EZEKIEL 29 - BUKUIT NE TILIIL Sireet ne Dutero Kanon

Maonateet agobo Misiri

¹ Ki nyoonjo ng'olyootap Kamuktaindet ne Toroor eng' kenyiitap taman, eng' arawetap taman, eng' peetuutap taman ak aeng', ne po arawanooto, koleenjo,

² Ee, weeriitap chii, tokyi togeng'ung' Pharaoh laitoryatap Misiri, ak imaotenji ineendet kobooto Misiri tugul:

³ ng'alaal, ak imwa ile, Mwaei Kiptaiyat Kamuktaindet ne Toroor kole; Keero, aboryenen, inyee Pharaoh laitoryatap Misiri, maswetit ne oo ne rue kwenutap ainoosyekyik, ne ki komwa kole, ainennyu ko nenyu aneege, ki ayachinigei.

⁴ Ak andoi kombook tagilgiliguk, ak agoochi njireenigap ainoosyeguk konamgei ak periguk; ak amutun imong'u eng' kwenutap ainoosyeguk, kobooto njireenik tugul che po ainoosyeguk che ki namgei ak periguk.

⁵ Abagaaktoin ko kagewiirchin surkwen, inyee kobooto njireenik tugul che po ainoosyeguk: ibutyini kewanin; ma kimugutosok anan kiyumak: kagoiten iegu amitwogigap tyong'igap ng'wony, ak che po toriitigap parak.

⁶ Ak konai piik tugul che menyei Misiri kole aa Kamuktaindet ne Toroor, amu ki ek icheeget kirokto ne po tegat eng' kootap Israel.

⁷ Kingo namin icheek euut, iiri, ak ibet tigigoikwak tugul: ye kingo tienengei, iil inyeendet, ak kiitumdum suenutikwak tugul.

⁸ Mwaei anyun Kiptaiyat Kamuktaindet ne Toroor kole: Keero, aibun rotwetap chok, ak abar eng' kwenung'ung' chii ak tyony.

⁹ Ak koguber emetap Misiri ak koek karaita, si konai kole aa Kamuktaindet ne Toroor; amu ki komwa kole, nenyu aineet, anee ne ki ayae.

¹⁰ Keer anyun, aboryenen, kobooto ainoosyeguk, ak ayai emetap Misiri koek karaita ne ya ak koguber, kobooch teekseet ne kooi ne po Sebene agoi kiwotetap Kush.

¹¹ Ma punei chii olooto, ama punei tyony, ama ki menyei eng' kenyiisyek artam.

¹² Ak ayai emetap Misiri koguber eng' kwenutap emotinwek che kuberotin, ak koek nganasookyik karatwek kenyiisyek artam eng' kwenutap nganasook che karatwek: ak aseer Misiriik koba pororyosyek, ak aiyestochi emotinwek.

¹³ Amu mwaei Kiptaiyat Kamuktaindet ne Toroor kole: Ayumi Misiriik komang'une pororyosyek ole kigaiyestoochi, ko kagobata kenyiisyek artamu;

¹⁴ ak amutu kogeny piigap Misiri che ki kiluul, ak aweekte koba emetap Patros, emet ne ki kisikyin ak komeng'iis eng' olooto koek pounateet ne nyeraat.

¹⁵ Egu pounateet ne nyeraat eng' tugul; ama kotorooregei kogeny kosiir pororyosyek: ak aming'ini icheek, si ma kobou pororyosyek kogeny.

¹⁶ Ama koegu kogeny ne kimang'u eng' kootap Israel, ne koonu kibwaat tengekto, ye kuskong' kogeer icheek: si konai kole aa Kiptaiyat Kamuktaindet ne Toroor.

Ng'emei `Babilon Misiri

¹⁷ Ak eng' kenyiitap tiptem ak tisap eng' arawet ne po tai, eng' peetuut ne po tai ne po arawanooto, konyoonjo ng'olyootap Kamuktaindet ne Toroor, koleenjo,

¹⁸ Ee, weeriitap chii, ki ng'at Nebukadresar laitoryatap Babilon lugeennyi koyai poisyet ne oo kobar Tyro: kichur metit age tugul, ak kosindit tigikyet age tugul: ago ma nyoor melekto, agot lugeennyi, eng' Tyro, amu poisyet ne ki yai agobo nganasanooto.

¹⁹ Mwaei anyun Kiptaiyat Kamuktaindet ne Toroor kole: Ogeero, agoochini Nebukadresar laitoryatap Babilon emetap Misiri; ak komut piikyik che chaang', ak koluul tuguukyik, ak koip tuguukyik che kiluulei; si koek chooto melektap lugeennyi.

²⁰ Kaagoochi ineendet emetap Misiri koek melektanyi amu poisyennyi, amu kiboisyeiwo, mwaei Kiptaiyat Kamuktaindet ne Toroor.

²¹ Abityini kootap Israel kuinet eng' peetuunooto, ak agoonin itwegu eng' kwenunnywa; si konai kole aa Kamuktaindet ne Toroor.