egu homer kiit ne kigerisye kotugul.

¹² Ak yamei shekel agenge ak gerahisyek tiptem. Shekelisyek muut ko egu shekelisyek muut, shekelisyek taman ko egu shekelisyek taman, ak shekelisyek konom ko egu mina agenge.

¹³ Ni ko kagoochinet ne ogoitoi; kebeberta agenge eng' lo ne po epah eng' homer ne po nganuuk, ak ogoite kebeberta agenge eng' lo ne po epah eng' homer ne po baale.

¹⁴ Ak kebebertap mwaita ne ki king'at ne po debeisyek aeng' che po mwaita, koegu kebeberta agenge eng' taman ne po debeisyek aeng' che po Kor, chooto ko debeisyek tiptem, nooto ko homer agenge, amu debeisyek tiptem ko yamei homer:

¹⁵ kobooto aarwet agenge ne po akweetap keechiirek, ne ki leweni eng' pogol aeng', ne punu emet ne pitat ne po Israel; egu chuuto kagoochinetap peek che ng'ootiin ak kagoochinet ne kibeelei, ak kagoochinoigap kaalyeet, si kobiit koyai kagaigaet agobo icheek, mwaei Kiptaiyat Kamuktaindet ne Toroor.

¹⁶ Igoitoi piik tugul che po emet kagoochinoni agobo pounindet eng' Israel.

¹⁷ Ak koek poisyetap pounindet kagoochinoik che kibeelei, ak kagoochinoik che po peek che ng'ootiin, ak kagoochinoik che kieei eng' igoorwek, ak eng' ye kaleel arawet, ak eng' sabatoisyek, eng' igoorwek tugul che ki king'at che po kootap Israel: chobei ineendet kagoochinetap tengekto, ak kagoochinetap peek che ng'ootiin, ak kagoochinet ne kibeelei, ak kagoochinoik che po kaalyeet, si koyai kagaigaet agobo kootap Israel.

Peetuut ne oo

¹⁸ Mwaei Kiptaiyat Kamuktaindet ne Toroor kole: Eng' arawet ne po tai, eng' peetuut ne po tai ne po arawanooto, igetu kirgit ne libwoop ne parnotyot, si ianyiny ole-tiliil.

¹⁹ Ak konam tisiindet korotiigap kagoochinetap tengekto, ak konde tugatugigap koot, ak koilee luukwek ang'wan che po tegeleiywotap kaptisisyet, ak koilee tugatugigap seremut ne po oriit.

²⁰ Ak iyai ko uu nooto eng' peetuutap tisap ne po arawet agobo age tugul ne lelei, ak agobo ineendet ne abusat: oyae anyun ko uu nooto kagaigaet agobo koot.

²¹ Eng' arawet ne po tai eng' peetuutap taman ak ang'wan ne po arawanooto, ochop paska, igoorto ne po peetuusyek tisap; ki amei magatiinik che ma kinde mermereek.

²² Ak chobei eng' peetuunooto pounindet kirgit ne po kagoochinetap tengekto, agobo kei ak agobo piik tugul che po emet.

²³ Ak kochopchi Kamuktaindet ne Toroor kagoochinet ne kibeelei eng' peetuusyek tisap che po igoorto, kiruugik tisap ak mengichik tisap che libwoben tugul, eng' peetuut age tugul ne po peetuusyechooto tisap; ak kwesta ne po kagoochinetap tengekto ne po peetuut age tugul.

²⁴ Chobei kagoochinetap peek che ng'ootiin kiloinik taman agobo kirgit age tugul, ak kiloinik taman agobo mengit age tugul, ak litainik somok che po mwanik agobo kiloinik taman age tugul che po peek che ng'ootiin.

²⁵ Yaei ineendet ko uu niito eng' arawetap tisap, eng' peetuutap taman ak muut ne po arawanooto, eng' peetuusyek tisap che po igoorto; yaei ko uu nooto eng' kagoochinetap tengekto, ak eng' kagoochinet ne kibeelei, ak eng' kagoochinetap peek che ng'ootiin ak eng' mwanik.