EZEKIEL 36 - BUKUIT NE TILIIL Sireet ne Dutero Kanon

Kaberuuret ne ityin Israel

¹ Ee inyee, weeriitap chii, maotenji tuloonoogap Israel, ileenji ogas ng'olyootap Kamuktaindet ne Toroor, okweek tuloonoogap Israel.

² Mwaei Kiptaiyat Kamuktaindet ne Toroor kole: Amu ki komwa puunyoot agobo okweek, kole, haa! Ak kole kagobunjech komoswek che torooreen che po keny:

³ maoten anyun, ile, Mwaei Kiptaiyat Kamuktaindet ne Toroor kole: Amu nganda ki koyaak icheek oegu ponoon, ak koluguak eng' komosta age tugul, si kobiit obunji pororyosyek che ng'etunotiin, ak kigochaamatak piik, ak komwaetaenak tuguuk che yaach:

⁴ ogas anyun ng'olyootap Kiptaiyat Kamuktaindet ne Toroor, okweek tuloonoogap Israel; Mwachin Kiptaiyat Kamuktaindet ne Toroor tuloonook che eecheen ak che mengeechen, kobooto kereruusyek, ak atebwosyek ak komoswek che karatwek ak nganasook che kigemeto, che ki koek luulenik ak che rorechin pororyosyek che ng'etunotiin eng' komoswek tugul:

⁵ mwaei anyun Kiptaiyat Kamuktaindet ne Toroor kole: Ki amwa iman eng' maatap ng'etkondanyu agobo pororyosyek che ng'etunotiin, ak agobo Edom tugul, che kiityigei emennyu kole kobunji eng' poiboiyetap mugulelwekwak tugul, eng' koroomnatetap saboondo, si kogoito keluul:

⁶ maoten anyun agobo emetap Israel, ak ileenji tuloonook che eecheen ak che mengeechen, kobooto kereruusyek, ak atebwosyek, ileenji, mwaei Kiptaiyat Kamuktaindet ne Toroor kole: Ogeero, ki amwa eng' ng'etkondanyu ak nereegekyuk che ng'woneen, amu ki ogesen kalilanetap pororyosyek.

⁷ Mwaei anyun Kiptaiyat Kamuktaindet ne Toroor kole: Ki achuul eunnyu, amwa ale, Ibei kalilanennywa pororyosyek che mi komoswekwok.

⁸ Ago ing'atos mooriikwok, ee okweek tuloonoogap Israel; ak oiichi logoekwok piikyuk Israel; amu neegit kobwa.

⁹ Amu, ogeero, ami komostang'wong', ak aweekyoge, si kibatak, kegolak:

¹⁰ ak ateswok piik, koot komugul ne po Israel, koot tugul: ak kemeny nganasook, ak keteech karatwek:

¹¹ ak ateswok piik ak tyong'ik; ak kotesak ak koiiyo: ak kemenyok ko uu peetuusyekwok che po tai, ak ayaiywok ne myee kosiir eng' tai: si onai ole aa Kamuktaindet ne Toroor.

¹² Ee, agoochini piik kobendatenak, chooto piikyuk Israel; ak konamin icheek ibunji ak iegu porotennywa, ama ibare lagokwak kogeny.

¹³ Mwaei Kiptaiyat Kamuktaindet ne Toroor kole: Amu mwaiwok koleenjinok, ii amindetap piik, inyee emoni, ak ki iegu ne ibare pororyeng'ung';

¹⁴ ma iame anyun piik kogeny, ama ibare pororyeng'ung' kogeny, mwaei Kiptaiyat Kamuktaindet ne Toroor;

¹⁵ ama achamun igas kogeny kalilanetap pororyosyek, ama igeseni teweernatetap pororyosyek kogeny, ama inach pororyeng'ung' kogeny, mwaei Kiptaiyat Kamuktaindet ne Toroor.

Pireet ne ki nyoonji Israel

¹⁶ Ki nyoonjo kogeny ng'olyootap Kamuktaindet ne Toroor, koleenjo,

¹⁷ Ee, weeriitap chii, ye ki menyei kootap Israel emennywa, ko ki ing'wanit emonooto eng' ortinwekwak ak eng' poisyonikwak: ki uu ortinwekwak eng' tainnyu simwegap kwondo eng' peetuusyekyik che po arawet.

