EZEKIEL 23 - BUKUIT NE TILIIL Sireet ne Dutero Kanon

Oholah ak Oholibah

¹ Ki nyoonjo kogeny ng'olyootap Kamuktaindet ne Toroor, koleenjo,

² Ee, weeriitap chii, kimi kwonyiik aeng' che ki tiibiigap chebyoset agenge.

³ Ak ki yai icheek kugoinatosyek eng' Misiri; ki yai kugoinatosyek eng' ming'inatennywa: ki kichiil kinaikwak eng' olooto, ak ki kitui kutusweegap kinaikwak che po pergeinatennywa eng' olooto.

⁴ Kainaikwak ko ki Oholah, ne oo, ak Oholibah, chepkamet: ak kibunjo, ak ki sich weeriik ak tiibiik. Ak ki uu ni kainaikwak, Samaria ko Oholah, ak Jerusalem ko Oholibah.

⁵ Ak ki yai Oholah kugoinatet ye kita ko nenyu; ak ki cham miising' chamanikyik, chooto ko piigap Assyria, piigap kokwennyi,

⁶ che ki ilaachi ngoroik che buluu, che ki kirwoogik ak pounik, murenik tugul che ki chamei, murenik che ketei paraisisyek.

⁷ Ak ki yai kugoinatosyekyik kobooto icheek, murenik tugul che korooron miising' che po Assyria, ak age tugul ne ki chamei miising'. Ki ing'wanitegei kanamonikwak tugul.

⁸ Ama meto kugoinatosyekyik kobooch peetuusyegap Misiri; amu kiruiyo kobooto ineendet kobooch ming'inatennyi, ak kitui kutusweegap kinaik che po pergeinatennyi: ak ki yai kugoinatennywa miising' kobooto ineendet.

⁹ Ki ande anyun ineendet eunegap chamanikyik, kwo eunegap piigap Assyria, che ki chamei miising'.

¹⁰ Ki ng'aany chuuto ineendet kotep aach ngor: ki imut weeriikyik ak tiibiikyik ak kobar kwonyooto eng' rotwetap chok: ki ek teweerya eng' kwonyiik; amu ki irwookyi ineendet.

¹¹ Ak kigeerei niito Oholibah chepkamet, ago king'emak ineendet miising' eng' chamennyi kosiir chepkamet, ak eng' kugoinatosyekyik che kichang'a kosiir che po chepkamet.

¹² Ki cham miising' piigap Assyria, che ki kirwoogik ak pounik, piigap kokwennyi, che ki ilaachigei miising', murenik che ketei paraisisyek, murenik tugul che ki chamei.

¹³ Ak ki ageer ale ki king'wanit; ki isup tuwai ooreet agenge.

¹⁴ Ak kites kugoinatosyekyik; amu ki keer itoonwegap piik che ki kisirchi inaat, itoonwegap Kaldeik che ki kisire saleiywek che piriireen,

¹⁵ che kirategei mosibisyek, ak kotaae metowekwak ngoroik che ki kisal, ko pounik tugul, che tiny kegeer, che kergei ak Babilonik eng' Kaldea, emennywa ne ki kisikyin.

¹⁶ Ak kingo keer icheek kocham, ak koyookyi piik koba Kaldea.

¹⁷ Ak ki pwanji ineendet Babilonik eng' itoogutap chamyet, ak ki ing'wanit icheek ineendet eng' kugoinatennywa, ak ki imurwongei kobooto icheek, ak kitoiyo saboondanyi ak pichooto.

¹⁸ Ki ng'aany anyun kugoinatosyekyik, ak kong'aanygei kotep aach ngor: koistoegei anyun saboondanyu ineendet, ko uu ye ki istoegei saboondanyu tupchennyi.

¹⁹ Ago kites kugoinatosyekyik, kobwaati peetuusyegap ming'inatennyi, ye kingo yaei kugoinatet eng' emetap Misiri.

²⁰ Ak ki cham miising' chamanikyik, che ki uu poorwekwak poorwegap sigiroik, ak ki uu tuguuk che mang'une icheek, tuguugap paraisisyek.

Nyooru pireet Jerusalem

²¹ Ibwaat anyun yaityetap ming'inateng'ung', ye kingo tui Misiriik kutusweegap kinaiguk che po ming'inateng'ung'.

²² Ara anyun, ee Oholibah, mwaei Kiptaiyat Kamuktaindet ne Toroor kole: Keero, ang'eetyinin chamaniguk, che ki kotoiyegei saboondang'ung', ak amutu icheek kobwonjin eng' komosta age tugul;

²³ Babilonik ak Kaldeik tugul, Pekod ak Soa ak Koa, kobooto piigap Assyria tugul: murenik che ki chamei, che ki kirwoogik ak pounik icheek tugul, pounik ak piik che taagunotiin, ki laanyei icheek tugul paraisisyek.

²⁴ Ak kobookyin kotinyei kariik, kariisyek che po lugeet ak kariisyek che lau tuguuk, ak tuiyet ne po pororyosyek: ibookyinin kotinyei long'onik che eecheen ak che mengeechen ak chepkuloigap lugeet eng' komoswek tugul: ak agoochi icheek kirwooget, si korwogun, ko uu kirwoogutikwak.

