EZEKIEL 33 - BUKUIT NE TILIIL Sireet ne Dutero Kanon

Poisyetap Riibindet

¹ Ki nyoonjo ng'olyootap Kamuktaindet ne Toroor, koleenjo,

² Ee, weeriitap chii, ng'alaalji lagogap piiguk, ileenji, ye aipchi emet rotwetap chok, ngot kolewen piigap emonooto chiito eng' kwenunnywa, ak konde koek riibindennywa:

³ ak ngo keer ineendet rotwetap chok konyonjin emonooto, koguut iryageet ak koteechi piik;

⁴ age tugul anyun ne kasei iryageet, ama iit kateunet, ngot konyo rotwetap chok ak kobar ineendet, kotebee korotiikyik metinnyi.

⁵ Ki kas ineendet iryageet, ama iit kateunet, tebee anyun korotiikyik ineendet: amu nda kiga iit kateunet, ta kiga kosar saboondanyi.

⁶ Ago ngot kogeer riibindet konyonei rotwetap chok, ama kuut iryageet, ama kiteechi piik, ak konyo rotwetap chok, ak kobar chii age tugul eng' kwenunnywa; kebare amu tengektanyi, ago amage korotiikyik eutap riibindet.

⁷ Ee anyun, inyee, weeriitap chii, kaandein iegu riibindet eng' kootap Israel; kas anyun ng'olyoot ne amwae, ak iipchi icheek kateunennyu.

⁸ Ye aleenji kiptengekyot, Ee, kiptengekyondoni, imee iman, ameteechi kiptengekyondonooto kometo ooreennyi; komeei kiptengekyondonooto amu tengektanyi, ago amage korotiikyik eung'ung'.

⁹ Ago, ngot iteechi kiptengekyot agobo ooreennyi, si koweek kometo oranooto, ama meto ooreennyi, komeei ineendet amu tengektanyi, ago kaisaru saboondang'ung'.

Po iman Kirwoogetap Kamuktaindet

¹⁰ Ee inyee, weeriitap chii, mwachi kootap Israel ileenji, omwae ko uu ni ole: “Kanamech pistaosyekyok ak tengekwogikyok, ak kichuchui amu chooto; kimuktoi ano anyun kesapche?”

¹¹ Mwachi icheek ileenji, ko uu ye asabe, mwaei Kiptaiyat Kamuktaindet ne Toroor, koma paibaitune meetap kiptengekyot; ago abaibai ngo week kiptengekyot kometo ooreennyi, ak kosap: oweege, oweege, omete ortinwekwok che yaach; amu nee si obegu, ee kootap Israel?

¹² Ee, inyee weeriitap chii, mwachi lagogap piiguk, ileenji, ma saru chiito ne po iman imanda eng' peetuutap pistoennyi; ago ma namei kiptengekyot tengekto eng' peetuut ne kaweek kometo tengektanyi: amaimuuchi kosap ineendet ne po iman eng' imandanyi eng' peetuut ne yaei tengekto.

¹³ Ye aleenji ne po iman, isabe iman; ngot komong' imandanyi, yeityo koyai tengekto, koma kibwaati agot agenge eng' poisyonikyik che po imanda; ago meei amu tengektanyi ne ki yai.

¹⁴ Kogeny, ye aleenji kiptengekyot, Imee iman; ngot koweek kometo tengektanyi; ak koyai kiit ne po iman ak ko litit;

¹⁵ ngot koweekta kiptengekyot kiit ne kiname pesendo, ak koweekta kogeny kiit ne kirebei, ak kowendote ng'atuutigap saboondo, amata koyai tengekto; kosabei iman ineendet, ma meei.

¹⁶ Ma kiityin ineendet agot agenge eng' tengekwogikyik che ki koyai: ki koyai ineendet kiit ne po iman ak ko litit; sabei iman.

¹⁷ Ago mwaei lagogap piiguk kole, ma po iman ooreetap Kiptaiyat: ago eng' icheek koma po iman ooreennywa.

