EZEKIEL 38 - BUKUIT NE TILIIL Sireet ne Dutero Kanon

Koyaei kabookyinet Gog

¹ Ak ki nyoonjo ng'olyootap Kamuktaindet ne Toroor, koleenjo,

² Ee, weeriitap chii, tokyi togeng'ung' Gog, ne po emetap Magog, pounindetap Rosh, Meshek, ak Tubal, ak imaoten agobo ineendet,

³ ileenji, mwaei Kiptaiyat Kamuktaindet ne Toroor kole: Keero, aboryenen, ee Gog, pouinindetap Rosh, Meshek, ak Tubal;

⁴ awelelin, ak ande kombook tagilgiliguk, ak amutun kobooto lugeeng'ung' tugul, paraisisyek ak piik che ketei paraisisyek, kolaachi tugul kariik tugul che po lugeet, lugeet ne oo ne tinyei long'onik che eecheen ak che mengeechen, kotinyei tugul rotoogap chok:

⁵ mi kobooto icheek Persia, Kush, ak Put; kotinyei tugul long'onik ak chepkuloik che po kariik:

⁶ kobooto Gomer ak lugosyekyik tugul; kobooto kootap Togarmah eng' tabanwek che looen che po murot kaataam, ak lugosyekyik tugul: pororyosyek che chaang' che mi kobooten.

⁷ Choboge, ee chopkei, inyee kobooto lugosyeguk tugul che kaiyumjingei, ak iegu kandoindennywa.

⁸ Kibwonjinin ko kagosiirto peetuusyek che chaang': iite eng' kenyiisyek che po let emet ne ki kiweegune rotwetap chok, ne ki kiweech eng' pororyosyek che chaang', eng' tuloonoogap Israel, ne kiga koguber peetuusyek che chaang': ago ki kiweech komong' eng' pororyosyek ak komeng'iis tugul eng' chametapkei.

⁹ Ak itogosu, inyee ko uu usoonet, iige pooldet ne tuchei emet, inyee kobooto lugosyeguk tugul, komi pororyosyek che chaang' kobooten.

¹⁰ Mwaei Kiptaiyat Kamuktaindet ne Toroor kole: Pwonjinin kabwaatutik eng' peetuunooto, ak ibwaat chobutyet ne ya:

¹¹ ak imwa ile, Atogostoi emetap nganasook che ma tinyei irimoik; awendi ole mi icheek che mi eng' kaalyeet, che meng'iisyei eng' chametapkei, meng'iisyei icheek tugul ama tinyei irimoik, ama tinyei temeleiywek anan ormariichok:

¹² si kobiit aluul ak aip parunenik; si kobiit ibar komoswek che ki karatwek che ki menyei nguno, ak obargei ak piik che ki kiyum komang'une pororyosyek, che tinyei tuuga ak tuguuk, che menyei emet kween.

¹³ Teebenen Sheba, ak Dedan, ak chemung'arainigap Tarsis, kobooto ng'etunikyik tugul che neranik, koleenjinin, Tos kenyo iluul? Tos kaiyum lugosyeguk si kobiit iip parunenik? Si kobiit iip fedha ak thahabu, ak ikweri tuuga ak iip tuguuk, iluul luuleet ne oo?

¹⁴ Maoten anyun, ee, weeriitap chii, ak ileenji Gog, Mwaei Kiptaiyat Kamuktaindet ne Toroor kole: Eng' peetuut ye tuun kameng'iis piikyuk Israel eng' chametapkei, ko tos menae?

¹⁵ Ak inyoo eng' oldang'ung' eng' tabanwek che looen che po murot kaataam, komi pororyosyek che chaang' kobooten, kolaanyei tugul paraisisyek, piik che chaang', ak ko lugeet ne kiim:

¹⁶ ak obwa obargei ak piikyuk Israel, ko uu pooldet ne tuchei emet; amutun eng' peetuusyek che po let obwa obargei ak emennyu, si kobiit konaa pororyosyek, ye tuun aegu ne itabaanat eng' inyee, ee Gog, eng' tainnywa.

¹⁷ Mwaei Kiptaiyat Kamuktaindet ne Toroor kole: Tos inyee ne ki amwaite keny eng' otwogikyuk maotigap Israel, che ki maoteni eng' peetuusyechooto eng' kenyiisyek che chaang' kole tuun amutun inyoo obargei ak icheek?

Kiterteeri Gog

¹⁸ Mwaei Kiptaiyat Kamuktaindet ne Toroor kole, ye tuun paregei Gog ak emetap Israel, eng' peetuusyechooto, kobiit nereegekyuk che ng'woneen che mang'une seruunekyuk.

¹⁹ Amu kaamwa eng' ng'etkondanyu ak eng' maatap nereegekyuk, ale, Piitu iman potanet ne oo eng' peetuunooto eng' emetap Israel;

²⁰ kot kobotanso eng' tainnyi njireenigap nyanjet, ak toriitik che po parak, ak tyong'igap timiin, ak tuguuk tugul che ichuutegei ng'wony, kobooto piik tugul che miitei ng'wony, ak kiluul tuloonook, ak kong'isyogen ole keigei, ak koluul irimeet age tugul.

²¹ Ak aguur rotwetap chok kobargei ak ineendet agoi tuloonookyuk tugul, mwaei Kiptaiyat Kamuktaindet ne Toroor: paregei chii tugul ak tupchennyi.

²² Agere kong' ineendet eng' koroito ak korotiik; ak ayookyi ineendet kobooto lugosyekyik, ak piikyik che chaang' che mi kobooto ineendet, ropta ne oo ak koik che eecheen che po ropta, maat ak tuguuk che laldos.

²³ Ak atoroorge, ak atabaangei, ak abartegei eng' taitap pororyosyek che chaang'; si konai icheek kole aa Kamuktaindet ne Toroor.