EZEKIEL 3 - BUKUIT NE TILIIL Sireet ne Dutero Kanon

¹ Kimwaiwo koleenjo, “Ee, weeriitap chii, am ne kenyooru; am bukuini mamanat ak iwe ing'alaalji kootap Israel.”

² Ki ayaat anyun kutinnyu, ak ki koono aam bukuinooto.

³ Yeityo koleenjo, Weeriitap chii, pai kobiyo moeng'ung' eng' bukuini kagoonin. Ki aam anyun; ak ki anyiny eng' kutinnyu ko uu kumyat.

⁴ Ak ki leenjo, Weeriitap chii, ui kootap Israel ak imwachi icheek ng'aleekyuk.

⁵ Amu ma kiyookten iwe ye mi piik che megase ng'aleekwak anan ko che po kutit ne uui, ago iwe kootap Israel.

⁶ Ma kiyookten iwe pororyosyek che chaang' che po ng'aleek che teer anan ko che po kutit ne uui, che memuuchi igas ng'aleekwak. Iman, nda ko kayooktochin icheek, ko kota kasin.

⁷ Ago ma kasin kootap Israel; amu ma machei icheek kogasa; amu uueen metowo ago uueen mugulelwok koot tugul ne po Israel.

⁸ Keero, kaayai togeng'ung' kogirinda togoochikwak, ak kaauit turyetap togeng'ung' kogirinda turyetap togoochikwak.

⁹ Kaayai turyetap togeng'ung' kouiit ko uu koita ne uui kosiir rwandet ne uui; ameiywei pichooto anan itoptoben eng' togoochikwak, agot nganda kot ne ngelelyot.

¹⁰ Kimwaiwo ineendet kogeny koleenjo, Ee weeriitap chii, taach eng' muguleldang'ung' ak igas eng' itiiguk, ng'aleekyuk tugul che amwaun.

¹¹ Yeityo iwe ole mi che ki kiluul, agoi kaplagogap piiguk, ak ing'alaalji icheek, ileenji, “Mwaei ko uu ni Kiptaiyat Kamuktaindet ne Toroor”; agot ngo kas anan ko ngo ma kas.

¹² Yeityo koganaba kabuusetap Kamuktaindet, ak agas cheetap kirgirenet ne oo eng' patennyu, kole, “Iberuurot toroornatetap Kamuktaindet ne Toroor kong'etee oldanyi.”

¹³ Ak ki agas cheet ne po kebebaigap tuguuchooto saptos ye kitiinyegei, ak kirgirenetap tirook che ki namgei tugul, nooto ko cheetap kirgirenet ne oo.

¹⁴ Koganaba anyun kabuusetap Kamuktaindet, ak komuta oldo age; ak ki awe eng' ng'wanindo, eng' nereegegap saboondanyu, ak kichiila eutap Kamuktaindet ne Toroor eng' kimnateet.

¹⁵ Ki anyoo ye mi icheek che ki kiluul eng' Tel-abib ye neegitee aineetap Kebar. Ki anyoo ak ki atebee olooto, peetuusyek tisap, akwong'e.

Kiteechin Israel

¹⁶ Ak kingo kagogeskei peetuusyek tisabu, konyoonjo ng'olyootap Kamuktaindet ne Toroor, koleenjo:

¹⁷ Ee weeriitap chii, kandein iegu riibindet eng' kootap Israel: kas anyun ng'olyoot ne amwae, ak iteechi icheek eng' ng'olyoondennyu.

¹⁸ Ye amwachi kiptengekyot aleenji, Imee iman; ama iteechi ineendet, anan ing'alaal iteechi kiptengekyot kometo ooreennyi ne ya, si kobiit isaru saboondanyi; meei kiptengekyondonooto eng' tengektanyi; ago amagenen korotiikyik.

¹⁹ Ago ngot iteechi kiptengekyot, ama week chiichooto kometo yaityennyi, anan kometo ooreennyi ne ya, komeei eng' tengektanyi; ago kaisaru saboondang'ung'.

²⁰ Kogeny, ngo masta chiito ne po iman, kometo imandanyi, ak koyai tengekto, ak ande kanagutyet tainnyi, komeei ineendet; ko amu ma iteechi, komeei anyun eng' tengektanyi, ama kibwaati poisyonikyik che po iman, che kiga koyai; ago amagenen korotiikyik.

²¹ Ago ngot iteechi chiito ne po iman, si ma yai chiichooto po iman tengekto, ama yai tengekto, kosabei iman, amu ki kas kateunet; ak kaisaru saboondang'ung'.

²² Ak kimi paragunnyu eutap Kamuktaindet ne Toroor eng' olooto; ak ki leenjo, Ng'eet, ui warenget, si ang'alaalun eng' olooto.

²³ Ki ang'eet anyun ak awe warenget: ak ogeero, ki tonon liilindo ne ki ageer eng' ye neegitee aineetap Kebar: ak ki abut kot kotiiny togeet ng'wony.

²⁴ Kichuta anyun kabuusetap Kamuktaindet, ak konama atonon; ak ki ng'alaalwo, koleenjo, Ui, kerchigei koong'ung'.

²⁵ Ago, keero, inyee weeriitap chii, ratenen pichooto poroonik, ak koratin eng' tuguuchooto si memande ole mi icheek:

²⁶ ak ayae ng'eleptang'ung', kouiit eng' kuting'ung', si konamagen kuut, si ma itechini icheek: amu icheeget ko koot ne ngelelyot.

²⁷ Ak ye ang'alaalun ayaate kuting'ung', ak ileenji icheek, Mwaei Kiptaiyat Kamuktaindet ne Toroor kole, ingogas ineendet ne kasei; ak ingoesyo ineendet ne eesyoi: amu icheeget ko koot ne ngelelyot.