EZEKIEL 24 - BUKUIT NE TILIIL Sireet ne Dutero Kanon

Kalewenet agobo tereet ne kotkotaat

¹ Ki nyoonjo kogeny ng'olyootap Kamuktaindet ne Toroor, eng' kenyiitap sogool, eng' arawetap taman, eng' peetuut ne po taman ne po arawanooto, koleenjo,

² Ee, weeriitap chii, sir kainetap peetuut, ne po peetuunooto: ki ibookyi laitoryatap Babilon Jerusalem eng' peetuunooto.

³ Ak imwachi kalewenet koot ne ngelelyot, ileenji, mwaei Kiptaiyat Kamuktaindet ne Toroor kole kotkot tereet, kotkot, ak roong'ji peek:

⁴ inde tuguuk che iyoi, kiy age tugul ne myee, kubesto, ak puita; inyiit kawek che myachen.

⁵ Kwei keechiirek che myach eng' akweet, ak irurukyi ma kawek: ingowaskei miising'; ee, iyoe teronooto kawechooto.

⁶ Mwaei anyun Kiptaiyat Kamuktaindet ne Toroor kole: Pwo! Nganaseet ne po korotiik, tereet ne tinyei kutu eng' ole po oriit, tereet ne tomo kobek kutuuk! Inemu agenge agenge; ma mi parbaryat ne kaibutyi teronooto.

⁷ Amu mi korotiikyik kwenunnyi; ki inde rwandet ne ma mi kiy; ma tumji ng'wony, si ketuge temburyek;

⁸ si kobiit kong'eet nereegek che ng'woneen konyo koyaakta mugetuut, kaande korotiikyik rwandet parak si ma ki tuch.

⁹ Mwaei anyun Kiptaiyat Kamuktaindet ne Toroor kole: Pwo! Nganaseet ne po korotiik! Atese kogeny karurugutyet koeet.

¹⁰ Nde kweenik che chaang', ilaal maat ne oo, iyo panyeek komyee, ak ichop suuteek konyigiisitu, ak ingolalyo kawek.

¹¹ Yeityo igotkot teronooto komi puch eng' maata si kolal, ak kolal sugunwennyi si kochoot simdanyi ne mi oriit ak kobeel kutuukyik.

¹² Aiimigei puch eng' poisyet, kutukyik che chaang' koma istoegei; ama iwong'ugei kutukyik eng' ma.

¹³ Agot ye ki atiliilin eng' yaityetap simdang'ung', ko ki ma itiliilage, ma kitiliilin kogeny eng' simdang'ung' kot ageesu nereegekyuk che ng'woneen eng' inyee.

¹⁴ Kamwae anee Kamuktaindet ne Toroor ng'olyoondoniito, isuldoi ak ayae nooto; ma weechigei let, amarira moo, amawale kabwaatutikyuk. Arwoogun icheek ko uu ortinweguk ak ko uu poisyoniguk, mwaei Kiptaiyat Kamuktaindet ne Toroor.

Meetap kwondo ne po Maotyot

¹⁵ Ki nyoonjo kogeny ng'olyootap Kamuktaindet ne Toroor koleenjo,

¹⁶ Ee, weeriitap chii, keero, aistoi eng' yooto ne iboiboi konyeguk: ago metei anan iriir, ama saitoi peeguk che po kong'.

¹⁷ Tigen, ago ma miising'; ametechi che ki kobek, taae meting'ung' angeet, ak ilaach kweoniguk, ametuch kuting'ung', ameam amitwogigap piik.

¹⁸ Ki ang'alaalji anyun piik karon; ak kime osotyondennyu koskoleny: ak ki ayai karon ko uu ye kiga king'ata.

¹⁹ Ak ki leenjo piik, Tos memwaiwech kiit ne uu tuguuchu eng' acheek, kot iyai ko uu nooto?

²⁰ Ki amwachi anyun aleenji, Ki nyoonjo ng'olyootap Kamuktaindet ne Toroor, koleenjo,

²¹ Ng'alaalji kootap Israel, ileenji, mwaei Kiptaiyat Kamuktaindet ne Toroor kole: Ogeero, amurwoni oldanyu ne tiliil, menoteetap kimnateeng'wong', ne iboiboi konyekwok, ne riiree saboonwekwok; ak kebare rotwetap chok weeriikwok ak tiibiikwok che ki obagaakte.

²² Ak tuun oyae ko uu ye koayai: motuche kutusweekwok, anan oam amitwogigap piik.

²³ Ak komi metowekwok angook che otaae, ak komi kweonik keelyekwok; moteitosi anan oriirye; ago ochuichuitosi eng' tengekwogikwok, ak otigenjige.

²⁴ Egu anyun Ezekiel kaboorunet eng' okweek; oyae ko uu tugul che ki koyai ineendet: ye nyo niito, onai anyun ole aa Kiptaiyat Kamuktaindet ne Toroor.

²⁵ Ak inyee, ee, weeriitap chii, tos manyonjinin chiito eng' peetuut ye arebee icheek kimnateennywa, ak poiboiyetap toroornatennywa, ak ne iboiboi konyekwak, ak kioto ki inde mugulelwekwak, ak weeriikwak ak tiibiikwak,

²⁶ tos manyonjinin eng' peetuunooto chiichooto chilili, si kogoonin igas nooto eng' itiiguk?

²⁷ Eng' peetuunooto, ing'alaaljini ineendet, ama konamageen kuut kogeny: iegu anyun kaboorunet eng' icheek; ak konai icheek kole aa Kamuktaindet ne Toroor.