¹⁸ Ki aroong'ji anyun nereegekyuk che ng'woneen amu korotiik che kiga kotumji emet, ak kiga kong'wanit emonooto eng' kanamonikwak:

¹⁹ ak ki aseerchi icheek pororyosyek, ak ki kiyestoochi emotinwek: ki arwookyi icheek ko uu ortinwekwak ak ko uu poisyonikwak.

²⁰ Ak kingo it ye mi pororyosyek ole ki pa, ko ki imurwon kainennyu ne tiliil; amu ki mwa piik agobo icheek kole pichu ko piigap Kamuktaindet ne Toroor, ak ki koba eng' emennyi.

²¹ Ago ki ariiree kainennyu ne tiliil, ne ki komurwon kootap Israel eng' pororyosyek, ole ki pa.

²² Mwachi anyun kootap Israel ileenji, mwaei Kiptaiyat Kamuktaindet ne Toroor kole: Ma yae niito agobo okweek ee kootap Israel, ago ayae agobo kainennyu ne tiliil, ne ki omurwon eng' pororyosyek che ki obe.

²³ Ak atabaan kainennyu ne oo ne ki kimurwon eng' kwenunnywa; si konai pororyosyek kole aa Kamuktaindet ne Toroor, mwaei Kiptaiyat Kamuktaindet ne Toroor, ye aegu ne kitabaanat eng' okweek eng' tainnywa.

²⁴ Amu amutwok omang'une pororyosyek, ak ayumak omong'u eng' emotinwek tugul, ak amutwak obwa emeng'wong'.

²⁵ Ak abisenok peek che tiliileen, si otiliiliitu: ak aundawok simdang'wong' tugul, ak kanamonikwok tugul.

²⁶ Agoonok kogeny muguleldo ne leel, ak andeok sabeet ne leel: ak aiste muguleldo ne uu koita eng' poorwekwok, ak agoonok muguleldo ne po panyeek.

²⁷ Ak andeok Kabuusennyu, ak agoonok obendate ng'atuutikyuk, ak oriip kirwoogutikyuk ak oyai.

²⁸ Ak omeny emet ne ki agoochi kwanisyekwok; ak oegu piikyuk, ak aegu Kamuktaindeng'wong'.

²⁹ Ak asarwok eng' simwekwok tugul: ak aguur peek si ates, ama agoonok rubeet kogeny.

³⁰ Ak ates iyoteetap logoek, ak ruroteetap mbareet, si mata kochotak pororyosyek amu rubeet.

³¹ Yeityo obwaat anyun ortinwekwok che yaach, ak poisyonikwok che ki ma ko myachen; ak osaske okweegei eng' taing'wong' amu tengekwogikwok ak amu tuguukwok che kiwechei.

³² Ma yae niito amu okweek, mwaei Kiptaiyat Kamuktaindet ne Toroor, ingonaak ng'olyoondoni eng' okweek: olilanse, ak otoptobense amu ortinwekwok, ee kootap Israel.

³³ Mwaei Kiptaiyat Kamuktaindet ne Toroor kole: Agoochini kemeny nganasook kogeny, ak keteech karatwek, eng' peetuut ne aundawok tengekwogikwok tugul.

³⁴ Ak kibat emet ne kiga koguber agot nganda kiga koguber kogeerei tugul che kisiirtoi.

³⁵ Ak tuun mwaei kole, kaigei emoni kiga koguber, mbareetap Eden; ak kageng'ot ak kemeny nganasook che kiga koek karatwek, ak koguber, ak kong'emak.

³⁶ Konai anyun pororyosyek che ng'etunotiin eng' komoswekwok, kole, koateeche anee Kamuktaindet ne Toroor komoswechuuto kiga kobutok, ak agool ole kiga koguber: kamwae anee Kamuktaindet ne Toroor, ak ayae.

³⁷ Mwaei Kiptaiyat Kamuktaindet ne Toroor kole: Teepsena anyun kootap Israel agobo niito, si kobiit ayachi; atesyini icheek piik kochang'a ko uu akweetap keechiirek.

³⁸ Ko uu akweetap keechiirek che egu tiseiywek, ko uu akweetap keechiiregap Jerusalem eng' peetuusyekyik che po igoorwek che ki king'at; kinyiiti ko uu nooto nganasook che kiga koek karatwek eng' tuiyosyegap piik: si konai icheek kole aa Kamuktaindet ne Toroor.