EZEKIEL 20 - BUKUIT NE TILIIL Sireet ne Dutero Kanon

Kandochinetap Israel nganda ngelelik

¹ Ak eng' kenyiit ne po tisap, eng' arawetap muut, peetuut ne po taman ne po arawanooto, kobwa poisyek alage che po Israel kobwa koteepse Kamuktaindet ne Toroor, ak kotep ng'wony eng' tainnyu.

² Ak ki nyoonjo ng'olyootap Kamuktaindet ne Toroor, koleenjo,

³ Weeriitap chii, ng'alaalji poisyegap Israel, ileenji, mwaei Kiptaiyat Kamuktaindet ne Toroor kole, kaobwa oteepsena? Mwaei Kiptaiyat Kamuktaindet ne Toroor kole, ko uu ye asabe, koma chame oteepsena.

⁴ Tos irwookyini icheek, ee weeriitap chii, tos irwookyini icheek? Iboorchi icheek konai tuguuk che kiwechei che po kwanisyekwak;

⁵ ak ileenji, mwaei Kiptaiyat Kamuktaindet ne Toroor kole: Eng' peetuut ne ki alewen Israel, ak ayogoochi eunnyu iyoteetap kootap Jakobo, ak aboorchigei icheek eng' emetap Misiri, ye ki ayogoochi eunnyu icheek aleenji, Aa Kamuktaindet ne Toroor Kamuktaindeng'wong';

⁶ ki ayogoochi eunnyu icheek eng' peetuunooto, amutu icheek komong' eng' emetap Misiri kobwa emet ne ki amararchi icheek, ne nyiitaat cheego ak kumyat, ne toroornatetap emotinwek tugul:

⁷ ak ki amwachi icheek aleenji, Ingometo chii age tugul eng' okweek tuguuk che kiwechei che kochamei konyekyik, amat ong'wanitegei kanamonigap Misiri: aa Kamuktaindet ne Toroor Kamuktaindeng'wong'.

⁸ Ago ki ingelelja, ma cham kogasa iit; ma meto chii age tugul eng' icheek tuguuk che kiwechei che ki chamei konyekwak, ama meto kanamonigap Misiri: amwa anyun ale, Aroong'jini icheek nereegekyuk che ng'woneen, si kobiit ayai nereegekyuk kosulda eng' icheek eng' emetap Misiri.

⁹ Ago ki aboisye amu kainennyu, si ma kimurwon kogeerei pororyosyek, che ki mi icheek kwenunnywa, pororyosyek che kigeerei aboorchinigei icheek, amutu komong' eng' emetap Misiri.

¹⁰ Amutu anyun icheek komong' eng' emetap Misiri, amutu kobwa surkwen.

¹¹ Ak ki agoochi icheek ng'atuutikyuk, ak aboorchi kirwoogutikyuk, che ngo yai chii kosabei eng' chooto.

¹² Ki agoochi icheek kogeny sabatosyekyuk ak icheek, koek kaboorunet eng' kwenunnyu, anee ak icheek, si kobiit konai kole aa Kamuktaindet ne Toroor ne atabaani icheek.

¹³ Ago ki ingelelja kootap Israel eng' surkwen: ma pendate ng'atuutikyuk, ak ki eesyo kirwoogutikyuk, che ngo yai chii kosabei eng' chooto; ki imurwon icheek miising' sabatosyekyuk: ki amwa anyun ale, aroong'jini icheek eng' surkwen nereegekyuk che ng'woneen si agees icheek.

¹⁴ Ago ki aboisye anyun kainennyu, si ma kimurwon eng' taitap pororyosyek, che kigeeronu icheek amutu komong'.

¹⁵ Kogeny, ki ang'werere icheek eunnyu eng' surkwen, ale mamuti icheek koba emet ne ki agoochi, ne nyiitaat cheego ak komi kumyat eng' chaang'indo, ne toroornatetap emotinwek tugul;

¹⁶ amu ki eesyo kirwoogutikyuk, ama pendate ng'atuutikyuk ak komurwon sabatosyekyuk: amu ki isubot mugulelwekwak kanamonikwak.

