EZEKIEL 32 - BUKUIT NE TILIIL Sireet ne Dutero Kanon

Riirek agobo Pharaoh ak Misiri

¹ Ki nyoonjo ng'olyootap Kamuktaindet ne Toroor eng' kenyiit ne po taman ak aeng', eng' arawetap taman ak aeng', eng' peetuut ne po tai ne po arawanooto, koleenjo,

² Ee, weeriitap chii, riir agobo Pharaoh laitoryatap Misiri, ak ileenji, Kiga kirogenen ng'etundo ne neran ne po pororyosyek: ago iuu maswetit eng' nyanjosyek; imong'u kobooto ainoosyeguk, ak iwase peek eng' keelyeguk, ak isamisi ainoosyekwak.

³ Mwaei Kiptaiyat Kamuktaindet ne Toroor kole: Aiitoi regereiywondennyu atugenen kobooto tuiyet ne po pororyosyek che chaang'; si komutunenen regereiywondennyu itogosu.

⁴ Si ametochin emet, awirchinin kewanin, ak agoochi toriitik tugul che po parak kotebenen, ak agoochi tyong'ik che po ng'wony komugul kobiyong'enen.

⁵ Ak ande poortang'ung' tuloonook parak, ak anyiit atebwosyek koindong'ung'.

⁶ Ak abise korotiguk emet ne ibire peek, agoi tuloonook; ak inyi kereruusyek.

⁷ Ak ye tuun ageesun atuch kipsengwet, ak ayae kecheikyik koimenitu; atuge pooldet asiista, ama kooluu arawet.

⁸ Ayae lapkeiyosyek tugul che po kipsengwet che iluu miising' koimenitu eng' paragung'ung', ak ande mesundeito emeng'ung', mwaei Kiptaiyat Kamuktaindet ne Toroor.

⁹ Agoochini mugulelwegap pororyosyek che chaang' konereekso, ye tuun aibun ng'emisyeng'ung' eng' kwenutap pororyosyek, konyo emotinwek che kitom inai.

¹⁰ Ee, agoochini pororyosyek che chaang' kokwong'enen, ak koiyweis miising' laitorinikwak agobo inyee, ye tuun abarbar rotwennyu po chok eng' tainnywa; ak kobotanso eng' sait age tugul, kobotan chii tugul agobo saboondanyi, eng' peetuutap kabuteng'ung'.

¹¹ Amu mwaei Kiptaiyat Kamuktaindet ne Toroor kole: Nyonjinin rotwetap chok ne po laitoryatap Babilon.

¹² Agoochini kobek piiguk che chaang' eng' rotoogap chok, che po piik che nyigoonen; icheek tugul ko che iywei pororyosyek: ak kong'em icheek menoteetap Misiri, ak kobek piikyik tugul che chaang'.

¹³ Abare kogeny tyong'ikyik tugul che mi ole neegitee peek che chaang'; ama kotyechei peek che chaang'; ama kotyechei chii kogeny peechooto, anan kotyech tyong'ik.

¹⁴ Atiliilii anyun peekwak, agoochini koroot ainoosyekwak ko uu mwanik, mwaei Kiptaiyat Kamuktaindet ne Toroor.

¹⁵ Ye tuun ayai emetap Misiri koguber ak koek karaatya, emet ne ma komi tuguuk che ki nyiitaat, ye abar tugul che menyei olooto, konai anyun kole aa Kamuktaindet ne Toroor.

¹⁶ Chuuto ko riirek che tuun riirtos icheek; tuun riirtos tiibiigap pororyosyek eng' rirechooto: riirtos agobo Misiri, ak agobo piikyik tugul che chaang', mwaei Kiptaiyat Kamuktaindet ne Toroor.

Pendi Misiri ye mi che ki kobek

¹⁷ Ki nyoonjo ng'olyootap Kamuktaindet ne Toroor eng' kenyiit ne po taman ak aeng', eng' peetuutap taman ak muut ne po arawanooto, koleenjo,

¹⁸ Ee, weeriitap chii, riirchi piik che chaang' che po Misiri, ak itimde icheek, ineendet ak tiibiigap pororyosyek che taagunotiin, koba ng'wony oriit, kobooto icheek che choorchingei keriinget.

