EZEKIEL 17 - BUKUIT NE TILIIL Sireet ne Dutero Kanon

Kipsichinik aeng' ak keetitap sabibuk

¹ Ki nyoonjo ng'olyootap Kamuktaindet ne Toroor, koleenjo,

² Ee weeriitap chii, mwa tangochet, ak imwachi kalewenet kootap Israel;

³ ileenji mwaei Kiptaiyat Kamuktaindet ne Toroor kole; Ki nyoonji Lebanon kipsiichit ne oo ne tinyei kebebaik che eecheen ak ko kooen, che nyiitaat koroorik che ki tinyei saleiywek che teer, ak koip walitap tarakwet:

⁴ ak ki ep temeet ne kitabanu parak ne ki namgei ak che ng'orng'oren, ak koip kwo emetap mung'aaret; ki inde nganaseetap chemung'arainik.

⁵ Ki ip kogeny kesweek che po emonooto, ak kwo kogoolji ng'ung'unyek che akwaen; kilechi ole neegitee peek che chaang'; kimin ko uu koibeiyot.

⁶ Ak ki piit ak koek keetitap sabibuk ne tebeesitu ne ma koitu, ne arung'jingei mooriikyik, ak komi tigitikyik kurerennyi: ki ek anyun keetitap sabibuk, ak kosich mooriik, ak kong'atyo.

⁷ Ki mi kogeny kipsiichit age ne oo ne ki tinyei kebebaik che eecheen ak koroorik che chaang': ak ogeero, ki aruny keetito po sabibuk tigitikyik, kotokyi kipsichinooto, ak kowakta mooriikyik kotokyigei ineendet, eng' kererchosyek ole kiga kiminji, kole si kobise peek kipsichinooto.

⁸ Kiga kiminji ng'ung'unyek che myachen eng' ole neegitee peek che chaang', si kobiit kowakta mooriik, si kobiit kooi logoek, si kobiit koek keetit ne karaaran ne po sabibuk.

⁹ Mwa inyee ile, Mwaei Kiptaiyat Kamuktaindet ne Toroor kole: Tos myeeitu? Tos ma ituti kipsichinooto tigitikyik, ak koep logoekyik, si kobiit kores, si kobiit koresyo sogekyik tugul che ng'orng'or; agot ngo ma mi kimnateet ne wo anan piik che chaang' che itutu?

¹⁰ Ee, ogeero, tos myeeitu ye kagemin? Tos maresei tugul, ye usyi usoonetap kong'asiis? Resei eng' kererchosyek ole kibiitee.

¹¹ Ki nyoonjo kogeny ng'olyootap Kamuktaindet ne Toroor koleenjo,

¹² Mwachi anyun koot ne ngelelyot, ileenji, Tos mongen ole teptoi tuguuchu? Mwachi icheek, ileenji, ogeero, kigonyo Jerusalem laitoryatap Babilon, ak koluul laitoryandennyi, ak pounikyik, ak komut icheek kobwa Babilon.

¹³ Ak kiluul iyoteetap laitoryat ak koyomiskei kobooto ineendet: kibirchi kogeny ineendet eng' kayasyoet, ak komut piik che kiimeen che po emet

¹⁴ kole si kobiit konyeratit pounateet, si ma imuuch koeetkei, ago si kobiit kotonon ye riibei kayomisennyi.

¹⁵ Ago ki ingelelji ineendet amu ki iyookto tononjinikyik koba Misiri, si kobiit kogoochi ineendet paraisisyek ak piik che chaang'. Tos kiberuuri? Tos chilil ineendet ne yaei tuguuk che uu chooto? Tos put kayomiset, ak kochilil?

¹⁶ Mwaei Kiptaiyat Kamuktaindet ne Toroor kole ko uu ye asabe, meei ineendet iman eng' ole menyei laitoryat ne ki indoi ineendet koek laitoryat, ne ki sas kayosyennyi, ak kibut kayomisennyi, meei kobooto ineendet eng' Babilon.

¹⁷ Ama tilei kiy eng' ineendet Pharaoh kobooto lugeennyi ne kiim, ak kweanet ne oo, eng' lugeet, ye irurugot ng'ung'unyek koek tuloonook ak koteech irimoik, si kobar piik che chaang'.

¹⁸ Amu Ki kogas kayasyoet kobut arorutyet, ak ogeero, kigonde eunnyi ago ki koyai tuguuchooto tugul; ma chilili.

¹⁹ Mwaei anyun Kiptaiyat Kamuktaindet ne Toroor kole: Ko uu ye asabe, aipchini iman metinnyi kayosyennyu ne Ki kogas ak kayomisennyu ne ki kobut.

²⁰ Ak aiitochini mestennyu ineendet, ak konam mestennyu ineendet ak amut ineendet kwo Babilon, ak ager kong' ineendet eng' olooto amu ngelelnateet ne ki ingelelja.

²¹ Ak kebare rotwetap chok piikyik tugul che kimweei eng' kweanaikyik tugul, ak kiseerat che ng'etu koba usoonet age tugul: si onai ole aa Kamuktaindet ne Toroor ne koamwa ng'olyoondoniito.

²² Mwaei Kiptaiyat Kamuktaindet ne Toroor kole: Aibe kogeny walitap tarakwet ne kooi ak amin; ak aep temeet ne ng'arng'ar, eng' mooriikyik che ng'orng'or che tabanu parak, ak aminji tulweet ne kooi ne tagunoot.

²³ Aminjini tulweet ne kooi ne po Israel: ak kowakta, ak kooi logoek, ak koek tarakwet ne myee: ak komeny kelunnyi toriitik alak tugul che tirirendos; menyei toriitichooto urwetap mooriikyik.

²⁴ Si konai keetiik tugul che po timiin kole aa Kamuktaindet ne Toroor ne ki achooru keetit ne kooi, ak aeet keetit ne ming'in, ak ayaam keetit ne tuon, ak agoochi keetit ne yaamaat kotunen: kaamwa anee Kamuktaindet ne Toroor, ak ayae.