EZEKIEL 16 - BUKUIT NE TILIIL Sireet ne Dutero Kanon

Nganaseetap Jerusalem ne ma po iman

¹ Ki nyoonjo kogeny ng'olyootap Kamuktaindet ne Toroor, koleenjo,

² Ee weeriitap chii, iboorchi Jerusalem konai tuguukyik che kiwechei,

³ ak ileenji, mwachin Kiptaiyat Kamuktaindet ne Toroor Jerusalem kole: Sigeng'ung', ak ole ki kisikyinin ko po emetap kanaanindet: ki kwandang'ung' Amorindet, ak ki kamenng'ung' Hitindet.

⁴ Ki ma kotil mugeng'ung' eng' ole ki kisikyinin, eng' peetuut ne ki kisichin, ama kiuunin si itiliiliitu; ma ki ilenen muunyuk, ama kinamden ngor.

⁵ Ma rireenen chii, koyaun kiy age tugul eng' tuguuchuuto, koriir moo; ago ki kiwiirchin timiin, amu ki kiwechin, eng' peetuut ne ki kisichin.

⁶ Ak kinga siir ye ki imi, ageerin ikwarkwarane korotiguk, aleenjin, Agot nganda imi korotiguk, isap inyee; ee, ki aleenjin, Agot nganda imi korotiguk, isap inyee.

⁷ Ki agoonin itesage ko uu ye ing'atos tuguugap mbar, ak ki itesage ieetu, ak ki igararanitu miising'; kigogun kinaiguk, ak kigogoeegitu suumeeguk; ago ki imi puch aach ngor.

⁸ Ak kinga pun ye imi, ageerin, keero, peetuusyeguk ko ki po peetuusyegap chamyet; ak ki atugunen ngoryennyu ak atuch aach ngoryeeng'ung': ee, ki ayosyeun, ak ki koyomiske ak inyee, mwaei Kiptaiyat Kamuktaindet ne Toroor, ak ki ibunjo.

⁹ Ki aunin anyun; ee, ki aunde miising' korotiguk, ak ki aiiliin.

¹⁰ Ki alaagun ngoroik che ki kinde lelesta, ak ki alaagun kweonigap mengichigap peek, ak ki auenen katanit ne karaaran, ak atugenen aririt.

¹¹ Ki alelesanunenen kogeny tuguuk che po lelesta, ak ki alaagun kariigap eunek ak sirimdo ne po kaating'ung'.

¹² Ak ki ande peteiyot serung'ung', ak ki ande munaok itiiguk, ak alaagun naaryeet ne karaaran.

¹³ Ki kilelesonun anyun eng' thahabu ak fedha; ak ki po katanit ne karaaran ngoroiguk, ak aririt, ak ngoroik che ki kinde lelesta; ki iam peek che ng'ootiin che tambulul, ak kumyat, ak mwanik: ak ki igararanitu kot, ak ki kiberuurin kot inyooru atebeetap laitornatet.

¹⁴ Ak ki yom pororyosyek kalasunetap karaaranindang'ung'; amu ki igeesunotkei karaaraninooto, amu eetunatennyu ne kiga alaagun, mwaei Kiptaiyat Kamuktaindet ne Toroor.

¹⁵ Ago kiitiegei karaaranindang'ung', ak iyai kugoinatet amu kalasuneng'ung', ak ki oipkei ak age tugul ne siirtoi; ki punji ineendet.

¹⁶ Ak ki ip ngoroiguk ak iyachigei komoswek che torooreen che ki ilelesane saleiywek che teerchiin, ak iyae chooto kugoinatet: ma kobiitu tuguuk che uu chooto, ama ko yaaksei ko uu nooto.

¹⁷ Ki ip kogeny sonoeguk che korooron che po thahabusyekyuk ak fedhaisyekyuk, che kiga agoonin ak iyachinegei itoonwegap murenik, ak oyai kugoinatet ak tuguuchooto;

¹⁸ ak ki ip ngoroiguk che ki kinde lelesta, ak ituge tuguuchooto, ak ki inde tainnywa mwanikyuk ak nyamdutikyuk che kibeelei.

¹⁹ Ki inde tainnywa kogeny amitwogikyuk che ki agoonin, peek che ng'ootiin che tambulul, ak mwanik, ak kumyat, che ki abaenen, ki inde tainnywa koek nyamdutyet, ak ki tebi ko uu nooto; mwaei Kiptaiyat Kamuktaindet ne Toroor.

²⁰ Ki inam kogeny weeriiguk ak tiibiiguk, che ki isikwa, ak ieng'ji icheek si kobiit koam. Tos ki kiit ne ming'in kugoinatosyeguk,

²¹ kot ibar lagokyuk ak igoite kobun maat igoochini icheek?

