EZEKIEL 21 - BUKUIT NE TILIIL Sireet ne Dutero Kanon

Rotwetap Kamuktaindet

¹ Ki nyoonjo ng'olyootap Kamuktaindet ne Toroor, koleenjo,

² Ee, weeriitap chii, tokyi togeng'ung' Jerusalem, mwachi ng'aleek komoswek che tiliileen, ak imaotenji emetap Israel;

³ ak ileenji emetap Israel, Mwaei Kamuktaindet ne Toroor kole: Keero, aboryenen ak ang'usu rotwennyu po chok, ak aiste eng' inyee chiito ne po iman ak ne ya.

⁴ Amu aistoi eng' inyee chiito ne po iman ak ne ya, ng'usugei anyun rotwennyu po chok kwo kobar piik tugul kobooch murot tai agoi murot kaataam:

⁵ si konai piik tugul kole, aa Kamuktaindet ne Toroor ne kang'usu rotwennyu po chok; ma kogetitagei kogeny.

⁶ Tigen anyun, inyee weeriitap chii; tigen eng' iletap sueng'ung' ak eng' ng'wanindo kogeerei icheek.

⁷ Ak ye teebenen, koleenjin, Amu nee si itigen? Ile anyun, Amu ng'aleek, amu nyoonei: ak kome muguleldo age tugul ak konyalulso eunek tugul, ak konyaluul sabeet age tugul, ak kochootyo kutung'oik tugul ko uu peek: ogeero, nyoonei, ak ko yaaksei, mwaei Kiptaiyat Kamuktaindet ne Toroor.

⁸ Ak ki nyoonjo ng'olyootap Kamuktaindet ne Toroor, koleenjo,

⁹ Ee, weeriitap chii, maoten, mwaa ile, Mwaei Kamuktaindet ne Toroor kole; Mwa ile, Rotwetap chok, rotwetap chok, kagelit, ak kagesit kogeny:

¹⁰ kagelit si kobiit kobaris; kagesit si kobiit koigei kalyeleet: tos kiboiboitu anyun? Kirokto ne po weeriinnyu ne sasei keetit age tugul.

¹¹ Ak ki kigon si kobiit kesit, si kimuuch kenam: kilitei rotwetap chok, ee, kisitei, si kobiit kinde eutap parindet.

¹² Waach ak ite, ee, weeriitap chii: amu kagong'urur piikyuk, kobooto pounik tugul che po Israel: kagigoito icheek kobar rotwetap chok kobooto piikyuk: irabaach anyun kubestang'ung'.

¹³ Amu mi tyemisyet; egu nee anyun ngot koma komi kirokto ne sasisyei? Mwaei Kiptaiyat Kamuktaindet ne Toroor.

¹⁴ Maoten anyun inyee weeriitap chii, ak irabaach euneguk; ak ingotesak rotwetap chok konyil aeng', ingotesak ne po somok, rotwetap chok ne po che ki kiguoten ne po meet: rotwetap chok ne po ineendet ne oo ne ki kiguoten ne po meet, ne kichut kooriikwak che po oriit.

¹⁵ Koatokyi rotwetap chok ormariichokwak tugul, si komeiyo mugulelwekwak, ak kotesagis kanagutikwak: haa! Kogeyai koigei kalyeleet, kogelit si kobaris.

¹⁶ Iyumge, ui komostap tai; chopkei, chopkei, ui komostap kaataam; oldo tugul ole ketokyi togeng'ung'.

¹⁷ Arabachi eunekyuk, ak ageesu anyun nereegekyuk che ng'woneen: kamwae anee Kamuktaindet ne Toroor ng'olyoondoniito.

¹⁸ Ki nyoonjo kogeny ng'olyootap Kamuktaindet ne Toroor, koleenjo,

¹⁹ Ee, weeriitap chii, lewenjige kogeny ortinwek aeng', si kobiit konyo rotwetap chok ne po laitoryatap Babilon; punu chooto tuwai emet agenge; ak iaror komosta eng' sireet, iaror eng' tabandap ooreet ne wendi nganaseet.

²⁰ Lewen ooreet si kobiit koit rotwetap chok Rabbah ne po lagogap Ammon, ak koit Judah eng' Jerusalem ne ng'ootaat.

²¹ Amu ki tonon laitoryatap Babilon eng' ole pesiap oor, eng' ole pesyechin ortinwek aeng'u, si kong'orso: kisaisach kipchabonik, ki sa kanamonik, kibir moet kogeer kooet.

²² Ki mi eunnyi ne po tai ng'oorset agobo Jerusalem, si konde injinisyek che kibutisye, si koseng'eng'ji parisyet, ak kowaach miising', konde injinisyek taitap ormariichok, kowasyi ng'ung'unyek, koteech irimoik.

²³ Ak egu nooto eng' icheek ng'oorset ne po puch eng' tainnywa, eng' icheeget che ki koyasyechi kayasyosyek: ago ibwaatyin icheek yaityet, si kobiit kenam.

²⁴ Mwaei anyun Kiptaiyat Kamuktaindet ne Toroor kole: Amu ki ogoonu kibwaat yaityeng'wong', amu kigeng'aany pistaosyekwok kotook, kot kotook tengekwogikwok eng' poisyonikwok tugul; amu ki kibwaatak, kenamok anyun kityo.

²⁵ Ee inyee ne ya, ne ki kiguotenin ne po meet, pounindetap Israel, ne kagonyo peetuunnyi, eng' peetuusyegap yaityet ne po let;

²⁶ mwaei Kiptaiyat Kamuktaindet ne Toroor kole: Inemu chepkulet ak ireegu naaryeet: ma koigeitu niito kogeny: ieet nooto ming'in, ak iming'in nooto toroor.

²⁷ Agabui, agabui, agabui; ma kobiitu nooto kogeny, kot konyo ne nyoljin kobunji; si agoochi ineendet.

²⁸ Maoten inyee weeriitap chii, ile, Mwaei Kiptaiyat Kamuktaindet ne Toroor agobo lagogap Ammon, ak agobo teweernatennywa, kole; mwaa ile, Rotwetap chok, kaging'us rotwetap chok, kagesit agobo parisyet, si kobiit kobaris, si koigei kalyeleet:

²⁹ kota kogeerchinin tangoita, kota kong'orei lembechek agobo inyee, si kondein kaatwegap kiptengeginik che ki kiguoten ne po meet, che kagonyo peetuunywa, eng' peetuusyegap yaityet ne po let.

³⁰ Ker rotwetap chok. Arwoogun eng' ole ki kiyaenen, eng' emet ne ki kisikyinin.

³¹ Ak aroong'jin nereegekyuk; aguutyinin maatap nereegekyuk: ak andein eunegap piik che uu tyong'ik, che ng'oomen eng' ng'emisyet.

³² Iegu kweenik che kilaali; kitumjin korotiguk kwenutap emet. Ma kibwaatin kogeny; amu kamwae anee Kamuktaindet ne Toroor ng'olyoondoniito.