EZEKIEL 19 - BUKUIT NE TILIIL Sireet ne Dutero Kanon

Riirek agobo Israel

¹ Riir anyun agobo pounigap Israel,

² ak ile, Ki nee kamenng'ung'? Ki ng'etundo ne kotoy: kiribisi kobooto ng'etuunyik, kibaei aarekyik eng' kwenutap ng'etuunyik che neran.

³ Ak kibai age eng' aarekyik; kot koeet koek ng'etundo ne neran: ak ki ineetkei logeet, ki am piich.

⁴ Ki kas pororyosyek agobo ineendet: ak kiname keriingennywa: ak ki ichuutune kombook agoi emetap Misiri.

⁵ Ak kingo keer kamet kole kigogenis ak ki kobet kamang'unennyi, konam anyun age eng' aarekyik, ak koyai ineendet koek ng'etundo ne neran.

⁶ Ak kiwendote kwenutap ng'etuunyik ak ki ek ng'etundo ne neran: ak ki ineetkei logeet, ki am piich.

⁷ Ak ki nai kooriikwak che po laitorinik, ak king'em nganasookwak; ak kiguber emet, ak tuguugap emonooto, amu tuugeetap porisenennyi.

⁸ Ki ibookyi anyun pororyosyek eng' komoswek tugul kobunu emotinwek tugul: ak kiitoochi ineendet mestennywa, ak koname ineendet keriingennywa.

⁹ Ak ki inde ineendet korgoreet, ko rataat eng' kombook, ak komutyi ineendet laitoryatap Babilon; ki imut ineendet konyo irimoik, si mata kogas chii kutinnyi eng' tuloonoogap Israel.

¹⁰ Ki uu kamenng'ung' keetitap sabibuk eng' mbareetap sabibuk eng' korotiguk, ne ki kiminji ole neegitee peek che chaang'; kiyiei miising' ak ko nyiitaat mooriik amu peek che chaang'.

¹¹ Ak ki tinyei keetiik che kiimeen che po kirokweegap icheek che pounisyei, ak ki kieet kogoit eng' kwenutap mooriik che nyigiisen, ak ki took eng' koindonywa kobooto chaang'indap mooriikwak.

¹² Ago ki kitut eng' nereegek che ng'woneen, ki kiwiirta kwo ng'wony, ki yaamyo logoekyik eng' usoonetap kong'asiis: ki kiiri keetiikyik che kiimeen ak koresyo; kilalyo kogeskei eng' ma.

¹³ Kogeminji anyun surkwen, eng' emet ne yaamaat ne ma mi peek.

¹⁴ Ak kagomisok maat eng' keetiigap mooriikyik, kogobeel maat logoekyik, kot koma kotinyei keetit ne kiim ne egu kirokto ne po pounateet. Po niito riirek, ak egu riirek.