EZEKIEL 2 - BUKUIT NE TILIIL Sireet ne Dutero Kanon

Keguurei Ezekiel

¹ Ak kimwaiwo koleenjo, Ee, weeriitap chii, tonon, si ang'alaalun.

² Ak ye ki ng'alaalwo ineendet, konyoonjo anyun kabuusetap Kamuktaindet ak konama atonon; ak ki agas kong'alaalwo ineendet.

³ Kimwaiwo koleenjo, Ee, weeriitap chii, kayookten iwe emetap piigap Israel, ye mi pororyosyek che ngelelik, che ki kongelelja; ki kongelelja icheek kobooto kwanisyekwak agoi peetuuni.

⁴ Ak ma tinye kalilanet lagok ak ko uueen mugulelwekwak. Kayookten iwe ye mi pichooto, ak ileenji icheek, mwaei Kiptaiyat Kamuktaindet ne Toroor ko uu niito.

⁵ Agot ngo kas icheek anan koma kas, (amu icheeget ko koot ne ngelelyo,) ko tuun naei kole kimi maotyot kwenunnywa.

⁶ Meiywei icheek anyun inyee, weeriitap chii, anan iywei ng'aleekwak. Meiywei agot ngo yiemin katook che rutei piich ak che toorei piich ak imenye kwenutap tagolik. Meiywei ng'aleekwak anan itoptoben eng' togoochikwak, agot nganda koot ne ngelelyot.

⁷ Mwachi icheek ng'aleekyuk, agot ngo kas anan koma kas; amu ngelelik miising'.

⁸ Ago kas inyee, ee weeriitap chii, kiit ne amwaun; amengelel ko uu koyooto ngelelyot; yaat kuting'ung' ak iam kiit ne agoonin.

⁹ Ki ageer anyun, ak ogeero ki kiyogoiywa euut ne kinamei bukuit ne mamanat.

¹⁰ Ki iito eng' tainnyu; ak ki kisir oriit ak saang'; ak kiga kisirchi yooto kateiyasyek, riirek ak nyalilwogik.