¹⁹ Isiire ng'oo eng' korooronindo? Chortegei, ui iru kobooto che ma kimuratan.

²⁰ Ibutyin kwenutap che ki kebare rotwetap chok. Ki koitoi Misiri kebaree rotwetap chok; ichuut ineendet koistogei kobooto piikyik tugul che chaang'.

²¹ Ng'alaaljin piik che kiimeen eng' che nyigoonen ineendet, eng' kwenutap ye mi che ki kobek, komi kobooto che toreti ineendet: kigochoortagei, siistos, agot che ma kimuratan, che ki kibare rotwetap chok.

²² Mi Ashur olooto kobooto kweanennyi tugul; mi kereeriisyekyik komoswekyik tugul: che ki kibare rotwetap chok:

²³ che ki kinde kereeriisyekwak komoswek che po oriit che po keriinget, ak mi kweanennyi komoswek tugul che po kererinnyi: ki kibar tugul, ki kibare rotwetap chok, che ki yai kamuiset eng' emetap piik che saptos.

²⁴ Mi Elam olooto ak piikyik tugul che chaang' eng' komoswek tugul che po kererinnyi: ki kibar icheek tugul eng' rotwetap chok, che ki kochoortagei koma kimuratan, koba agoi ng'wony oriit, che ki yai kamuiset eng' emetap piik che saptos, ak ki kogesen kalilanennywa kobooto icheeget che choorchingei keriinget.

²⁵ Ki kochopchi ineendet itoogut eng' kwenutap che ki kibar, kobooto piikyik tugul che chaang'; mi kereeriisyekyik komoswekyik tugul: ki ma kimuratan icheek tugul, ki kibare rotwetap chok; amu kiyaak kamuisennywa eng' emetap piik che saptos, ak ki kogesen kalilanennywa kobooto icheeget che choorchingei keriinget: ki kinde ineendet kwenutap icheek che kigebar.

²⁶ Mi olooto Meshek, Tubal, ak piikyik tugul che chaang'; mi kereeriisyekyik komoswekyik tugul; ki ma kimuratan icheek tugul, ki kibare rotwetap chok; amu ki yai kamuisennywa eng' emetap piik che saptos.

²⁷ Ak maruitos kobooto piik che nyigoonen che ki pek che po che ma kimuratan, che kichoorchigei ye mi che ki kobek koibei kariikwak che po lugeet, ak kitiie metowekwak rotonikwak po chok, ak mi tengekwogikwak kawekwak; amu icheek ko ki kamuiset ne po piik che nyigoonen eng' emetap piik che saptos.

²⁸ Ago kitonatonin eng' kwenutap che ma kimuratan, ak oruitosi kobooto icheeget che ki kibare rotwetap chok.

²⁹ Mi Edom olooto, kobooto laitorinikyik ak pounikyik tugul, che ruitos eng' kimnateennywa kobooto icheek che ki kibare rotwetap chok: ruitos kobooto che ma kimuratan, ak icheeget che choorchingei keriinget.

³⁰ Mi olooto pounigap murot kaataam, icheek tugul, ak Sidonik tugul, che kichoortagei kobooto che ki kibar; ililandos icheek eng' kamuiset ne ki piitune kimnateennywa; ak ruitos ama kimuratan kobooto che ki kibare rotwetap chok, ak kogesen kalilanennywa kobooto icheek che choorchingei keriinget.

³¹ Keerei Pharaoh icheek, ak kogaigaigei amu piikyik tugul che chaang' che ki kibare rotwetap chok; Pharaoh ak lugeennyi komugul, mwaei Kiptaiyat Kamuktaindet ne Toroor.

³² Amu kande kamuisennyi emetap piik che saptos: ak kinde ineendet kwenutap che ma kimuratan, kobooto icheek che ki kibare rotwetap chok, Pharaoh, kobooto piikyik tugul che chaang', mwaei Kiptaiyat Kamuktaindet ne Toroor.