EZEKIEL 28 - BUKUIT NE TILIIL Sireet ne Dutero Kanon

Maonateet agobo Laitoryatap Tyro

¹ Ki nyoonjo kogeny ng'olyootap Kamuktaindet ne Toroor, koleenjo,

² Ee, weeriitap chii, mwachi pounindetap Tyro, ileenji, mwaei Kiptaiyat Kamuktaindet ne Toroor kole: Amu kiitoroorge eng' muguleldang'ung', ak imwa ile, Aa kamuktain, atebee ng'echereetap Kamuktaindet, eng' kwenutap nyanjosyek; ago ii chiito, ma ii Kamuktaindet, agot nganda ki iyaige eng' muguleldang'ung' iige Kamuktaindet:

³ keero, ii ng'oom isiir Daniel; ma mi ung'ootyet ne imuuchi icheek koung'enen:

⁴ ki isikyigei mogornatosyek eng' utaatyeng'ung' ak naeng'ung', ak ki igonorchigei thahabu ak fedha eng' ole kigonoree konoraik:

⁵ ki ites mogornatosyeguk eng' utaatyeng'ung' ne oo ak eng' mung'areng'ung', ak kiitoroorgei eng' muguleldang'ung' amu mogornatosyeguk:

⁶ mwaei anyun Kiptaiyat Kamuktaindet ne Toroor kole: Amu ki iyaige eng' muguleldang'ung' iige Kamuktaindet ne Toroor;

⁷ keer anyun, amutyinin toek, piik che iywei pororyosyek, ak kong'us rotonikwak po chok agobo karaaranindap utaatyeng'ung', ak komurwon kakweng'eng'ung'.

⁸ Ak kochoorten iwe keriinget; ak imeei eng' meosyegap che ki kibar, eng' kwenutap nyanjosyek.

⁹ Tos ta imwae eng' taitap ineendet ne parin, ile, aa kamuktain? Ago ii chiito, ma ii kamuktain, imi eutap ineendet ne iguotenin.

¹⁰ Imee eng' meosyegap che ma kimuratan eng' eutap toek: amu kaamwa ng'olyoondoniito, mwaei Kiptaiyat Kamuktaindet ne Toroor.

Riirek agobo Laitoryatap Tyro

¹¹ Ki nyoonjo kogeny ng'olyootap Kamuktaindet ne Toroor, koleenjo,

¹² Ee, weeriitap chii, riir agobo laitoryatap Tyro, ak ileenji, mwaei Kiptaiyat Kamuktaindet ne Toroor kole: Ing'ochi karagendoet, kigonyiin utaatyet, ak ii ne ititaat eng' korooronindo.

¹³ Ki imi Eden, mbareetap Kamuktaindet; ki itugegei koita age tugul ne po kamanuutyet, sardio, topasio, ak yaholom, berulo, soari, jasipi, sapphire, sumaragdo, ak bareqet, ak thahabu: ki miitei oriing'ung' poisyetap sugutisyeguk che mengeechen ak ndurerusyeguk; ki kichop chooto eng' peetuut ne ki kitau keyain.

¹⁴ Kii kerubindet ne ki kiil ne ki iuurisyei: ak ki andein si itebee tulweet ne tiliil ne po Kamuktaindet; ki iwendote kwenutap koik che po maat.

¹⁵ Ki igeesunotkei eng' ortinweguk kobooch peetuut ne ki kiyaenen, kot kenyoorchin yaityet.

¹⁶ Ki inyiitin icheek koroomnateet eng' chaang'indap mung'areng'ung', ak ki iyai tengekto: ki atimden anyun ko uu ne murwoon, ichooruge eng' tulweetap Kamuktaindet; ak kaang'emin, ee kerubindet ne iuurisyei, imang'une koik che po maat.

¹⁷ Ki itoroorge eng' muguleldang'ung' amu karaaranindang'ung', ki ing'em utaatyeng'ung' amu kakweng'eng'ung': kaawiirchin ng'wony kaandein taitap laitorinik, si kobiit kogeerin.

¹⁸ Ki imurwon oldinweguk che tiliileen eng' chaang'indap tengekwogiguk, eng' yaityetap mung'areng'ung'; kaanemu anyun maat eng' kwenung'ung', ki kobeelin, ak awalin iegu oreek eng' ng'wony, eng' taitap icheek tugul che keerin.

¹⁹ Kwong'enen icheek tugul che ingenin che mi pororyosyek: ki iegu kamuiset, ama ipiitu agoi.

Maonateet agobo Sidon

²⁰ Ak ki nyoonjo ng'olyootap Kamuktaindet ne Toroor, koleenjo,

²¹ Ee, weeriitap chii, tokyi togeng'ung' Sidon, ak imaotenji,

²² ileenji, mwaei Kiptaiyat Kamuktaindet ne Toroor kole: Keero, aboryenen, ee Sidon; ak kitoroora eng' kwenung'ung': si konai kole aa Kamuktaindet ne Toroor, ye karwookyi ineendet ak aegu ne itabaanat eng' ineendet.

²³ Amu ayookyini ineendet koroito ak korotiik eng' ortinwekyik; ak kobutyo eng' kwenunnyi icheek che kogiguoten, che kiguoteni eng' rotwetap chok eng' komosta age tugul; si konai kole aa Kamuktaindet ne Toroor.

Kaberuuret ne nyoonjin Israel

²⁴ Eng' kootap Israel koma kobiitu kogeny eng' komoswekwak tugul che sasei icheek ko uu kateet ne rutei ak kotoorei piich, anan kateet ne ng'waan. Ak konai icheek kole aa Kiptaiyat Kamuktaindet ne Toroor.

²⁵ Mwaei Kiptaiyat Kamuktaindet ne Toroor kole: Ye tuun kaayum kootap Israel komang'une pororyosyek ole kiga kiyestoochi, ak aegu ne itabaanat eng' icheek eng' taitap pororyosyek, komeny anyun emennywa ne ki agoochi otwogindennyu Jakobo.

²⁶ Ak komeny olooto eng' chametapkei; ee teechei kooriik, ak komiin sabibuk, ak komeng'iis eng' chametapkei; ye tuun kaarwookyi icheek tugul che sasei icheek che mi komoswekwak tugul; si konai kole aa Kamuktaindet ne Toroor Kamuktaindennywa.