¹⁷ Nganda uu nooto, kogiriree kondanyu icheek si ma ng'em, ama ageesu icheek eng' surkwen.

¹⁸ Ak ki aleenji lagokwak eng' surkwen, Amobendate ng'atuutigap kwanisyekwok, anan osup kirwoogutikwak, anan ong'wanitegei kanamonikwak;

¹⁹ aa Kamuktaindet ne Toroor Kamuktaindeng'wong'; obendate ng'atuutikyuk, ak oriip kirwoogutikyuk ak oyai;

²⁰ ak otabaan sabatosyekyuk; si koek kaboorunet eng' kwenunnyo, anee ak okweek, si kobiit onai ole aa Kamuktaindet ne Toroor Kamuktaindeng'wong'.

²¹ Ago ki ingelelja ak icheek lagok; ma pendate ng'atuutikyuk anan koriip kirwoogutikyuk, koyai, che ngo yai chii kosabei eng' chooto; ki imurwon icheek sabatosyekyuk: amwa anyun ale aroong'jini icheek nereegekyuk che ng'woneen si kobiit ayai nereegekyuk kosulda eng' icheek eng' surkwen.

²² Ago ki aiste eunnyu, ki aboisye amu kainennyu, si ma kimurwon eng' taitap pororyosyek, che kigeeronu icheek amutu komong'.

²³ Ak ki ang'werere icheek eunnyu eng' surkwen, si kobiit aseer icheek eng' pororyosyek, ak aiyeste icheek koyom emotinwek;

²⁴ amu ma yai kirwoogutikyuk, ago ki eesyo ng'atuutikyuk, ak komurwon sabatosyekyuk, ak ki isuboti konyekwak kanamonigap kwanisyekwak.

²⁵ Ki agoochi anyun kogeny ng'atuutik che ki ma ko myachen, ak kirwoogutik che masabe;

²⁶ ak ki amurwon icheek eng' konunoikwak icheegei, amu ki igoito lagok tugul che yaatei iyoteet kobun maat, si kobiit agoochi icheek kobononso, si konai kole aa Kamuktaindet ne Toroor.

²⁷ Nooto anyun, ee weeriitap chii, ng'alaalji kootap Israel ileenji icheek, Mwaei Kiptaiyat Kamuktaindet ne Toroor kole: Kigochuba kwanisyekwok kogeny eng' niito amu kachiliilutyet ne ki yaiywo.

²⁸ Amu ye kinga muutu icheek kobwa emet, ne ki aitoochi eunnyu agoochi, kogeer tulweet age tugul ne kooi, ak keetit age tugul ne nyigiis, ak ki igoito eng' olooto korosekwak, ak ki igoito eng' olooto kagoochinoikwak che po tagisyet, kibeelei kogeny nyamdutikwak, ak koroong'ji olooto kagoochinoikwak che kieei.

²⁹ Yeityo aleenji icheek, Po nee komosta ne toroor ole obendi? Ki kiguure anyun yooto Bama agoi rani.

³⁰ Mwachi anyun kootap Israel ileenji, mwaei Kiptaiyat Kamuktaindet ne Toroor kole: Tos omurwonige ko uu piteetap kwanisyekwok? Ak oyae kugoinatet osubi tuguukwak che kiwechei?

³¹ Ak ye ogoitoi kagoochinoikwok, ye ogoitoi weeriikwok kobun maat, ko tos ma omurwonegei kanamonikwok agoi rani? Ko tos oteepsena, okweek kootap Israel? Mwaei Kiptaiyat Kamuktaindet ne Toroor kole, ko uu ye asabe, koma achame oteepsena:

³² ak ma piitu agot kitigin nooto obwaati; amu omwae ole, “Kigergeitu ak pororyosyek, ak kergeitu ak ortinwegap emotinwek, keoot keetiik ak koik.”

Kaweegunetap Israel

³³ Mwaei Kiptaiyat Kamuktaindet ne Toroor kole, iman, ko uu ye asabe, aegu laitoryat aboiywok eng' euut ne kiim, ak eng' euut ne chuulaat, ak eng' nereegek che ng'woneen che rong'ugei.