¹⁸ Ye week ne po iman kometo imandanyi, ak koyai tengekto, komeei eng' tengegoto.

¹⁹ Ak ye week kiptengekyot kometo tengektanyi, ak koyai kiit ne po iman ak ko litit, kosabei ineendet eng' nooto.

²⁰ Ago omwae ole, Ma po iman ooreetap Kiptaiyat. Ee kootap Israel, arwookyini age tugul eng' okweek ko uu ortinwekyik.

Kabutetap Jerusalem

²¹ Ki nyoonjo chiito age ne kiga chilil komong' eng' Jerusalem, ki nyo eng' kenyiit ne po taman ak aeng', kobooch ngap keluulech, eng' arawetap taman, eng' peetuut ne po muut ne po arawanooto, koleenjo, Kagebar nganaseet.

²² Ki mi anyun eutap Kamuktaindet ne Toroor paragunnyu koskoleny, kotomo koit ineendet ne kichilili; ak kiga kogoono Kamuktaindet ne Toroor ang'alaal, ye kingo itu chiichooto karon ole ki ami, ak ki ang'alaal, ki mata konamaga kuut.

Piik che ki ng'et eng' Judah

²³ Ak ki nyoonjo ng'olyootap Kamuktaindet ne Toroor, koleenjo,

²⁴ Ee, weeriitap chii, mwaei icheek che menyei komoswek che karatwek eng' emetap Israel, kole, ki chiichak Abraham, ak ki punji emet: ago ki chaang' acheek; ki kigoonech emet kobunjech.

²⁵ Mwachi anyun icheek ileenji, mwaei Kiptaiyat Kamuktaindet ne Toroor ko uu ni kole: Oame panyeek kobooto korotiik, ak otokyini konyekwok kanamonikwok, ak otumdoi korotiik: tos oname emet kobunjook?

²⁶ Otiegei rotonikwok po chok, oyae kiit ne kiwechei, ak ing'waniti age tugul eng' okweek osotyotap chiitap kokwennyi: tos oname emet kobunjook?

²⁷ Mwachi anyun pichooto ko uu ni ileenji, mwaei Kiptaiyat Kamuktaindet ne Toroor kole: Ko uu ye asabe, ki pare iman rotwetap chok icheek che mi komoswek che karatwek, ak agoochini koam tyong'ik ineendet ne mi kewanin, ak kobar koroito icheek che mi irimoik ak che mi kebenonik.

²⁸ Ak ayae emet koguber ak koek ne kikwong'ee, ak kogeskei menoteetap kimnateennyi; ak koek surkwen tuloonoogap Israel, kot koma kobunei chii.

²⁹ Yeityo konai icheek kole aa Kamuktaindet ne Toroor, ye kaayai emet koguber ak koek ne kikwong'ee, amu tuguukwak tugul che kiwechei che ki koyai.

Kasetap ng'aleek ak kinde poisyonik

³⁰ Ee, inyee weeriitap chii, ng'alaali agobo inyee lagogap piiguk eng' ole neegitee irimoik, ak eng' kurgotigap kooriik, ak kong'alaaljin `age age, ng'alaaljin chii tugul tupchennyi, koleenjin, Asoomin ale, nyoo keebe kegas ng'olyoot ne punu Kamuktaindet ne Toroor.

³¹ Ak kobwonjin ko uu ye pwoonei piik, ak kotep ng'wony eng' taing'ung' ko uu piikyuk, ak kogas icheek ng'aleeguk, ago ma yaei: amu iboortoi chamyet ne oo eng' ng'aleekwak, ago isubi mugulelwekwak kelunennywa.

³² Keer anyuno, iuu eng' icheek tyendo ne karaaran miising', ne tinyei cheet ne anyiny, ne putindet: amu kasei icheek ng'aleeguk, ago ma yaei.

³³ Ak ye piit kioto, (keero, nyoonei,) konai anyun kole kimi maotyot kwenunnywa.