²⁵ Ak atokyin ng'etkondanyu, ak kogerin kong' icheek eng' nereegek che ng'woneen; tilei serung'ung' ak itiiguk; ak kebare rotwetap chok piiguk che ki ng'et: imuti icheek weeriiguk ak tiibiiguk; ak kobeel maat piiguk che ki ng'et.

²⁶ Ireegunenen kogeny ngoroik, ak koibenen tuguuguk che korooron.

²⁷ Ageesu yaityeng'ung' eng' inyee, ak kugoinateng'ung' ne ki ibu eng' emetap Misiri si mata inyaliil icheek, anan kota ibwaat Misiri kogeny.

²⁸ Amu mwaei Kiptaiyat Kamuktaindet ne Toroor kole: Keero, andein eutap icheek che iweche, andein eutap icheek che ki kotoiyegei saboondang'ung':

²⁹ ak kogerin kong' eng' wegeet, ak korebenen poisyeng'ung' tugul, ak kobagachin itebee puch aach ngor: ak keng'aanyin itebi puch eng' kugoinatosyeguk, yaityeng'ung' kobooto kugoinatosyeguk.

³⁰ Kiyaun tuguuchuuto, amu ki iyai kugoinatet isuboti pororyosyek, ak amu ki imurwonegei kanamonikwak.

³¹ Ki isup ooreetap chepkomet; nooto anyun andoi kigombennyi eung'ung'.

³² Mwaei Kiptaiyat Kamuktaindet ne Toroor kole: Iee kigombetap chepkomet, ne oo ak ko paraa: kirorechinin kereenyin ak kesasin; chaang' tuguugap kigombanooto.

³³ Kinyiitin pogitet ak arageneet, kobooto kigombetap kwong'eet, ak pananda, kobooto kigombetap chepkomet Samaria.

³⁴ Iee ichololi, ak inyei rokyonokyik, ak igereer kinaiguk; amu kamwae anee ng'olyoondoniito, mwaei Kiptaiyat Kamuktaindet ne Toroor.

³⁵ Mwaei anyun Kiptaiyat Kamuktaindet ne Toroor kole: Amu ki iutyeno, ak ituktocha patai, kesen anyun yaityeng'ung' agine ak kugoinatosyeguk.

Kirwookyin Samaria ak Jerusalem

³⁶ Kimwaiwo anyun Kamuktaindet ne Toroor kogeny, koleenjo: Ee, weeriitap chii, tos irwookyini Oholah ak Oholibah? Iboorchi anyun icheek tuguukwak che kiwechei.

³⁷ Amu ki koyai ibeetapkei, ak komi korotiik eunekwak, ak ki koipkei kobooto kanamonikwak; ak Ki kogoochi icheek kogeny weeriikwak che kisikwa, ki igoito kobun maat si kobiit kebeel.

³⁸ Ki koyaiywo kogeny niito: ki kong'wanit oldanyu ne tiliil eng' peetuunooto, ak komurwon sabatosyekyuk.

³⁹ Amu ye kingo parchi lagokwak kanamonikwak, kobwa peetuunooto oldanyu ne tiliil komurwon; ak ogeero, ki yai nooto eng' koonnyu.

⁴⁰ Ak kogeny ki oguur piik eng' ole loo: che kiga kiyookyi, ak ogeero, ki pwa; ki iungei amu pichooto, ak isal konyeguk, ak ki ilelesonjinegei tuguugap lelesta;

⁴¹ ak ki itebee itoogut ne karaaran, ne ki mi tainnyi meset ne choboot, ne ki inde nyamdutikyuk che kibeelei ak mwanikyuk.

⁴² Ak ki mi ak ineendet eng' yooto tuugeetap tuiyet ne kitalbisi: ak ki kimut eng' surkwen piik alak tugul kobooto kibogitinik; ak ki ilaakyi kariigap eunek icheek tuwai, ak ki ilaakyi chepkuloik che korooron.

⁴³ Ki amwa anyun agobo ineendet ne ki yai ibeetapkei kobooch keny, ale, Yaei anyun kugoinatosyek kobooto ineendet, ak ineendet kobooto icheek.

⁴⁴ Ak ki ipkei ak ineendet, ko uu ye ibegei ak chepkugoniot: ki ipkei anyun ko uu nooto kobooto Oholah ak Oholibah, kwonyiik che yaacheen.

⁴⁵ Tuun irwookyin piigap iman icheek, eng' kirwoogetap chepkugonik, ak eng' kirwoogetap kwonyiik che tumdoi korotiik; amu icheeget ko chepkugonik, ak komi korotiik eunekwak.

⁴⁶ Amu mwaei Kiptaiyat Kamuktaindet ne Toroor kole: Amutyini icheek tuiyet, ak agoite icheek kewiirchi komosi ak komosi ak keluul.

⁴⁷ Ak kolach tuiyet icheek eng' koik, ak kobar eng' rotonikwak che po chok; ak kobar weeriikwak ak tiibiikwak, ak kobeel kooriikwak.

⁴⁸ Aistoi anyun ko uu nooto yaityet eng' emet, si koek kateunet eng' kwonyiik tugul si ma kosubi yaityeng'wong'.

⁴⁹ Ak kogeerwok ko uu yaityeng'wong', ak ogesen tengekwogigap kanamonikwak: si onai ole aa Kiptaiyat Kamuktaindet ne Toroor.