²² Ama ibwaat eng' tuguuguk tugul che kiwechei, ak eng' kugoinatosyeguk, peetuusyegap ming'inateng'ung', ye ki imi puch aach ngor, ak ki ikwarkwarane korotiguk.

²³ Ak kingo pata yaitwogiguk tugul, (Pwo! Pwo! Inyee! Mwaei Kiptaiyat Kamuktaindet ne Toroor,)

²⁴ iteekyigei ole tagunoot ak iyachigei ole kitororit eng' ooreet age tugul.

²⁵ Ki iteech oldang'ung' ole kitororit eng' tabandap ooreet age tugul, ak iyai karaaranindang'ung' koek kiit ne kiwechei, ak oipkei ak age tugul ne siirtoi, ak ites kugoinateng'ung'.

²⁶ Ki iyai kogeny kugoinatet kobooto Misiriik, piigap kokweng'ung', piigap poorto; ak ki ites kugoinateng'ung', itacha.

²⁷ Keer anyun, kaachuul eunnyu atokyin, ak atil amitwogiguk che po kotugul, ak agoiten koyaun kiy age tugul icheek che wechin, tiibiigap Philistiik, che ililandos amu ortinweguk che yaach.

²⁸ Ki iyai kogeny kugoinatet kobooto Asurik, amu ki ma koyamin kiy; ee ki iyai kugoinatet kobooto icheek, ago ma yamin kora.

²⁹ Ki ites kugoinateng'ung' eng' emetap Kanaan, agoi Kaldea; ago ma yamin kora.

³⁰ Nyalulat ne tya muguleldang'ung', mwaei Kiptaiyat Kamuktaindet ne Toroor, amu iyae tuguuchuuto tugul, poisyetap chepkugoniot ne pou piik;

³¹ amu iteeche oldang'ung' ole tagunoot, ak iyachigei oldang'ung' ole kitororit eng' ooreet age tugul; ama iige chepkugoniot, amu isase alisyet.

³² Osotyot ne yaei ibeetapkei! Ne ibegei ak toek kometo manong'otyondennyi!

³³ Igoochin pichooto chepkugonik tugul asoya: ago igoochini inyeendet tuguuguk che po kagaigaet chamaniguk tugul, ak igaigae icheek tuguuchooto, si kobiit kobwonjin eng' komosta age tugul agobo kugoinatosyeguk.

³⁴ Ak oterchine ak kwonyiik alak eng' kugoinatosyeguk, amu ma mi chii ne suubin oipkei: ialisyei, ak amu ma ki alin, ii teer amu nooto.

Kirwookyin Jerusalem

³⁵ Kas anyun, ee chepkugoniondoni, ng'olyootap Kamuktaindet ne Toroor:

³⁶ Mwaei Kiptaiyat Kamuktaindet ne Toroor kole amu ki kirong' simdang'ung', ak keng'aanyin kegeerin imi aach ngor eng' kugoinatosyeguk che ki iyai ak chamaniguk; ak amu kanamonik tugul che po tuguuguk che kiwechei, ak agobo korotiigap lagoguk che ki igoochi icheek;

³⁷ nooto anyun, keero, ayumi chamaniguk tugul, che ki obaibaige, icheek tugul che koichame, ak icheek tugul che koiweche; ayumjinin icheek kobun komosta age tugul, ak ang'aang'ji icheek kogeerin imi aach ngor, si kobiit kogeer aach ngoryeeng'ung' tugul.

³⁸ Ak arwoogun, ko uu ye kirwookyin kwonyiik che putei kayosyetap katunisyet, ak che tumdoi korotiik; ak aibun korotiigap nereegek che ng'woneen ak ng'etkonda.

³⁹ Ak andein eunekwak, ak kobut oldang'ung' ne tagunoot, ak kobut oldinweguk che kitororitu; ak koreegunenen ngoroiguk, ak koip sonoeguk che korooron: ak kobagachin imi puch aach ngor.

⁴⁰ Ak komutun kogeny tuiyet kobookyin, ak kolagenen koik, ak kotoorin eng' rotonikwak po chok.

⁴¹ Ak kobeel kooriguk, ak koyaun kirwoogutik eng' taitap kwonyiik che chaang'; ak aeetenen kugoinatet, ama ialisyei kogeny.

⁴² Ageesu anyun nereegekyuk che ng'woneen eng' inyee, ak koistoenengei ng'etkondanyu, ak asiis, ma anereechi kogeny.

⁴³ Amu ma ibwaat peetuusyegap ming'inateng'ung', ago ki itacha eng' tuguuchuuto tugul; ko uu nooto, kaaweegu poisyoniguk kotebee paragung'ung', mwaei Kiptaiyat Kamuktaindet ne Toroor. Tos ma iyai yaityoni itesyi tuguuguk tugul che kiwechei?

