EZEKIEL 22 - BUKUIT NE TILIIL Sireet ne Dutero Kanon

Nganaseetap korotik

¹ Ki nyoonjo kogeny ng'olyootap Kamuktaindet ne Toroor koleenjo,

² Ee, inyee weeriitap chii, tos irwookyini, irwookyini nganaseet ne po korotiik? Iboorchi anyun konai tuguukyuk tugul che kiwechei.

³ Ak imwa ile, Mwaei Kiptaiyat Kamuktaindet ne Toroor kole: Nganaseet ne tumdoi korotiik eng' kwenunnyi, si kobiit konyo peetuunnyi, ne yachinegei kanamonik, kong'wanitegei!

⁴ Kanamin ng'oogisto amu korotiguk che kiitumde, ki king'wanitin eng' kanamoniguk che ki iyai; ak ki igoochi peetuusyeguk koriik, ak kaiit ye pooch kenyisyeguk. Ko uu nooto kaayain koteweerin pororyosyek, ak ne kichotei eng' emotinwek tugul.

⁵ Chotin che neegit kobooto che looen, inyee ne ii murwoon ak ko nyiitaat wasetapkei.

⁶ Ogeero, pounigap Israel, mi age tugul eng' kimnateennyi, eng' kwenung'ung', si kobiit kotumda korotiik.

⁷ Ki kosas icheek eng' inyee kwanda ak kamet; kigonyalil icheek toek eng' kwenung'ung': ki koyachi ne ya eng' inyee ne ma tinyei sigiik ak mosoget.

⁸ Ki isas tuguukyuk che tiliileen, ak imurwon sabatosyekyuk.

⁹ Ki kotebee chaamik kwenung'ung' si kotumdoi korotiik: ak kigoamisye tuloonook eng' inyee: ki koyai yaityet eng' kwenung'ung'.

¹⁰ Ki kong'aany eng' inyee kwanisyekwak kotebee aach ngor: kigosuup eng' kwenung'ung' kwondo ne ki itabaanat eng' peetuusyekyik che po arawet.

¹¹ Ak ki koyai age kiit ne kiwechei kobooto osotyotap chiitap kokwennyi, koyai age yaityet kong'wanit osotyotap weeriinnyi; ak kigosuup age chepkamet, cheptap kwandanyi, eng' inyee.

¹² Kigotaach icheek eng' inyee asoya si kotumda korotiik; ki ip kelunet ne siirtoot ak che tesatiin, ak ki inyooru poroteet eng' keiyandit amu ki isastae piigap kokweng'ung', ak ki iutyeno, mwaei Kiptaiyat Kamuktaindet ne Toroor.

¹³ Keer anyuno, ki arabach eunekyuk agobo keluneng'ung' ne ma po iman ne ki inyooru, ak eng' korotiguk che mi kwenung'ung'.

¹⁴ Tos imuuchi komuita muguleldang'ung', anan kogimegitu euneguk, eng' peetuusyek che agerin kong'? Kamwae anee Kamuktaindet ne Toroor ng'olyoondoniito, ak ayae.

¹⁵ Ak aseerchin pororyosyek, ak ayestochin emotinwek; ak ageesu simdang'ung'.

¹⁶ Ak imurwongei inyegei, eng' taitap pororyosyek; si kobiit inai ile aa Kamuktaindet ne Toroor.

¹⁷ Ak ki nyoonjo ng'olyootap Kamuktaindet ne Toroor koleenjo,

¹⁸ Ee, weeriitap chii, ki koek eng' anee kootap Israel michikyigek che kigenendoe fedha: ki koek icheek tugul sugunwet ak kibatit ak karnook ak ngosyelait, che mi maat ne oo; icheek ko michikyigek che kigenendoe fedha.

¹⁹ Mwaei anyun Kiptaiyat Kamuktaindet ne Toroor kole: Amu ki oegu okweek tugul michikyigek che kigenendoe fedha, ogeero, ayumjinok Jerusalem.

²⁰ Ko uu ye kiyumjin maat ne oo fedha ak sugunwet ak karnook, ak ngosyelait ak kibatit, si kobiit keguut maat kobeel kochootyo; ayumok anyun ko uu nooto eng' nereegekyuk, ak eng' nereegekyuk che ng'woneen, ak andeok olooto, si ochootye.

²¹ Ee, ayumok tugul, ak aguutak eng' maatap nereegekyuk, ak ochootye eng' maata.

²² Ko uu ye chotoos fedha eng' maat ne oo, ochotosi ak okweek eng' maata; si onai ole aa Kamuktaindet ne Toroor ne kaarong'jok nereegekyuk che ng'woneen.

Tengekto ne po kandoigap Israel

²³ Ak ki nyoonjo ng'olyootap Kamuktaindet ne Toroor koleenjo,

²⁴ Ee, weeriitap chii, ileenji emonooto, ii emet ne tomo ki anyiny, anan kerobonji eng' peetuutap nereegek.

²⁵ Miitei kwenunnyi chaamset ne po maotikyik, ne uu ng'etundo ne pooriseni kobarisyei: ki kobar saboonwek; ibei konoraik ak tuguuk che po kamanuutyet ne oo; ki kotes mosoogik eng' kwenunnyi.

²⁶ Ki kobut tisiikyik ng'atuutyennyu, ak komurwon tuguukyuk che tiliileen: ma ibesyo che tiliileen ak che ma tiliileen, ama ineet piik koguiyo tuguuk che ma ianyinyotin ak che ianyinyotin, ak ki kotuch konyekwak si ma keer sabatosyekyuk, ak ki king'wanita eng' kwenunnywa.

²⁷ Kaigei pounikyik eng' kwenunnyi suik che parisyei; si kotumda korotiik, ak kong'em saboonwek, si kobiit konyoor poroteet ne ma po iman.

²⁸ Ak ki komalse maotikyik taartaarik che ma myachen, komalsechi icheek, kogeerei tangoita, ak kong'orchin icheek lembechek, koleenjin, Mwaei ko uu ni Kiptaiyat Kamuktaindet ne Toroor, ye ma mwa kiy Kamuktaindet ne Toroor.

²⁹ Kigoboisye piigap emet sastaet, ak korebisyei; ee, kigoiim kibananook ak che ma tinyei kiy, ak Ki kogastae toondet eng' ooreet ne ya.

³⁰ Ki acheeng' anyun chii eng' kwenunnywa, si kotuur ng'ootweet, ak kotonon eng' tainnyu eng' ole kibutok, agobo emet, si ma ng'em emonooto: ago ma anyooru chii.

³¹ Kaaroong'ji anyun nereegekyuk icheek amu nooto; kaagesu eng' maatap nereegekyuk: ki ande ortinwekwak metowekwak, mwaei Kiptaiyat Kamuktaindet ne Toroor.