EZEKIEL 43 - BUKUIT NE TILIIL Sireet ne Dutero Kanon

Liilindap Kamuktaindet eng' hekaluut

¹ Ye ibata komutwaa anyo ormariichet, ormariichanooto tokyingei kong'asiis:

² ogeero, ki mang'une ooreetap kong'asiis liilindap Kiptaiyat Kamuktaindetap Israel: ak ki uu tweguunennyi cheetap peek che chaang': ak ki iluu ng'wony eng' liilindanyi.

³ Ak ki uu itoondap liilinooto ng'ang'utyet ne kigageer, ko uu ng'ang'utyet ne ki ageer ye ki anyoone ang'eme nganaseet; ak ki uu ng'ang'utichooto ng'ang'utyet ne ki ageer eng' ye neegitee aineetap Kebar: ak ki abut kot kotiiny togeet ng'wony.

⁴ Ak ki nyo ko liilindap Kamuktaindet ne Toroor kobun ooreetap ormariichet ne tokyingei kong'asiis.

⁵ Ak kiganaba Kabuuset ne Tiliil, ak komutwaa anyo seremut ne po oriit; ogeero, ki nyi liilindap Kamuktaindet ne Toroor koot.

⁶ Ak ki agas kong'alaalwo chii eng' ko; ak ki tonon chii eng' ye ami.

⁷ Ak ki leenjo, Ee, weeriitap chii, yuto ko ye mi ng'echerennyu ne po laitornatet, ole tebee keelyekyuk, ole amenye koigeny eng' kwenutap piigap Israel: ama komurwoni kogeny kootap Israel kainennyu ne tiliil, icheeget anan ko laitorinikwak, eng' kugoinatennywa, ak eng' muuswegap laitorinikwak eng' komoswekwak che torooreen;

⁸ ye kingo nde tugatukyennywa koriikyi tugatukyennyu, ak konde tolochikwak koriikyi tolochikyuk, ak kimi tooteet ineegei ne ki ibestoseech, anee ak icheek; ak ki komurwon kainennyu ne tiliil eng' tuguukwak che kiwechei che ki yai: ki ageesu anyun icheek eng' nereegekyuk.

⁹ Ingoisto anyun nguno kugoinatennywa ak muuswegap laitorinikwak, kolooitena, si ameny kwenunnywa koigeny.

¹⁰ Ee, inyee weeriitap chii, iboorchi koiito kootap Israel, si kobiit kolilaanso amu tengekwogikwak: ak ingokwa icheek kiit ne uu.

¹¹ Ak ngot kolilaanso amu tuguuk tugul che ki koyai, iboorchi kiit ne uu koot, ak itoondanyi, ak ole kibunei kebendi saang', ak ole kibunei kebendi ko, kobooto ole uu tuguuk, ak etanutikyik tugul, ak ole teptoi tugul, ak ng'atuutikyik tugul, ak isir kogeerei: si kobiit koriip ole uu kiit komugul, kobooto etanutikyik tugul, ak koyai.

¹² Niito ko ng'atuutyetap koot: egu ne tiliil miising' eng' tulweet parak komoswek tugul ole pooch. Ogeero, niito ko ng'atuutyetap koot.

Kaptisisyet

¹³ Chu ko kakwautigap kaptisisyet eng' mitainik che po euut: (kakwautyet ko kakwautyet agenge ne po euut ak tebeesindap euut:) egu kelut kakwautyet agenge ne po euut, koek tebeesindo kakwautyet agenge ne po euut, ak ki ek mireiywondennyi ne ki kimire, ole po inchisyek sogool: egu niito anyun kelutap kaptisisyet.

¹⁴ Ak egu mitainik aeng' che po euut kobooch ng'wony agoi tegeleiywot ne tabanu ng'wony, ak tebeesindo ko kakwautyet agenge ne po euut; ak egu mitainik ang'wan che po euut kobooch tegeleiywot ne nwach agoi tegeleiywot ne kooi, ak tebeesindo ko kakwautyet agenge ne po euut.

¹⁵ Ak egu mitainik ang'wan che po euut kaptisisyet ole tabanu parak; ak kobooch ole kibeelse eng' kaptisisyet ak kwo parak, komiitei kuinoik ang'wanu.

¹⁶ Ak egu kooindap ole kibeelse mitainik taman ak aeng' che po euut, ak mitainik taman ak aeng' eng' tebeesindo, ki aechin komoswekyik tugul ko ang'wan.

¹⁷ Ak egu mitainik taman ak ang'wan che po euut, kooindap tegeleiywot, ak koek taman ak ang'wan tebeesindo agine eng' komoswekyik ang'wan; ak koek kebeberta kakwautyet ne po euut, mireiywot ne ki kimire; ak koek kakwautyet agenge ne po euut, kelunnyi, eng' komoswek tugul: ak kotokyigei kong'asiis lang'eiywondennyi.

Katabaanetap kaptisisyet

¹⁸ Ak ki leenjo, Ee, weeriitap chii, Mwaei Kiptaiyat Kamuktaindet ne Toroor ko uu ni kole: Chu ko ng'atuutigap kaptisisyet eng' peetuut ne tuun kayai icheek, si kogoitoe kagoochinoik che kibeelei, ak koisee korotiik.

¹⁹ Mwaei Kiptaiyat Kamuktaindet ne Toroor kole, igoochini tisiik Lawiik che po iyoteetap Zadok, che riikyino si koboisyeiwo, kirgit ne parnotyot, koek kagoochinetap tengekto.

²⁰ Ak itaach korotiikyik, si iilee kuinoik ang'wan che po kaptisisyet ak luukwek ang'wan che po tegeleiywot, kobooto mireiywot eng' komoswek tugul: itiliili ko uu nooto ye iyachini kagaigaet.

²¹ Ikwerye kogeny kirgit ne po kagoochinetap tengekto, si kobeel eng' ole ki king'at eng' ko, eng' saang'utap ole-tiliil.

²² Ak igoite eng' peetuut ne po aeng' kwesta ne libwoop koek kagoochinetap tengekto; yeityo koanyiny icheek kaptisisyet ko uu ye kagagoanyinye kirgit.

²³ Ye kaigeesu kaanyinyet, igoite kirgit ne parnotyot ne libwoop, kobooto mengit ne libwoop ne punu akweet.

²⁴ Ak igetu koriik taitap Kamuktaindet ne Toroor, ak koseerchi tisiik icheek muunyuk, yeityo kogoito icheek koek kagoochinet ne kibeelei kigoochin Kamuktaindet ne Toroor.

²⁵ Ichobe eng' peetuusyek tisap kwesta koek kagoochinetap tengekto: chobei kirgit ne parnotyot kogeny, kobooto mengit ne punu akweet, che libwoben tuwai.

²⁶ Yaei icheek kagaigaet agobo kaptisisyet eng' peetuusyek tisap koanyinyi; itabaani anyun ko uu nooto.

²⁷ Ak ye kagobata peetuusyechooto, kobeel anyun tisiik kagoochinoikwok che kibeelei, eng' kaptisisyet, kobooto kagoochinoikwok che po kaalyeet, eng' peetuutap sisiit ak kwo tai; si ataachak, mwaei Kiptaiyat Kamuktaindet ne Toroor.