Kalewenet agobo kamet ak chepto

⁴⁴ Keero, age tugul ne poisyee kalewenaik, koboisyee kalewenoni agobo inyee, koleen, Kiit ne uu kamet, ko uu nooto chepto.

⁴⁵ Ii cheptap kamet, ne wechei manong'otyondennyi ak lagokyik; ak ii chepto ne otupche ak chepkametwogiguk, che kiweche manong'otaikwak ak lagokwak: ki po kamenng'ung' Hitik, ko po kwandang'ung' Amorik.

⁴⁶ Chepkameng'ung' ne oo ko Samaria, ne menyei komostap eung'ung' ne po kaataam, ineendet ak tiibiikyik; ak chepkameng'ung' ne ming'in, ne menyei komostap eung'ung' ne po tai, ko Sodom ak tiibiikyik.

⁴⁷ Ago ma isup ortinwekwak, anan isup iyai tuguukwak che kiwechei; ago, nda ki kiit ne ming'in nooto, ko ki iyaitu inyee kosiir icheek eng' ortinweguk tugul.

⁴⁸ Mwaei Kiptaiyat Kamuktaindet ne Toroor kole ko uu ye asabe, tomo koyai Sodom chepkameng'ung', ineendet anan ko tiibiikyik, ko uu ye ki iyai inyee kobooto tiibiiguk.

⁴⁹ Keero, kimii tengektap chepkameng'ung' Sodom; ki tinyei ineendet ak tiibiikyik menoteet, piyeng'do, ak poroteetap talbisto; ama igimit eunegap kibananook ak che ma tinyei kiy.

⁵⁰ Ak kimendos icheek, ak koyaei kiit ne kiwechei eng' tainnyu: ki aiste anyun icheek ko uu ye ki ageer ale nyolu.

⁵¹ Ama yai Samaria tengekwogik che siirei kebebertap tengekwogiguk; ago koites tuguuguk che kiwechei, kosiir icheek, ak koiityi imanda chepkametwogiguk eng' tuguuk tugul che kiwechei che koiyai.

⁵² Ip inyee kobunjiin kalilaneng'ung' amu koirwookyi chepkametwogiguk; po imanda icheeget kosiirin amu tengekwogiguk che koiyai che kiwechei kosiir chooto koyai icheeget: ee, ii teweeroksei aginye, ak iip kalilaneng'ung', amu koiityi imanda chepkametwogiguk.

Kiteechei kogeny Sodom ak Samaria

⁵³ Ak aweech kogeny icheek che kigeluul, che kigeluul che po Sodom kobooto tiibiikyik, ak che kigeluul che po Samaria, kobooto tiibiikyik, ak che kigeluul che po luuleniguk che mi kwenunnywa;

⁵⁴ si kobiit iipchigei kalilaneng'ung', ak ililan amu tugul che koiyai, amu ii kagaigaindennywa.

⁵⁵ Ak koweekyigei chepkametiniguk, Sodom ak tiibiikyik, atebwennywa ne ki po tai, ak koweekyigei Samaria ak tiibiikyik atebeennywa ne ki po tai, ak iweekyigei inyee ak tiibiiguk, atebeeng'wong' ne ki po tai.

⁵⁶ Amu ki ma imwa kiy agobo chepkameng'ung' Sodom eng' peetuusyegap menateng'ung';

⁵⁷ ye kitom keng'aany yaityeng'ung', ko uu eng' peetuusyegap chotisyetap tiibiigap Syria, ak ne po tugul che mi komoswekyik, tiibiigap Philistik, che sasin eng' komoswek tugul.

⁵⁸ Koiip yaityeng'ung' ak tuguuguk che kiwechei, mwaei Kamuktaindet ne Toroor.

⁵⁹ Amu mwaei Kiptaiyat Kamuktaindet ne Toroor kole: Ayaun ko uu ye koiyai, ne koisas kayasyoet ibut kayomiset.

⁶⁰ Nganda uu nooto, abwaati kayomiset ne ki kiyomiske ak inyee eng' peetuusyegap ming'inateng'ung', ak agimiitun kayomiset ne po koigeny.

⁶¹ Ibwaat anyun ortinweguk, ak ililan, ye itaache chepkametwogiguk, che eecheen ak che mengeechen: ak agoonin icheek koek tiibiiguk, ago ma eng' kayomisutyeng'ung'.

⁶² Ak agimiit kayomisennyu kobooten; si inai ile aa Kamuktaindet ne Toroor:

⁶³ si kobiit ibwaat, ak itoptoben, ametwegu kogeny, amu kalilaneng'ung'; ye kanyoun kaat tuguuk tugul che ki iyai, mwaei Kiptaiyat Kamuktaindet ne Toroor.