EZEKIEL 18 - BUKUIT NE TILIIL Sireet ne Dutero Kanon

Nyooru chii age tugul ko uu poisyonikyik

¹ Ki nyoonjo kogeny ng'olyootap Kamuktaindet ne Toroor, koleenjo,

² Obooru nee si oboisyee kalewenoni agobo emetap Israel, oleen, Ki koam kwanisyek sabibuk che mindilileen, ak kiliil kelegap lagok?

³ Mwaei Kiptaiyat Kamuktaindet ne Toroor kole ko uu ye asabe, koma oboisyee kogeny kalewenaniito eng' Israel.

⁴ Ogeero, chechuuk saboonwegap piik tugul; ko uu ye nenyu saboondap kwanda, ko nenyu agine saboondap weeriit: meei saboondap chiito ne yaei tengekto.

⁵ Ago ngot ko po iman chii, ak koyai kiit ne po iman ak ne litit,

⁶ ak tomo koamisye tuloonook, ama tokyi kanamonik che po kootap Israel, ama ing'wanit osotyotap chiitap kokwennyi, ama riikyi kwony eng' peetuusyekyik che po arawet;

⁷ ak tomo koyachi chii kiy ne ya, ago kogoweekta kiit ne ki kiname pesendo, koweekyi chiito ne ki kiname pesendo, koweekyi chiito ne kiyaachei, ama rebe chii kiy eng' koroomnateet, ak Ki kogoochi amitwogik chiito ne amei rubeet, ak kolaaksechi ne mi aach ngor;

⁸ ineendet ne tomo kogoito tuguuk si konyoorunee kelunet ne siirtoot, ama ibei che tesatiin, ne kigoistoe eunnyi tengekto, ne ki koyai kirwooget ne po iman eng' kwenutap piik,

⁹ ne ki kowendote ng'atuutikyuk, ak koriip kirwoogutikyuk, si koyai iman, po iman chiichooto, sabei ineendet iman, mwaei Kiptaiyat Kamuktaindet ne Toroor.

¹⁰ Ngot kosich chiichooto weeriit ne rebindet, ne tumdoi korotiik, ak koyaei kiit age tugul eng' tuguuchuuto,

¹¹ ama yaei age eng' poisyonichuuto, ago kigoamisye tuloonook, ak ki kong'wanit osotyotap chiitap kokwennyi,

¹² ne ki koyachi ne ya kibananiat ak ne ma tinyei kiy, ne ki korebis eng' koroomnateet, ne tomo koweekta kiit ne ki kiname pesendo, ak ki kotokyi konyekyik kanamonik, ne ki koyai kiit ne kiwechei,

¹³ ne ki kogoito tuguuk si konyoorunee kelunet ne siirtoot, ak koip che tesatiin: tos sap chiichooto iman? Ma sabei: ki koyai tuguuchuuto tugul kiwechei: meei iman; tebee ineendet korotiikyik.

¹⁴ Ara anyun, ogeero, ngot kosich chiichooto weeriit, ne keerei tengekwogik tugul che po kwandanyi, che ki koyai, ak koywei, ama yai ko uu nooto,

¹⁵ ne tomo koamisye tuloonook, anan kotokyi konyekyik kanamonigap kootap Israel, ne tomo kong'wanit osotyotap chiitap kokwennyi,

¹⁶ ne tomo koyachi chii age tugul kiy ne ya, ne tomo koip kiy ne kiname pesendo, anan korebis eng' koroomnateet, ago Ki kogoochi amitwogikyik chiito ne amei rubeet, ak kolaaksechi ne mi aach ngor,

¹⁷ ne kigoisto eunnyi si ma twa kibananiat, ne tomo kotaach kelunet ne siirtoot anan che tesatiin, ne ki koyai kirwoogutikyuk, ne ki kowendote ng'atuutikyuk; koma meei chiichooto amu ng'oogistap kwandanyi, sabei iman.

¹⁸ Ago ne uu kwandanyi, amu kiusiis eng' kolgolyet, ak kerep tuguugap tupchennyi eng' koroomnateet, ak koyai ne ma myee eng' piikyik, ogeero, meei ineendet eng' tengektanyi.

¹⁹ Ago omwae okweek ole, Amu nee anyun si ma nam weeriit ng'oogistap kwandanyi? Ye kagoyai weeriit kiit ne po iman ak ne litit, ak koriip ng'atuutikyuk, ak koyai, kosabei ineendet iman.

²⁰ Meei chiito ne yaei tengekto: ma namei weeriit ng'oogistap kwandanyi, ama namei kwanda ng'oogistap weeriinnyi; tebee chiito ne po iman imandanyi, ak kotebee kiptengekyot tengektanyi.

²¹ Ago ngot koweek kiptengekyot kometo tengekwogikyik tugul che ki koyai, ak koriip ng'atuutikyuk tugul, ak koyai kiit ne po iman ak ne litit, kosabei iman, ma meei.

²² Ma kiityin ineendet agot agenge eng' pistaosyekyik che ki koyai: sabei ineendet eng' imandanyi ne ki koyai.

²³ Tos abaibai eng' meetap kiptengekyot? Mwaei Kiptaiyat Kamuktaindet ne Toroor: tos ma abaibai ngo week kometo ooreennyi si kosap?

²⁴ Ago ye week ne po iman kometo imandanyi, ak koyai tengekto, ak koyai ko uu tuguuk tugul che kiwechei che yaei chiito ne ya, ko tos sap? Ma kibwaati agot agenge eng' poisyonikyik che po iman che ki koyai: meei amu kachililutyennyi ne ki koyai, ak amu tengektanyi ne ki koyai.

²⁵ Ago omwae ole, Ma po iman ooreetap Kamuktaindet ne Toroor. Ogas anyuno, kootap Israel: tos ma po iman ooreennyu? Tos ma ortinwekwok che ma po iman?

²⁶ Ye week chiito ne po iman kometo imandanyi, ak koyai tengekto, ak kome eng' tengegoto; meei anyun amu tengektanyi ne ki yai.

²⁷ Kogeny, ye week kiptengekyot kometo tengektanyi ne kiga koyai, ak koyai kiit ne po iman ak ne litit, kosaru saboondanyi kosap.

²⁸ Amu ruchin ak kometo pistaosyekyik tugul che ki koyai, kosabei iman, ma meei.

²⁹ Ago mwaei kootap Israel kole, ma po iman ooreetap Kamuktaindet ne Toroor. Ee kootap Israel, tos ma po iman ortinwekyuk? Tos ma ortinwekwok che ma po iman?

³⁰ Arwookwok anyun, ee kootap Israel, chii age tugul ko uu ortinwekyik, mwaei Kiptaiyat Kamuktaindet ne Toroor. Oweege, ak owalage, omete pistaosyekwok tugul; si ma ek tengekto ng'emisyeng'wong'.

³¹ Omete pistaosyekwok tugul che ki kogoonok obistoe; ak ochopchigei muguleldo ne leel ak sabeet ne leel: amu nee si obegu, ee kootap Israel?

³² Amu ma abaibai eng' meetap ineendet ne meei, mwaei Kiptaiyat Kamuktaindet ne Toroor: owalage anyun, si osapche.