EZEKIEL 42 - BUKUIT NE TILIIL Sireet ne Dutero Kanon

Koorik che mi seremutap hekaluut

¹ Ki imutwaa anyun anyo seremut ne sip kemong'jin, eng' ooreet ne tokyingei murot kaataam: ak ki imutwaa anyo koot ne ming'in ne kitokyingei komosta ne mi taban, ne ki mi taitap inaatut ole tokyingei murot kaataam.

² Ki mitainik pogol agenge che po euut kooindap kooriik che ki mi murot kaataam, ak ki mitainik konom tebeesindo.

³ Ki mi komoswek aeng'u che ki kibendote che kiitoorchindos, che ki po kooriik che ki kiyap koba parak konyil somok, che kitokyingei mitainik tiptem che po euut che po seremut ne po oriit, ak che kitokyingei ole ki kimale koik che po seremut ne sip kemong'jin.

⁴ Ak kimi taitap koorichooto ole ki kibunoti, ki mitainik taman che po euut tebeesindo ngeba oriit, ko po mitainik pogol agenge che po euut, koindo; ak kitokyingei kurgotikwak murot kaataam.

⁵ Ki nwagen anyun kooriik che kitabanu parak; amu ki ibe poroindo komoswek che ki kibendote, kosiir kooriik che kitabanu ng'wony, ak che po kween, che ki mi koyooto.

⁶ Amu kimitoti kooriik che ki kiyap koba parak, konyil somok, ak ki ma kotinyei tolochik che uu tolochigap seremusyek: kitenden anyun ne kitabanu parak kosiir ne kitabanu ng'wony ak ne po kween, kong'etee ng'wony.

⁷ Ki mitainik konom kooindap tooteet ne kitabanu saang' ole neegitee koorchooto mengeechen, ne tokyingei seremut ne sip kemong'jin eng' taitap koorchooto mengeechen.

⁸ Amu ki mitainik konom che po euut kooindap koorchooto kimi seremut ne sip kemong'jin: ak ogeero, ki mitainik pogol agenge che po euut che ki mi taitap Hekaluut.

⁹ Ak kimi kurgeet eng' kurereetap koorchooto mengeechen, eng' komostap kong'asiis ye wendi chii koorchooto kobunei seremut ne sip kemong'jin.

¹⁰ Ki mi kooriik che mengeechen tooteet oriit ne po seremut ne tokyingei kong'asiis, ne tokyindos ak komosta ne mi taban eng' taitap koot.

¹¹ Ak ki uu ooreet ne ki mi tainnywa kergeindap ooreet ne ki po kooriik che mengeechen che kitokyingei murot kaataam; ki aechin koindonywa ak tebeesindanywa: ak ki uu atebeennywa tugul ak kurgotikwak, ole kibunei kebendi saang'.

¹² Ak kimi kurgeet ne ki uu kurgotigap kooriik che mengeechen che kitokyingei murot tai, eng' ooreet meto, ooreet ne ki mi taitap tootoonooto, ne kitokyingei kong'asiis, ye wendi chii oriit.

¹³ Ki leenjo anyun, Kooriik che mengeechen che mi murot kaataam ak che mi murot tai, che tokyindos ak komosato mi taban, chooto ko kooriik che tiliileen, ole ame tisiik che neegitee Kamuktaindet ne Toroor tuguuk che tiliileen miising': konoree olooto tuguuk che tiliileen miising', kobooto kagoochinoigap peek che ng'ootiin, ak kagoochinoigap tengekto, ak kagoochinoigap chalwokto; amu tiliil komosato.

¹⁴ Ye pa tisiik oriit, koma mandoi eng' ole-tiliil kobendi seremut ne sip kemong'jin, ama konoree yooto ngoroikwak che kaboisyee; amu tiliileen ngoroichooto: yeityo kolaach ngoroik alak, si koriiktoi ole mi piik.

¹⁵ Ak kingo kagogees kakwaetap koot ne po oriit, komutwaa amang'une ooreet ne po ormariichet ne tokyingei kong'asiis, ak kokwa komoswek tugul.

¹⁶ Ki ikwae tegat ne kikwaise komostap kong'asiis, koek tegandanooto pogol muut, ki ikwae tegandanooto komoswek tugul.

¹⁷ Ki ikwa komostap murot kaataam, koek tegandanooto pogol muut, ki ikwae tegandanooto komoswek tugul.

¹⁸ Ki ikwa komostap murot tai, koek tegandanooto pogol muut, ki ikwae tegandanooto.

¹⁹ Kiwelelgei kotokyigei komostap cherongo, ak kokwae tegandanooto koek pogol muut, ki ikwae tegandanooto.

²⁰ Ki ikwa komoswek ang'wan: ki kiyieme inaatut, ne koindonyi ko ki mitainik pogol muut, ak tebeesindanyi ko ki mitainik pogol muut, si kobiit ko oiyo komosta ne tiliil ak komosta ne po piik.