EZEKIEL 34 - BUKUIT NE TILIIL Sireet ne Dutero Kanon

Mestowegap Israel che po lembech

¹ Ki nyoonjo ng'olyootap Kamuktaindet ne Toroor koleenjo,

² Ee, weeriitap chii, maoten agobo mestowegap Israel, maoten, ak ileenji mestowechooto, Mwaei Kiptaiyat Kamuktaindet ne Toroor kole: Pwo! Mestowegap Israel che paegei amitwogik icheegei! Tos ma nyooljin mestoweek kobai keechiirek?

³ Oame che akwaen, ak olaachi koroorigap keechiirek, oenye che akwaen; ago mobae keechiirek.

⁴ Ma ogimiit che nyalulyotin, ama onyaa che myandos, ama orop ne kigoil, ama oweech kogeny ne kigeon, ama ocheeng' ne ki kobet: ago ki obou eng' kimnateet ak eng' koroomnateet.

⁵ Kiyesta amu ki ma komi mestowot: ak ki ek amitwogigap tugul che po timiin, ak kiyesta.

⁶ Ki ombenioti keechiirekyuk eng' tuloonook tugul, ak eng' tulweet age tugul ne kooi: ee, kiyesta keechiirekyuk koyom ng'wony tugul; ak ki ma komi chii ne ki cheeng'at anan kosubot icheek.

⁷ Ogas anyun ng'olyootap Kamuktaindet ne Toroor, okweek mestoweek;

⁸ Ko uu ye asabe, mwaei Kiptaiyat Kamuktaindet ne Toroor, amu iman ko uu ye kigeluul keechiirekyuk, ak koek keechiirekyuk amitwogigap tyong'ik tugul che po timiin, amu ki ma komi mestowot, ama cheeng'at mestowekyuk keechiirekyuk, ago kibaegei mestoweek amitwogik icheegei, ama pai keechiirekyuk;

⁹ ogas anyun ng'olyootap Kamuktaindet ne Toroor, okweek mestoweek;

¹⁰ Mwaei Kiptaiyat Kamuktaindet ne Toroor kole: Ogeero, aborye mestoweek; ak amage eunekwak keechiirekyuk, ak aeete icheek kobai keechiirek; ama kobaegei mestoweek amitwogik kogeny; ak asaru keechiirekyuk eng' kutusweekwak, si ma ek amitwogikwak.

Kamuktaindet, Mestowot ne myee

¹¹ Amu mwaei Kiptaiyat Kamuktaindet ne Toroor kole: Ogeero, anee, aneendet ne acheeng'oti keechiirekyuk, ak asuboti icheek.

¹² Ko uu ye cheeng'ei mestowot akweennyi eng' peetuut ne mi kwenutap keechiirekyik che ki kiiyesta, acheeng'e ko uu nooto keechiirekyuk; ak asaru icheek komong' eng' komoswek tugul ole kiga kiyestoochi eng' peetuutap poolik ak tulugenet ne imen.

¹³ Ak amutu komong' eng' pororyosyek, ak ayumu eng' emotinwek, ak amutu kobwa emennywa; ak abai icheek eng' tuloonoogap Israel, eng' ole neegitee kereruusyek, ak eng' komoswek tugul che ki menyei eng' emonooto.

¹⁴ Ayage icheek ole mi susweek che myach, ak kotebee piunywa tuloonoogap komoswek che torooreen che po Israel: ruitos eng' olooto eng' piut ne myee, ak koagete ole pitat eng' tuloonoogap Israel.

¹⁵ Anee ne abae keechiirekyuk, ak agoochi koruiyo, mwaei Kiptaiyat Kamuktaindet ne Toroor.

¹⁶ Acheeng'e ne ki pet, ak amutu kogeny ne ki kioon, ak arop ne ki il, ak agimiit ne kimyani: ak abar ne neraat kobooto ne kiim: abae icheek kirwooget.

¹⁷ Ago ee okweek, akweennyu, mwaei Kiptaiyat Kamuktaindet ne Toroor kole: Ogeero, arwookyini artet eng' artet, kobooto mengichik ak kwesik.

¹⁸ Tos kiit ne ming'in eng' okweek obaegei tuguuk che myach, yeityo otyekyi ng'wony che ki ng'at eng' ole oagete? Ak oee peek che tiliileen, yeityo oturur eng' keelyekwok che kang'et?

¹⁹ Ago amei keechiirekyuk che ki otyech, ak koe che ki oturur eng' keelyekwok.

²⁰ Mwachin anyun Kiptaiyat `Kamuktaindet ne Toroor icheek ko uu ni koleenji: Ogeero, arwookyini aneendet artet ne neraat eng' artet ne sagitat.

²¹ Amu ki otoortaisye karaaswekwok ak tigigoikwok, ak otoore kuinoikwok tugul che ki myandos, kot oseer koba oldo tugul;

²² asaru anyun keechiirekyuk, ma koegu che kiluulei kogeny; ak arwookyi artet eng' artet.

²³ Ak ande mestowot agenge koyaga icheek, ak kobai icheek, nooto ko otwogindennyu Daudi; paei ineendet icheek, ak koek mestowonnywa.

²⁴ Ak aegu anee Kamuktaindet ne Toroor Kamuktaindennywa, ak koek Daudi otwogindennyu, pounindet eng' kwenunnywa; kamwae anee Kamuktaindet ne Toroor ng'olyoondoniito.

²⁵ Ak kiyomiskei ak icheek eng' kayomiset ne po kaalyeet, ak ageesu tyong'ik che yaach eng' emet: ak komeny surkwen eng' chametapkei, ak koruiyo osnosyek.

²⁶ Ak ayai icheek koek kaberuret kobooto komoswek ole neegitee tulweennyu; ak ang'at ropta koroobon eng' peetuusyekyik; ak kobiit roptap kaberuret.

²⁷ Ak kooi logoek keetitap mbar, ak korur emet, ak kotebee chametapkei eng' emennywa; ak konai kole aa Kamuktaindet ne Toroor, ye tuun airii keetiigap choginnywa, ko kaasaru icheek komong' eng' eutap piik che ki yai icheek koek otwogikwak.

²⁸ Ama koegu kogeny che luulei pororyosyek, ama koamei tyony ne po ng'wony icheek; ago meng'iisyei eng' chametapkei, ama kobiitu chii ne imui.

²⁹ Ak achopchi icheek mbareet ne tagunoot, ama kobarei rubeet icheek eng' emet, ama koiboti kalilanet ne punu pororyosyek.

³⁰ Si konai kole ami anee Kamuktaindet ne Toroor Kamuktaindennywa kobooto icheek, ak konai icheek kole kootap Israel ko piikyuk, mwaei Kiptaiyat Kamuktaindet ne Toroor.

³¹ Ak okweek, keechiirekyuk, che oo keechiiregap akweennyu, ko oo piik, ak aa Kamuktaindeng'wong', mwaei Kiptaiyat Kamuktaindet ne Toroor.