EZEKIEL 31 - BUKUIT NE TILIIL Sireet ne Dutero Kanon

Kitechin Pharaoh

¹ Ki nyoonjo ng'olyootap Kamuktaindet ne Toroor eng' kenyiit ne po taman ak agenge, eng' arawetap somok, eng' peetuutap tai ne po arawanooto, koleenjo,

² Ee, weeriitap chii, mwachi Pharaoh laitoryatap Misiri ak piikyik che chaang' ng'olyoondoni ileenji: Ogerge ak ng'oo eng' etunateng'ung'?

³ Keero, kitarakwet Assyrianindet eng' Lebanon ne tinyei mooriik che korooron, kisamum, ak ko kooi; ak ki itei walinnyi poolik.

⁴ Kibai peek ineendet, ki ibit rireet: ki root ainoosyekyik koba komoswek tugul eng' mbareennyi; ak kirootyi peekyik keetiik tugul che po mbareet.

⁵ Kitororit anyun koindonyi kosiir keetiik tugul che po mbar; ak kitesagis mooriikyik, ak kogoeegitu mooriikyik amu peek che chaang', ye kingo ywaakta.

⁶ Ki teech toriitik tugul kesonokwak eng' mooriigap keetoto, ak koiichi tyong'ik tugul che po emet kelutap keetoto, ak kiuure pororyosyek tugul che eecheen.

⁷ Ki karaaran anyun eng' etunatennyi, eng' kooindap mooriikyik: amu kineegite tigitikyik peek che chaang'.

⁸ Ma imuuch taragonik che ki mi mbareetap Kamuktaindet kouny ineendet: ki ma ko kergei piribirinik ak mooriikyik; ak ki ma ko kergei keetiik che uu kurinik ak mooriikyik; ak ki ma komi keetit age tugul eng' mbareetap Kamuktaindet ne kergei ak ineendet eng' karaaranindanyi.

⁹ Ki ayai ineendet kogararanit eng' chaang'indap mooriikyik: kot koam ng'etkong' keetiik tugul che po Eden, che ki mi mbareetap Kamuktaindet.

¹⁰ Kamwa anyun Kiptaiyat Kamuktaindet ne Toroor kole: Amu kiitoroorge eng' koindong'ung', ak ki itei walinnyi poolik, ak kitororit muguleldanyi amu koindonyi;

¹¹ andoi ineendet eutap chiito ne kiim ne po pororyosyek; irwookyin iman: ki aoon amu yaityennyi.

¹² Kigoep ineendet toek che kiywei che po pororyosyek ak kometo: ki kobutyo mooriikyik eng' tuloonook ak eng' atebwosyek tugul, ak kigoilyo mooriikyik eng' kereruusyek tugul che po emet; ak ki koba pororyosyek tugul che po ng'wony kobagaakta urwennyi, ak kometo ineendet.

¹³ Menyei toriitik tugul karaitanyi, ak kotebee tyong'ik tugul che po timiin mooriikyik:

¹⁴ si mata kotoroorgei eng' koindonywa keet age tugul eng' keetiik tugul che mi ye neegitee peek, anan koboochit walisyekwak poolik, anan kotononso chechwaak che kiimeen eng' koindonywa, icheek tugul che eei peek: amu kagigoito tugul kobek, koba ng'wony oriit, eng' kwenutap piik, kobooto icheeget che choorchingei keriinget.

¹⁵ Mwaei Kiptaiyat Kamuktaindet ne Toroor kole: Eng' peetuut ne kichoorchigei ye mi che ki kobek ko ki ang'at riirek keriirchi ineendet: ki atuch rireet amu kiteenyo peek che chaang': ak ki ang'at Lebanon koriirchi ineendet, ak kitanuiso keetiik tugul che po timiin amu ineendet.

¹⁶ Ki agoochi pororyosyek kobotanso amu cheetap kabutennyi, ye kinga timde ineendet kwo ye mi che ki kobek kobooto icheeget che choorchingei keriinget: ak ki igaigaigei keetiik tugul che po Eden, keetiik che korooron ak ko myachen miising' che po Lebanon, icheek tugul che eei peek, ki igaigaigei eng' ng'wony oriit.

¹⁷ Ki choortagei chooto ak icheek koba ye mi che ki kobek kobooto ineendet, koba ole mi icheeget che ki kibare rotwetap chok; ee, chooto che ki eunnyi, che ki menyei urwennyi eng' kwenutap pororyosyek.

¹⁸ Ogerge ak ng'oo anyun eng' toroornatet ak etunateet eng' kwenutap keetiigap Eden? Nganda uu nooto kechoortoin kobooto keetiigap Eden iwe ng'wony oriit: irue kwenutap che ma kimuratan, kobooto icheeget che ki kibare rotwetap chok. Niito ko Pharaoh ak piikyik che chaang', mwaei Kiptaiyat Kamuktaindet ne Toroor.