EZEKIEL 35 - BUKUIT NE TILIIL Sireet ne Dutero Kanon

Maonateet agobo tulweetap Seir

¹ Ki nyoonjo kogeny ng'olyootap Kamuktaindet ne Toroor koleenjo,

² Ee, weeriitap chii, tokyi togeng'ung' tulweetap Seir, ak imaotenji,

³ ileenji, mwaei Kiptaiyat Kamuktaindet ne Toroor kole: Keero, aboryenen, ee tulweetap Seir, ak atokyinin eunnyu, ak ayain iguber ak iegu ne kikwong'ee.

⁴ Abute nganasoguk, ak iegu karaatya; si inai ile aa Kamuktaindet ne Toroor.

⁵ Amu itinye puunyoondit ne po kotugul, ak ki igoite piigap Israel kebar eng' kimnateetap rotwetap chok eng' peetuutap nyalildanywa, eng' peetuusyegap yaityet ne po let:

⁶ mwaei anyun Kiptaiyat Kamuktaindet ne Toroor kole, ko uu ye asabe, achopchinin korotiik, ak kosubun korotiik: amu ma iwech korotiik, kosubin anyun korotiik.

⁷ Ayae anyun ko uu nooto tulweetap Seir koek ne kikwong'ee ak koguber; ak ageesu ineendet ne punei tulwoonooto, ak ineendet ne weegegei yooto.

⁸ Ak anyiit tuloonookyik piikyik che kigebar: ak kobutyo icheek che kigebar eng' rotwetap chok eng' tuloonooguk ak eng' atebwosyeguk ak eng' kererusyeguk.

⁹ Ayain iguber agoi, ama kemenyei nganasoguk: si onai ole aa Kamuktaindet ne Toroor.

¹⁰ Amu ki imwa ile, Egu chechuuk pororyosyechu aeng'u ak emotinwechu aeng' ak kenam kobunjech; ago ki mi Kamuktaindet ne Toroor olooto:

¹¹ mwaei anyun Kiptaiyat Kamuktaindet ne Toroor kole, ko uu ye asabe, ayae ko uu nereegeguk, ak ko uu ng'etkondang'ung' ne ki ibooru iweche icheek; ak aboorugei eng' kwenunnywa, ye tuun arwoogun.

¹² Ak inai ile anee Kamuktaindet ne Toroor ne ki agas chubisyosyeguk tugul che ki imwa agobo tuloonoogap Israel, ile, Kigeyai koguber, kigegoonech keam.

¹³ Ak ki ochounenage eng' kutusweekwok, ak ki otes ng'aleekwok agobo anee: ki agas ng'olyoondonooto.

¹⁴ Mwaei anyun Kiptaiyat Kamuktaindet ne Toroor kole: Ye tuun paibait ng'wony komugul, ayain iguber.

¹⁵ Ko uu ye ki ibaibaitune poroteetap kootap Israel, amu kiguber, ayaun ko uu nooto: iguberi, ee, inyee tulweetap Seir, ak Edom komugul, komosato tugul; si konai icheek kole aa Kamuktaindet ne Toroor.