EZEKIEL 27 - BUKUIT NE TILIIL Sireet ne Dutero Kanon

Riirek agobo Tyro

¹ Ki nyoonjo kogeny ng'olyootap Kamuktaindet ne Toroor koleenjo,

² Ee inyee, weeriitap chii, riir agobo Tyro,

³ ak ileenji Tyro, Ee inyee ne imenye ole kimandoe kebendi nyanjet, ne ii chemung'araindet ne po pororyosyek che po ngeguusyek che chaang', mwaei Kiptaiyat Kamuktaindet ne Toroor kole: Ee Tyro, ki imwa ile, Ageesunotkei eng' korooronindo.

⁴ Mi kiwotosyeguk kwenutap nyanjosyek, ki koyai teegiguk karaaranindang'ung' koek ne ititaat.

⁵ Ki koyai icheek pagoiniguk eng' piribirinik che punu Senir: ki koip taragonik eng' Lebanon si kobiit koyaun toloitap moinget.

⁶ Ki koyai icheek mugangoguk che kiwase peek, keetiigap Bashan; kiyae seremusyeguk kelegap peeleek, che ki kiliige taragonik che teer che punu ngeguusyegap Kitim.

⁷ Ki po katanit ne karaaran ne ki kinde lelesta, angeeng'ung' ne ki punu Misiri, si koek eng' inyee songolyet; ki buluu ak ko aruus ne piriir emaing'ung' ne ki punu ngeguusyegap Elisha.

⁸ Ki kiboitiniguk che po moinget, piik che ki menyei Sidon ak Arbad: ee Tyro, ki menyin piiguk che ng'oomen che ki kwerye moinget.

⁹ Kimenyin poisyegap Gebal kobooto piikyik che ng'oomen che kitimoti ole kaundur: kimi kwenung'ung' melisyek tugul che po nyanjet kobooto kiboitiinikwak si koyai mung'areng'ung'.

¹⁰ Ki mi lugeng'ung' piigap Persia, ak che po Lud ak che po Put, mureniguk che po lugeet: ki kigartaat eng' inyee long'eet ak chepkulet; ki ibarta icheek karaaranindang'ung'.

¹¹ Ki mi piigap Abad kobooto lugeng'ung' irimoiguk parak komoswek tugul, ak kimi Gamadik teeksosyeguk che kooen: ki igartaat long'onikwak eng' irimoiguk eng' komoswek tugul; ki koyai karaaranindang'ung' koek ne ititaat.

¹² Ki chemung'araindeng'ung' Tarsis amu chaang'indap mogornatosyek alak tugul; kiyaei mung'aaret eng' fedha, karnook, kibatinik ak ngosyelaisyek, si konyoor tuguuguk.

¹³ Ki chemung'arainiguk Javan, Tubal, ak Meshek: kiyae mung'aaret piik ak tuguugap sugunonik koale tuguuguk.

¹⁴ Kiyae mung'aaret icheek che po kootap Togarmah paraisisyegap poisyet, ak paraisisyek che po lugeet, kobooto nyumbusyek si konyoor tuguuguk.

¹⁵ Ki chemung'arainiguk piigap Dedan: ki ek ole ialdoisye ngeguusyek che chaang': ki alunenen tuguuguk kelegap peeleek ak keetiik che tuuen.

¹⁶ Ki chemung'araindeng'ung' Syria, amu chaang'indap tuguugap musoknateng'ung': kiyae mung'aaret sumaragdoisyek, ak ngoroik che arusen ne piriir, ak ngoroik che ki kinde lelesta, ak katanit ne karaaran, ak tuguuk che piriireen che mi ngeguut, ak koik che piriireen si konyoor tuguuguk.

¹⁷ Ki chemung'arainiguk Judah, ak emetap Israel: kiyae mung'aaret nganugap Minit, ak panag, kobooto kumyat, ak mwanik, ak mwanik che kinyaise, si konyoor tuguuguk.

