EZEKIEL 37 - BUKUIT NE TILIIL Sireet ne Dutero Kanon

Atebweet ne nyiitaat kawek che yamyotiin

¹ Ki mi paragunnyu eutap Kamuktaindet ne Toroor, ak ki imuta eng' Kabuusetap Kamuktaindet ne Toroor, ak kotua eng' kwenutap atebweet; ak ki nyiitaat kawek;

² ak ki indoiywa abun komoswek tugul che po kawechooto: ak ogeero, kimi kawek che chaang' atebwonooto; ak ogeero, kiyamyotiin miising':

³ ak ki leenjo, Ee, weeriitap chii, tos, imuuchi kosapcho kowechu? Ak ki awolu ale, Ee Kiptaiyat Kamuktaindet ne Toroor, ingen inyee.

⁴ Ak ki leenjo kogeny, Maotenji kowechu, ak ileenji, Ee, okweek kowechu yamyotiin, ogas ng'olyootap Kamuktaindet ne Toroor.

⁵ Mwachin anyun Kiptaiyat Kamuktaindet ne Toroor kowechu koleenjin: Ogeero, andeok kabuuset, si osapche.

⁶ Andeok inoik ak alaakwok panyeek ak atugenok iriryot, yeityo andeok kabuuset, si osapche; si onai ole aa Kamuktaindet ne Toroor.

⁷ Ki amaoten anyun ko uu ye ki king'ata: ak ye kita amaoteni, kobiit cheet, ak ogeero, ki piit kirgirenet, ak kinamatkei kawek, ak ki namgei kowet ak kowennyi.

⁸ Ak ki ageer, ak ogeero, kiga konam inoik kawechooto, ak ki piit panyeek, ak kotuch iriryot panyechooto: ago ki ma komi kabuuset.

⁹ Koleenjo anyun, Maotenji usoonet, maoten, ee, weeriitap chii, ak ileenji usoonet, Mwaei Kiptaiyat Kamuktaindet ne Toroor kole: Nyoo eng' usoonaik ang'wan, ee kabuuset, ak ibuusyi chu kigebar, si kobiit kosapcho.

¹⁰ Ki amaoten anyun ko uu ye king'ata ineendet, ak ki nyoonji icheek kabuuset, ak kisopcho, ak kotononso eng' keelyekwak, lugeet ne oo miising'.

¹¹ Yeityo, komwaiwo koleenjo, Ee, weeriitap chii, kowechu ko kootap Israel komugul: keero, leen icheek, Ki koyaamyo kawekyok, ak ki kobet kamang'unennyo; ki kigeswech.

¹² Maoten anyun, ak ileenji icheek, Mwaei Kiptaiyat Kamuktaindet ne Toroor kole: Ogeero, ayaate kereeriisyekwok, ak among'wok eng' kereeriisyekwok, ee piikyuk; ak amutwok obwa emetap Israel.

¹³ Ak onai ole aa Kamuktaindet ne Toroor, ye kaayat kereeriisyekwok, ak among'wok eng' kereeriisyekwok, ee piikyuk.

¹⁴ Ak andeok Kabuusennyu, si osapche, ak andeok emeng'wong' si kobiit onai ole anee Kamuktaindet ne Toroor ne kamwae ng'olyoondoniito, ak ayai, mwaei Kamuktaindet ne Toroor.

Kituitoos kogeny Judah ak Israel

¹⁵ Ki nyoonjo kogeny ng'olyootap Kamuktaindet ne Toroor, koleenjo,

¹⁶ Ee, weeriitap chii, nam kirokto agenge, ak isir ile, Po Judah, ak ko po piigap Israel che mi tugul ak ineendet: yeityo inam kirokto age, ak isir ile, Po Joseph, kirokto ne po Ephraim, ak ne po koot komugul ne po Israel kobooto che mi tugul ak ineendet:

¹⁷ ak ituiyechigei kirokwechooto tuwai koek kirokto agenge, si kobiit koek agenge eng' eung'ung'.

¹⁸ Ak ye tuun teebenen lagogap piiguk koleenjin, Tos meboorwech kiit ne ibooru inyee eng' ng'aleechuuto?

¹⁹ Ileenji, Mwaei Kiptaiyat Kamuktaindet ne Toroor kole: Ogeero, aname kirokto ne po Joseph, ne mi eutap Ephraim, kobooto ortinwegap Israel che mi tugul ak ineendet; ak atuiye icheek kobooto kirokto ne po Judah, ak ayae koek kirokto agenge, si koek agenge eng' eunnyu.

²⁰ Ak kotebee eung'ung' eng' tainnywa kirokweek che kesirei.

²¹ Ak ileenji icheek, Mwaei Kiptaiyat Kamuktaindet ne Toroor kole: Ogeero, amutu piigap Israel komong' eng' pororyosyek, ole ki koba, ak ayum icheek eng' komosta agenge tugul, ak amutu icheek kobwa emennywa.

²² Ak ayai icheek koek pororyet agenge eng' emet, eng' tuloonoogap Israel: ak koek laitoryat agenge laitoryannywa eng' icheek tugul: ak ma koegu kogeny pororyosyek aeng', ama kepchei icheek kogeny koek pounatosyek aeng' agoi.

²³ Ama kong'wanitegei kanamonikwak kogeny, anan eng' tuguukwak che samis, anan agot agenge eng' pistaosyekwak: ago asaru icheek eng' oldinwekwak tugul che menyei: ole kiyae tengekto, ak atiliil icheek: egu anyun piikyuk, ak aegu Kamuktaindennywa.

²⁴ Ak koek otwogindennyu Daudi laitoryannywa; ak konyoor icheek tugul mestowot agenge: ak kobendatee kirwoogutikyuk ak koriip ng'atuutikyuk ak koyai.

²⁵ Ak komeny emet ne ki agoochi Jakobo otwogindennyu, ole ki menyei kwanisyekwok; ak komeny olooto icheeget, kobooto lagokwak, ak lagogap lagokwak, agoi koigeny: ak koek Daudi otwogindennyu, pounindennywa koigeny.

²⁶ Ak kiyomiske ak icheek kogeny eng' kayomiset ne po kaalyeet: egu eng' icheek kayomiset ne wendi agoi koigeny: ak alumde icheek, ak ates, ande oldanyu ne tiliil kwenunnywa agoi koigeny.

²⁷ Tebyei agine emainnyu kobooto icheek; ak aegu Kamuktaindennywa, ak koek icheek piikyuk.

²⁸ Ak konai pororyosyek kole aa Kamuktaindet ne Toroor ne atabaani Israel, ye tuun tebee oldanyu ne tiliil kwenunnywa koigeny.