EZEKIEL 25 - BUKUIT NE TILIIL Sireet ne Dutero Kanon

Maonateet agobo Ammon

¹ Ki nyoonjo ng'olyootap Kamuktaindet ne Toroor, koleenjo,

² Ee, weeriitap chii, tokyigei kaplagogap Ammon, ak imaoten agobo icheek:

³ ak ileenji lagogap Ammon, Ogas ng'olyootap Kiptaiyat Kamuktaindet ne Toroor, Mwaei Kiptaiyat Kamuktaindet ne Toroor kole: Amu ki imwa ile, Haa, agobo oldanyu ne tiliil, ye kiga kimurwon; ak agobo emetap Israel ye kiga kiyai kong'emak; ak agobo kootap Judah, ye ki kiluul:

⁴ keer anyun, agoochinin lagogap kong'asiis ibunji, ak koteekso icheek eng' kwenung'ung', ak koyai meng'otosyekwak eng' kwenung'ung'; amei logoeguk ak kolu cheguuk.

⁵ Ak ayai Rabbah koek ole menyei tambeesik, ak ayai kaplagogap Ammon koek ole kiyage akwotisyegap keechiirek: si onai ole aa Kamuktaindet ne Toroor.

⁶ Amu mwaei Kiptaiyat Kamuktaindet ne Toroor kole: Amu ki irabrap euneguk, ak itwaltwal, ak ibaibaitu eng' koroomnateet tugul ne mi saboondang'ung' agobo emetap Israel;

⁷ keer anyun, kaachuul eunnyu atokyin, ak agoochin pororyosyek koluulin; ak aisten eng' pororyosyek, ak agoonin ilus eng' emotinwek: ang'emin; si inai ile aa Kamuktaindet ne Toroor.

Maonateet agobo Moab

⁸ Mwaei Kiptaiyat Kamuktaindet ne Toroor kole: Amu mwaei Moab ak Seir, kole, ogeero, uu kootap Judah pororyosyek tugul:

⁹ keer anyuno, ayaate kiwotetap Moab kobooch nganasook, kobooch nganasookyik che mi kiwotosyekyik, toroornatetap emet, Beth-Jesimoth, Baal-meon ak Kiriataim,

¹⁰ ayaatyini piigap kong'asiis, koba kobargei ak lagogap Ammon, ak agoochi icheek konam kobunji, si ma kibwaati lagogap Ammon kogeny eng' pororyosyek:

¹¹ ak arwookyi Moab; si konai kole aa Kamuktaindet ne Toroor.

Maonateet agobo Edom

¹² Mwaei Kiptaiyat Kamuktaindet ne Toroor kole: Amu ki koyai ne ya Edom koyaaktochigei mugetuut eng' kootap Judah, ak ki koyai yaityet ne oo, koyaaktochigei mugetuut;

¹³ mwaei Kiptaiyat Kamuktaindet ne Toroor kole: Achuule eunnyu atokyini Edom, ak aiste eng' olooto chii ak tyony: ak ayai koguber kobooch Teman; kibarei icheek eng' rotwetap chok agoi Dedan.

¹⁴ Ak ayaakyi mugetuut Edom eng' eutap piik che miitei Israel, ak koyai eng' Edom ko uu nereegekyuk, ak eng' nereegekyuk che ng'woneen, si konai icheek yaaktaennyu ne po mugetuut, mwaei Kiptaiyat Kamuktaindet ne Toroor.

Maonateet agobo Philistia

¹⁵ Mwaei Kiptaiyat Kamuktaindet ne Toroor kole: Amu kagoyaakta mugetuut Philistiik, ak kagoyaaktochigei mugetuut eng' koroomnateet ne mi saboondo si kobiit kong'emis eng' puunyoondit ne po agoi;

¹⁶ mwaei Kiptaiyat Kamuktaindet ne Toroor kole: Ogeero, achuule eunnyu atokyi Philistiik, ak aiste Keretik, ak ang'em che ki ng'et che po ngeguut.

¹⁷ Ak ayaakyi icheek mugetuut ne koroom, eng' kereetap kong' ne ng'waan; si konai kole aa Kamuktaindet ne Toroor, ye ayaakyini icheek mugetuut.