EZEKIEL 4 - BUKUIT NE TILIIL Sireet ne Dutero Kanon

Kabookyinetap Jerusalem

¹ Ee, inyee weeriitap chii, cheeng'jingei matabaryat, ak inde taing'ung' ak isir itoondap nganaseet, nooto Jerusalem:

² ak iyiem, ak iteech irimoik iyieme, ak iwasyi ng'ung'unyek, ak iteech kooriik kotokyigei, ak inde komoswek tugul injinisyek che kibute nganaseet.

³ Yeityo icheeng' taabeetap karnet, ak ilumde koek tooteetap karnet eng' kwenung'ung', ak nganaseet: ak itokyi togeng'ung' nganaseet, si kobiit keyiem, ak iyiem inyeendet, ak imuut ineendet. Egu niito kaboorunet eng' kootap Israel.

⁴ Ak iru kogeny isyep komostap kaataam, ak inde tengektap kootap Israel paragunnyi: iibe tengektonywa ko uu koitetap peetuusyek che isyebe komosato.

⁵ Amu ki ang'at kenyiisyegap tengektonywa koek eng' inyee koitetap peetuusyek, chooto ko peetuusyek pogol somok ak tamanwogik sogool: iibe anyun ko uu nooto tengektap kootap Israel.

⁶ Ak kogeny, ye kaiyai chuuto kosulda, iru isyep komostap tai, ak iibe tengektap kootap Judah: peetuusyek artam, peetuut agenge ko po kenyiit agenge, kang'atiin anyun ko uu nooto.

⁷ Ak itokyi togeng'ung' yiemetap Jerusalem, koma tugoot eung'ung'; ak imaotenji.

⁸ Keero, aratenen poroonik, si meweege isyep komosta age, agoi igeesu peetuusyegap yiemeng'ung'.

⁹ Ipchigei anyun kogeny nganuuk, ak baale, ak magandek, ak sogoryek, ak mosong'ik ak kusemet, ak inde tereet agenge, ak ichopchinegei amitwogik; ko uu koitetap peetuusyek che irue isyebe kebeber, chooto peetuusyek pogol somok ak tamanwogik sogool, iame tuguuchooto.

¹⁰ Ak iame amitwogiguk che kigerei, shekelisyek tiptem eng' peetuut; iame chooto kotugul.

¹¹ Ak ee peek che kigerei, iee kigombok aeng' eng' peetuut.

¹² Iame ko uu magatiinik ak baale, ak ibeele ng'atateegap piik kogeerei icheek.

¹³ Ak ki mwa Kamuktaindet ne Toroor kole, amei ko uu nooto piigap Israel magatinikwak ko ng'woneen, eng' pororyosyek ole tuun aoonjini.

¹⁴ Ki amwa anyun ale, “Ee, Kiptaiyat Kamuktaindet ne Toroor! Keero, tomo kimurwon saboondanyu; amu kobooch ko aa ming'in agoi nguno kotom aam kiy ne kameei ineegei, anan ne kabar tyong'in; ama chut kutinnyu panyeek che ng'woneen.”

¹⁵ Yeityo koleenjo anyun, Keero, kaagoonin ng'atateegap tuuga igeere che po piik, ak ichobe magatiniguk chooto.

¹⁶ Ki leenjo kogeny, Ee weeriitap chii, keero, atile amitwogik eng' Jerusalem kong'ering'itu: ak koamei icheek amitwogik che kigerei, che kendoi kot; ak eei peek che kigerei, ak eng' kwong'eet.

¹⁷ Si kobiit korarchi amitwogik ak peek, ak kokwong'ee `age age, ak kochuchuiso eng' tengektonywa.