¹⁸ Ki chemung'araindeng'ung' Damasko amu chaang'indap tuguugap musoknateng'ung', amu chaang'indap mogornatosyek alak tugul; kobooto divaigap Helbon, ak koroorigap keechiirek che leelach.

¹⁹ Kiyae mung'aaret Bedan ak Javan tuguuk che punu Usal: kibooto tuguuguk che po mung'aaret, kariik che kita kitanyi, kasia ak kalamus.

²⁰ Ki chemung'araindeng'ung' Dedan eng' ngoroik che kiitoi eng' paraisisyek.

²¹ Ki chemung'arainiguk Arabia, ak pounik tugul che po Kedar; ki aldaun aaregap keechiir ak mengichik, ak ng'oroorek.

²² Chemung'arainigap Sheba ak che po Raamah ko ki chemung'arainiguk: kiyae mung'aaret tuguuk che ng'uu ne anyiny kosiir tugul, ak koik tugul che po kamanuutyet ne oo, ak thahabu.

²³ Haran, Kane ak Eden, chemung'arainigap Sheba, Ashur ak Kilmad, ko ki chemung'arainiguk.

²⁴ Ki chemung'arainiguk chuuto eng' tuguuk che korooron, ngoroik che buluu ak che ki kinde lelesta, ak moingonik che korooron kot, che ki kirate poroonik, ak keyae taragonik, kibooto chooto tuguuguk che po mung'aaret.

²⁵ Ki ibei tuguuguk che po mung'aaret melisyegap Tarsis: ak ki itesage, ak itororitu miising' eng' kwenutap nyanjosyek.

²⁶ Ki komutun kiboitiniguk che po moinget inyoo peek che chaang': kiryebin usoonetap kong'asiis eng' kwenutap nyanjosyek.

²⁷ Ibutyin kwenutap nyanjosyek mogornatosyeguk, ak tuguuguk che po mung'aaret, mung'areng'ung', kiboitiniguk che po moinget, ak piiguk che kweryei moinget, piiguk che timoti ole kaundur, ak piik che ki konam mung'areng'ung', ak piiguk tugul che po lugeet, che mi kwenung'ung', kobooto kweaneng'ung' tugul che mi kwenung'ung', eng' peetuutap ng'emisyeng'ung'.

²⁸ Potandos kiwotosyek amu waagaatap piiguk che kweryei melisyek.

²⁹ Chorugei eng' melisyekwak piik tugul che wasei peek eng' mugangok, kobooto kiboitiinik, ak piik tugul che po nyanjet che kweryei melisyek, tonondos eng' ngeguut.

³⁰ Ak kowaach kot igas, ak koriiryo eng' ng'wanindo, ak kolakyin temburyek metowekwak, ak komildaegei oreek;

³¹ ak kocher metowekwak amu inyee, ak kogermenegei kuniok, ak koriiryo agobo inyee eng' ng'wanindo ne po saboondo, ak eng' riirek che ng'woneen.

³² Ak koriirchin eng' kateiyennywa, ak koriirchin kole ng'oo ne uu Tyro, ne ki king'em kewiirchi kwenutap nyanjet?

³³ Ye kibun tuguuguk che po mung'aaret nyanjosyek, ki inyiit pororyosyek che chaang', ki igoochi laitorinigap ng'wony koek mogoreek eng' chaang'indap mogornatosyeguk.

³⁴ Eng' peetuut ne ki kiiriin eng' nyanjosyek eng' rirosyek, ki ibutyo tuguuguk che po mung'aaret eng' kwenung'ung', kobooto kweaneng'ung' tugul.

³⁵ Kwong'enen piik tugul che menyei ngeguusyek, ak koiyweis miising' laitorinikwak, taagu arageneet eng' togoochikwak.

³⁶ Renyin chemung'arainik che mi pororyosyek; ki iegu kamuiset ama ipiitu agoi.