EZEKIEL 41 - BUKUIT NE TILIIL Sireet ne Dutero Kanon

¹ Yeityo komutwaa anyo Hekaluut, ak ki ikwa tugatugik, ki ek mitainik lo che po euut tebeesindo eng' komosi, koek mitainik lo che po euut eng' komosin, ne ki tebeesindap emait.

² Ak ki mitainik taman che po euut tebeesindap ole kibunei kebendi oriit; ak komoswegap ole kibunei kebendi oriit ko ki mitainik muut che po euut eng' komosi, ak mitainik muut che po euut eng' komosin: ak ki ikwa koindonyi, koek mitainik artam che po euut, koek tebeesindo mitainik tiptem che po euut.

³ Ki wo anyun ineendet oriit, ak kokwa tugatukyet age tugul ne po ole kibunei kebendi oriit, ki ek mitainik aeng' che po euut: ak ki ek mitainik lo che po euut, ole kibunei kebendi oriit; ak ki ek mitainik tisap che po euut tebeesindap ole kibunei kebendi oriit.

⁴ Ak ki ikwa koindonyi, koek mitainik tiptem che po euut, koek tebeesindo mitainik tiptem che po euut, eng' taitap koyooto: ak ki leenjo, Olito ole-tiliil Miising'.

Teekseetap hekaluut ak ole teptoi

⁵ Yeityo kokwa inaatutap koot, koek mitainik lo che po euut; ak ki ek tebeesindap koot age tugul ne mi taban, mitainik ang'wan che po euut, che kimitoti oldo tugul eng' koot eng' komosta age tugul.

⁶ Ak kimitoti kooriik che ki kiyap koba parak konyil somok, eng' paragutap koot age tugul ne ki mi inaat, ki ek sosom tugul ko katetatkei; ak kichut koorchooto po taban inatusyegap koot che po kooriik che mengeechen, che mi taban eng' komoswek tugul, si kobiit kotiegei, si ma tiegei inaatutap koot.

⁷ Ak kitesagis koorchooto ki kiyap kobaraitu koba parak; ko uu ye kiyiem koot kotes koba parak; amu ye kiyiemei koot ko kitesak koba parak eng' komoswek tugul che po koot: kitesak anyun tebeesindap koot kwo parak; ki imuuchi chii kotogosta kong'etee koot ne tabanu ng'wony agoi koot ne tabanu parak kobunei koot ne po kween.

⁸ Ki ageer kogeny ale tinyei koot ole sutot eng' komoswekyik: kiyamegei lumeiywek che po kooriik che mi inaat ak tegat ne po mitainik lo che po euut.

⁹ Ki mitainik muut che po euut nyigiisindap inaatut ne po kooriik che mi inaat che tabanu saang'; ak ole kiga ng'et ko ki ye mi kooriik che po inaat che ki po koot.

¹⁰ Ak ki mitainik tiptem che po euut tebeesindo ne po kwenutap koorchooto mengeechen, eng' komosta age tugul ne po koot.

¹¹ Ak kitokyingei kurgotigap koorchooto po kween ole kiga ng'et, kitokyingei kurgeet age murot kaataam, kotokyingei age murot tai: ak ki mitainik muut che po euut tebeesindap komosta ne kiga ng'et, eng' komoswek tugul.

Teekseet ne po kebebertap cherongo

¹² Ak ki mitainik tamanwogik tisap che po euut tebeesindap koot ne kitokyindos ak komosta ne ki mi taban eng' komosta ne tokyingei cherongo; ak ki mitainik muut che po euut nyigiisindap inaatutap koot eng' komoswek tugul, ak ki mitainik tamanwogik sogool che po euut koindonyi.

¹³ Kikwa anyun koot, koek mitainik pogol che po euut koindo; ak ki ek kooindap komosta ne ki mi taban, kobooto koot ak inatusyekyik, mitainik pogol che po euut;

¹⁴ ak ki ek mitainik pogol che po euut tebeesindap togeetap koot, kobooto che po komosta ne ki mi taban eng' komostap kong'asiis.

¹⁵ Ak ki ikwa kooindap koot ne kitokyindos ak komosta ne ki mi taban, ne ki mi ole po patai, kobooto komoswekyik che ki kibendote che ki mi komosi ak komosin, koek mitainik pogol che po euut; kobooto Hekaluut ne po oriit, ak keterusyegap seremut;

¹⁶ kobooto tugatugik, ak tirisyok che regerotiin, ak komoswek che kibendote, che ki mi komoswek tugul che po kooriikyik che ki kiyap koba parak konyil somok, che tokyingei tugatukyet, che ki kiliige keetiik komoswek tugul, kobooch ng'wony agoi tirisyok; kiga kituch anyun tirisyochooto;

¹⁷ agoi kurgeet parak, agoi koot ne po oriit, ak ole po saang', ak kobun inaatut tugul komosta age tugul oriit ak saang', kobee kakwaet.

¹⁸ Ki kiwai itoonwegap kerubik ak che po tiironigap sosik; ak kiga rubatkei tiironigap sosik ak kerubisyek; ak ki tinyei itoondo age tugul ne po kerubit togoochik aeng';

¹⁹ kitokyingei anyun togeet ne uu ne po chiito tiiret age, eng' komosta age, kotokyingei togeet ne uu ne po ng'etundo ne neran tiiret age eng' komosta age: ki kiyai ko uu nooto eng' komoswek tugul che po koot komugul.

²⁰ Kiga kiyai itoonwegap kerubisyek ak che po tiironigap sosik kong'etee ng'wony agoi paragutap kurgeet: ki uu nooto anyun inaatutap Hekaluut.

²¹ Ki tinyei koryosyek ang'wan tugatugigap kurgeetap Hekaluut; ak ki uu togeetap ole-tiliil itoondap Hekaluut.

²² Ki po keetiik kapkorosuut, ak ki po mitainik somok che po euut kooindap tononennyi, ko po mitainik aeng' che po euut koindonyi; ak ki po keetiik luukwekyik, kobooto koindonyi ak inatusyekyik: ak kimwaiwo koleenjo, Ni ko meset ne mi taitap Kamuktaindet ne Toroor.

Kurgotik

²³ Ak ki tinyei Hekaluut ak ole-tiliil kereiywek aeng' che po kurgotik.

²⁴ Ak ki tinyei kereiywot age tugul kebeberwek aeng', kebeberwek aeng' che arung'oksei; ki tinyei kereiywot agenge kebeberwek aeng', kotinyei kereiywot age kebeberwek aeng'.

²⁵ Ak ki kiwachi kereiywechooto po Hekaluut itoonwegap kerubisyek ak che po tiironigap sosik, ko uu che kiga kiwachi inatusyek; ak kimi pambanik che nyigiisen eng' keterut saang'.

²⁶ Ak ki mi tirisyok che regerotiin ak itoonwegap tiironigap sosik eng' komosi ak komosin, eng' komoswegap keterut: ki uu nooto koorchooto mengeechen che ki mi inaatutap koot, ak pambanik che nyigiisen.