EZEKIEL 44 - BUKUIT NE TILIIL Sireet ne Dutero Kanon

Ormariichet ne ki keraat

¹ Yeityo komutwaa aweek abun ooreetap ormariichet ne sip kemong'jin, ne po ole-tiliil, ne tokyingei kong'asiis; ak kigeraat ormariichanooto.

² Ak ki leenjo Kamuktaindet ne Toroor, Kigerei ormariichani, ma kiyatei, ama punei chii kowendi oriit, amu kagobun Kamuktaindet ne Toroor, Kamuktaindetap Israel, kowendi oriit; kigerei anyun amu nooto.

³ Ago pounindet, kotebee olooto ko uu pounindet, si koam amitwogik eng' taitap Kamuktaindet ne Toroor; wendi oriit kobunei ooreetap keterutap ormariichet, ak komandae oranooto.

Chamjinet kechut hekaluut

⁴ Yeityo komutwaa anyo ooreet ne po ormariichet ne po murot kaataam ne po taitap koot; ak ki ageer, ogeero, ki nyi kootap Kamuktaindet ne Toroor liilindap Kamuktaindet ne Toroor: ak ki abut, kot kotiiny togeet ng'wony.

⁵ Ak ki leenjo Kamuktaindet ne Toroor, ee weeriitap chii, nam komyee, ak igeer eng' konyeguk, ak igase itiiguk tuguuk tugul che amwaun agobo etanutik tugul che po kootap Kamuktaindet ne Toroor, ak ng'atuutikyik tugul; ak inai komyee ole kibetitoi koot oriit, kobooto komosta age tugul ne kimandoe eng' ole-tiliil.

⁶ Ak imwachi ngelelyot, kootap Israel, ileenji, mwaei Kiptaiyat Kamuktaindet ne Toroor kole: Ee, okweek kootap Israel, tuguukwok tugul che kiwechei, ko ingoyamak,

⁷ amu ki omutu kipsagarek, che ma kimuratan mugulelwek, ama kimuratan tuguuk tugul che saptos, kotebee oldanyu ole-tiliil, si komurwon, nooto koonnyu, ye kogoitoi amitwogikyuk, mwanik ak korotiik, ak ki kobut kayomisennyu, si kotesyi tuguukwok tugul che kiwechei.

⁸ Ama oriip ng'atuutyetap tuguukyuk che tiliileen: ago ki ondechigei okweegei riibiigap poisyennyu eng' oldanyu ne tiliil.

⁹ Mwaei Kiptaiyat Kamuktaindet ne Toroor kole ma wendi oldanyu ne tiliil toondet age tugul ne Pororyosyek che ma kimuratan muguleldo ak poorto, agot toondet age tugul ne mi kwenutap piigap Israel.

Keistoi Lawiik eng' tiseinateet

¹⁰ Ago ibei tengektonywa Lawiik che ki koistoenagei kolooegitu, ye kingo petyo Israel, che ki koba kometaa koosup kanamonikwak.

¹¹ Ago egu icheek kiboitiinik eng' oldanyu ne tiliil, koriipsei eng' ormariichok che po koot, ak koboisyei eng' koot: enyei kagoochinet ne kibeelei ak tiseiywot agobo piik, ak kotononso eng' taitap piik koboisyechi.

¹² Ko uu ye kiboisyechin icheek piik eng' taitap kanamonikwak, ak koek kanagutyetap tengekto eng' kootap Israel; ki anamji parak anyun eunnyu atokyi icheek, mwaei Kiptaiyat Kamuktaindet ne Toroor, ak ibei icheek tengektonywa.

¹³ Ama riikyino, si koyaiywo poisyetap tisiindet, anan koriikyi tuguukyuk che tiliileen alak tugul, koriikyi tuguuk che tiliileen miising': ago ibei kalilanennywa, kobooto tuguukwak che kiwechei che ki koyai.

¹⁴ Nganda uu nooto, ayae icheek koek riibiigap ng'atuutyetap koot, amu poisyennyi tugul, ak amu tuguuk tugul che kiyaei eng' oriit.

Tisiik

¹⁵ Ago pwoonei koriikyino koboisyeiwo tisiik Lawiik, weeriitap Zadok, che ki riibei poisyetap oldanyu ne tiliil, ye kingo pa piigap Israel kometaa; si kotononso eng' tainnyu kogoono mwanik ak korotiik, mwaei Kiptaiyat Kamuktaindet ne Toroor:

¹⁶ pendi oldanyu ne tiliil, ak koriikyi mesennyu, si koboisyeiwo, ak koriip ng'atuutyennyu.

¹⁷ Ak ye pa oriit kobun ormariichogap seremut ne po oriit, kilaakyin ngoroik che po katanit; ama ilaachi icheek ngoroigap koroorigap keechiirek, ye poisyei eng' seremut ne po oriit, ak eng' ko.

¹⁸ Ilaachi chepkuloigap katanit, ak kolaach sulwalisyek che po katanit; ma ilaachi kiy age tugul ne igoochin kong'etyi kaot.

¹⁹ Ak ye mandoi kobendi seremut ne sip kemong'jin, seremut ne sip kemong'jin, agoi ole mi piik, koreegu anyun ngoroichooto kaboisyee, ak kogonor eng' kooriik che mengeechen che tiliileen, ak kolaach ngoroik alak, si ma itabaan piik eng' ngoroikwak.

²⁰ Ma icheru metowekwak, anan kobagaakta suumeekwak kogoeegitu; tilei kityo konwagitu.

²¹ Ama eei tisiindet age tugul divaik ye wendi seremut ne po oriit.

²² Ama ituni mosoogik, anan ne kigeon: ago ituni pergeinik che po iyoteetap kootap Israel, anan ko mosoget ne ki po tisiindet.

²³ Ak koneet piikyuk koobeesyo che tiliileen ak che ma tiliileen, ak koneet icheek koguiyo tuguuk che ma ianyinyotin ak che ianyinyotin.

²⁴ Ak korwookyi che ibeligei; korwookyi ko uu kirwoogutikyuk: ak koriip ng'atuutikyuk ak kaneetisyosyekyuk eng' igoorwekyuk tugul che ki king'at; ak kotabaan sabatosyekyuk.

²⁵ Ama riikyin muusto si ma ing'wanitkei: ago imuuchi kong'wanitkei amu kwanda anan kamet, anan weeriit, anan chepto, anan ng'eetap kamet, anan chepkamet ne ma kitun.

²⁶ Ak ye kagianyiny, kiityi peetuusyek tisap.

²⁷ Ak eng' peetuut ne wendi ole-tiliil, seremut ne po oriit, kwo kobois eng' ole-tiliil, kogoito kagoochinennyi ne po tengekto, mwaei Kiptaiyat Kamuktaindet ne Toroor.

²⁸ Ak konyoor poroteet; aa porotennywa: ak mogoochini icheek kiit ne namei kobunji eng' Israel; aa nenywa.

²⁹ Amei kagoochinetap peek che ng'ootiin, ak kagoochinetap tengekto, ak kagoochinetap chalwokto; ak nenywa kiit age tugul ne kitabaani eng' Israel.

³⁰ Ak punjin tisiik tongoanik tugul che po tai che po kiy age tugul, ak kagoochinet age tugul ne kinamjin parak ne po kiy age tugul, che po kagoochinoikwok tugul che kinamjin parak: ogoochini kogeny tisiindet magatinikwok che tuonen che po tai, si kogoochi perurto kotebee koong'ung'.

³¹ Ma amei tisiik kiy age tugul ne kamee ineegei, anan ne kobarei tyong'ik, ngo toriit anan ngo tyony.