EZEKIEL 26 - BUKUIT NE TILIIL Sireet ne Dutero Kanon

Maonateet agobo Tyro

¹ Ak eng' kenyiitap taman ak agenge, eng' peetuut ne po tai ne po arawanooto, konyoonjo ng'olyootap Kamuktaindet ne Toroor koleenjo,

² Ee, weeriitap chii, amu ki komwa Tyro agobo Jerusalem kole, haa, kogobutok ineendet ne ki kurgeetap pororyosyek; kagoweekyagei: kitesa anyun achang'ait, amu kagong'emak ineendet;

³ mwaei anyun Kiptaiyat Kamuktaindet ne Toroor kole: Keero, aboryenen, ee Tyro, ak agoochini pororyosyek che chaang' kobookyin, ko uu ye igoochin nyanjet peekyik komildagei.

⁴ Ak kong'em irimoigap Tyro, ak kobut teeksosyekyik che kooen: ang'oing'oi ng'ung'unyekyik, ak ayai ineendet koek rwandet ne ma mi kiy.

⁵ Egu nganasanooto ole kiitoe regereiywek che kiname njireenik, eng' kwenutap nyanjet; amu kamwae ng'olyoondoniito, mwaei Kiptaiyat Kamuktaindet ne Toroor: ak koek ne luulei pororyosyek.

⁶ Ak kebare rotwetap chok tiibiikyik che mi emet: si konai kole aa Kamuktaindet ne Toroor.

⁷ Amu mwaei anyun Kiptaiyat Kamuktaindet ne Toroor kole: Ogeero, amuti Nebukadresar laitoryatap Babilon, ineendet laitoryatap laitorinik, kobookyi Tyro, kobunu murot kaataam, kobooto paraisisyek, ak kariisyekyik che po lugeet, ak piik che ketei paraisisyek, ak kweanet, ak piik che chaang'.

⁸ Pare rotwetap chok tiibiiguk che mi emet: ak koteech irimoik kotokyin, ak koruruuch ng'ung'unyek kotokyin, ak konamji parak long'eet ne oo kotokyin.

⁹ Ak konde injinisyek che kibutisye, taitap irimoiguk, ak kobute aonokyik teeksosyeguk che kooen.

¹⁰ Tuchin temburyegap paraisisyekyik amu chaang'indonywa: itumdumegei irimoiguk amu kirgirenetap paraisisyek che laanyei piik, ak ne po kariisyek che lau tuguuk, ak ne po kariisyek che po lugeet, ye tuun punei ineendet ormariichoguk, ko uu piik che pendi nganaseet oriit kobunei ole ki kobutok.

¹¹ Tiechei ortinweguk tugul eng' siyoogap paraisisyekyik: parei piiguk eng' rotwetap chok, ak koluulyo tolochigap kimnateng'ung'.

¹² Ak koluul mogornatosyeguk, ak koluul tuguuguk che po mung'aaret: ak kobut irimoiguk, ak kong'em kooriguk che korooron: ak kowiirchi peek koiguk ak keetiiguk ak ng'ung'unyeguk.

¹³ Ak ageesu cheetap tyenwogiguk; ama kegasei kogeny cheetap ketubosyeguk.

¹⁴ Ak ayain iegu rwandet ne ma mi kiy: iegu ole kiitoe regereiywek che kiname njireenik; ma keteechin kogeny, amu kamwae anee Kamuktaindet ne Toroor ng'olyoondoniito, mwaei Kiptaiyat Kamuktaindet ne Toroor.

¹⁵ Mwachin Kiptaiyat Kamuktaindet ne Toroor Tyro kole: Tos ma potandos ngeguusyek amu cheetap kabuteng'ung', ye tigendos, che kiguoteni, ye ki parchi piik kwenung'ung'?

¹⁶ Kochoorgei anyun eng' ng'echerokwak che po laitornatet pounik tugul che po nyanjet, ak koreek ngoroikwak che tabanu parak, ak koreek ngoroikwak che ki kinde lelesta: ilaachi potanet; ak kotebee ng'wonyut, ak kobotanso sait age tugul ak kokwong'enen.

¹⁷ Ak koriiryo agobo inyee, ak koleenjin, Katepto ano si keng'emin ne tee ni, inyee ne ki menyin piigap nyanjet, nganaseet ne ko tagunoot, ne ki kiim eng' nyanjet, ineendet ak piik che komenyei, ne koimui piik tugul che komenyei olooto!

¹⁸ Tuun potandos anyun ngeguusyek eng' peetuutap kabuteng'ung'; ee, aragendos ngeguusyek che mi nyanjet ye iistoige.

¹⁹ Amu mwaei Kiptaiyat Kamuktaindet ne Toroor kole: Ye tuun ayain iegu nganaseet ne karaatya, ko uu nganasook che ma ki menyei; ye tuun atugenen nyanjet, ak kotubin peek che chaang';

²⁰ achoorten anyun kobooto icheek che choorchingei keriinget, ole mi piik che po keny, ak agoonin imeny ng'wony oriit, eng' komoswek che ki koek surkwen kobooch keny, kobooto icheek che choorchingei keriinget, si ma ki menyin; ak ande toroornatet emetap piik che saptos:

²¹ ayain iegu kamuiset, ama ipiitu kogeny: agot nda kicheeng'in, koma koi kinyoorun kogeny, mwaei Kiptaiyat Kamuktaindet ne Toroor.