³⁴ Ak amutwok omong'u eng' pororyosyek, ak ayumak eng' euut ne kiim, ak eng' euut ne chuulaat, ak eng' nereegek che ng'woneen che rong'ugei, omang'une emotinwek ole ki kiseerchok;

³⁵ ak amutwak obwa surkwen ne po pororyosyek, ak agerak kong' kimni eng' olooto.

³⁶ Ko uu ye ki agere kong' kwanisyekwok eng' surkwen ne po emetap Misiri, agerok kong' anyun ko uu nooto, mwaei Kiptaiyat Kamuktaindet ne Toroor.

³⁷ Ak amutak obun kurereetap kirokto, ak amutwak obwa ratuutyetap kayomisutyet.

³⁸ Ak atiliilok aiste ngelelik eng' kwenung'wong', ak icheek che ki ingelelja; amutu icheek komong' eng' emet ne kigaba kotebee, ago ma pendi emetap Israel: si kobiit onai ole aa Kamuktaindet ne Toroor.

³⁹ Ago eng' okweek, ee kootap Israel, mwaei Kiptaiyat Kamuktaindet ne Toroor ko uu ni kole: Ngot ko moepcha iit; obe anyun ak koot chii tugul kanamonikyik eng' peetuusyek che pwoonei ak icheek: ago ma omurwoni kainennyu ne tiliil kogeny eng' kagoochinoikwok, ak eng' kanamonikwok.

⁴⁰ Amu tuun ota koot komugul ne po Israel eng' tulweennyu ne tiliil, eng' tulweet ne kooi ne po Israel, ota icheek tugul eng' emet, mwaei Kiptaiyat Kamuktaindet ne Toroor: ataache icheek eng' olooto, ak amagenak eng' olooto kagoochinoikwok, ak tongoanigap kagoochinoikwok, kobooto tuguukwok tugul che tiliileen.

⁴¹ Ataachok ko uu nyamdutyet ne anyiny, ye amutwok omang'une pororyosyek, ak ayumak omang'une emotinwek ole ki kiseerchok; ak aegu ne itabaanat eng' okweek kogeerei pororyosyek.

⁴² Ak onai ole aa Kamuktaindet ne Toroor, ye amutwok obwa emetap Israel, emet ne ki aitoochi eunnyu ale agoochini kwanisyekwok.

⁴³ Ak obwaat eng' olooto ortinwekwok ak poisyonikwok tugul, che ki ong'wanitegei; ak osaske amu yaitwogikwok tugul che ki oyai.

⁴⁴ Ak onai ole aa Kamuktaindet ne Toroor, ye kaaboisye agobo okweek amu kainennyu, ma ko uu ortinwekwok che yaacheen, ama ko uu poisyonikwok che samis, ee okweek kootap Israel, mwaei Kiptaiyat Kamuktaindet ne Toroor.

Maonateet agobo Murot ne po Tai

⁴⁵ Ak ki nyoonjo ng'olyootap Kamuktaindet ne Toroor, koleenjo,

⁴⁶ Ee, weeriitap chii, tokyi togeng'ung' murot tai ak imwachi ng'aleeguk murot tai, ak imaotenji timdap emetap Negeb;

⁴⁷ ak imwachi timdap murot tai, ileenji, kas ng'olyootap Kamuktaindet ne Toroor; Mwaei Kiptaiyat Kamuktaindet ne Toroor kole: Keero, anaami maat eng' kwenung'ung', ak kobeel keetit age tugul ne tuon, ak keetit age tugul ne yaamaat: ma kimisi liplibenetap maata, ak komel togoochik tugul kobooch murot tai agoi murot kaataam.

⁴⁸ Ak kogeer piik tugul kole aa Kamuktaindet ne Toroor ne kanaami maata: ma kimisi.

⁴⁹ Amwa anyun ale, ee, Kiptaiyat Kamuktaindet ne Toroor! Mwaei icheek agobo anee kole, tos ma ng'alaalindet ne po kalewenaik ineendet?