EZEKIEL 30 - BUKUIT NE TILIIL Sireet ne Dutero Kanon

Riirek agobo Misiri

¹ Ki nyoonjo kogeny ng'olyootap Kamuktaindet ne Toroor, koleenjo,

² Ee, weeriitap chii, maoten, ile, Mwaei Kiptaiyat Kamuktaindet ne Toroor ko uu ni kole: Oteiye, pwo! Peetuunooto!

³ Amu kagoriik peetuunooto, kagoriik peetuutap Kamuktaindet ne Toroor, peetuutap tulugenet; peetuusyegap pororyosyek.

⁴ Ak konyonji rotwetap chok Misiri, ak koityi ng'wanindo Kush, ye ibutyo piik che kibarei eng' Misiri; ak komut piikyik che chaang', ak kebut lumeiywekyik.

⁵ Kibare icheek rotwetap chok kobooto Kush, Put, Lud, ak piik tugul che kiburuchkei, kobooto Kush, kobooto piigap emet ne ki namgei ak icheeget.

⁶ Mwaei Kamuktaindet ne Toroor kole: Ibutos ak icheek che tiye Misiri, ak kobut menoteetap kimnateennyi: kibare icheek rotwetap chok kobooch teekseet ne kooi ne po Sebene, mwaei Kiptaiyat Kamuktaindet ne Toroor.

⁷ Ak koek kibananook eng' kwenutap emotinwek che kibananook, ak kotebee nganasookyik kwenutap nganasook che ki koek karatwek.

⁸ Ak konai kole aa Kamuktaindet ne Toroor, ye kaabeel Misiri, ak keng'em toretikyik tugul.

⁹ Pendi eng' peetuunooto eng' tainnyu piik che kiyooktoi eng' melisyek koba komu Ethiopik che leen tebyei eng' kaalyeet; ak koityi icheek ng'wanindo, ko uu eng' peetuutap Misiri; ogeero, amu nyoonei peetuunooto.

¹⁰ Mwaei Kiptaiyat Kamuktaindet ne Toroor kole: Ageesu tuiyetap Misiri, eng' eutap Nebukadresar laitoryatap Babilon.

¹¹ Kimutu ineendet ak piikyik kong'em emet, ineendet ne iywei pororyosyek; ak kong'us rotonikwak po chok kobar Misiri, ak konyiit muuswek emet.

¹² Ak ateenyi ainoosyek, ak aaldochi emonooto piik che yaacheen; ak ayai emet koguber, kobooto tugul che mi olooto, eng' eunegap toek: kamwae anee Kamuktaindet ne Toroor ng'olyoondoniito.

¹³ Mwaei Kiptaiyat Kamuktaindet ne Toroor kole: Ang'eme kanamonik ak icheek, ak ageesu itoonwegap tuguuk che ma tilei kiy, eng' Nop; ama kobiitu kogeny pounindet eng' emetap Misiri: ak ande kaiyweisyet emetap Misiri.

¹⁴ Ak ayai Patros kobanan, ak abeel Zoan, ak arwookyi No.

¹⁵ Ak aroong'ji nereegekyuk che ng'woneen Sin, irimeetap Misiri; ak abar piik che chaang' che po No.

¹⁶ Ak abeel Misiri; nyooru ng'wanindo ne oo Sin, ak ketonaton No: ak konyoor Nop puunik peet.

¹⁷ Kibare rotwetap chok murenigap Aben ak che po Pi-beset: ak keluul nganasochuuto.

¹⁸ Imenitu peetuut agine eng' Teapnes, ye airii eng' olooto chogisyegap Misiri, ak kogeskei anyun menoteetap kimnateennyi: ago tuchei ineendet pooldet, ak keluul tiibiikyik.

¹⁹ Ayae anyun ko uu nooto kirwoogutik eng' Misiri: si konai kole aa Kamuktaindet ne Toroor.

Maonateet agobo Pharaoh

²⁰ Ak eng' kenyiitap taman ak agenge, eng' arawet ne po tai, eng' peetuutap tisap ne po arawanooto, konyoonjo ng'olyootap Kamuktaindet ne Toroor, koleenjo,

²¹ Ee, weeriitap chii, kaairi eutap Pharaoh laitoryatap Misiri: ak keero, ma ki rat kinde kerichek, kerate angeet, si kogimit komuuch konam rotwetap chok.

²² Mwaei anyun Kiptaiyat Kamuktaindet ne Toroor kole: Ogeero, aborye Pharaoh laitoryatap Misiri ak airie eunekyik, che kiimeen, ak ne kiga keiri; ak agoochi rotwetap chok kobut eng' eunnyi.

²³ Ak aseer Misiriik koba pororyosyek, ak aiyestochi emotinwek.

²⁴ Ak agimiit eunegap laitoryatap Babilon, ak agoochi ineendet rotwennyu po chok: ago airie eunegap Pharaoh, ak kotigen eng' tainnyi eng' tigenoik che uu che po chiito ne kagiguoten ne po meet.

²⁵ Ak agimiit eunegap laitoryatap Babilon, ak kobutyo eunegap Pharaoh; si konai kole aa Kamuktaindet ne Toroor, ye agoochi rotwennyu po chok laitoryatap Babilon, si kong'werere emetap Misiri.

²⁶ Ak aseer Misiriik koba pororyosyek, ak aiyestochi emotinwek; si konai kole aa Kamuktaindet ne Toroor.