EZEKIEL 13 - BUKUIT NE TILIIL Sireet ne Dutero Kanon

Kirwookyin maotigap lembech

¹ Ak ki nyoonjo ng'olyootap Kamuktaindet ne Toroor koleenjo,

² Ee weeriitap chii, maotenji igirinde maotigap Israel che maoteni, ak ileenji icheek che maoteni eng' mugulelwekwak icheegei, Ogas ng'olyootap Kamuktaindet ne Toroor:

³ Mwaei Kiptaiyat Kamuktaindet ne Toroor kole: Pwo! Maotik che perber, che isubi mugulelwekwak icheegei, ak ko tomo kogeer kiy!

⁴ Ee Israel, kigoigei maotiguk lelwek eng' ong'atosyek.

⁵ Ma otogoste obe ole ki kobutok, ama ong'ot kootap Israel, si kobiit kotonon eng' pooryeet eng' peetuutap Kamuktaindet ne Toroor.

⁶ Ki kogeer icheek tangoita ak ng'oorset ne po lembech, che mwaei kole, kale Kamuktaindet ne Toroor; ama iyookte Kamuktaindet ne Toroor: ak kogoochi piik komong' kole ki kimiti ng'olyoot.

⁷ Tos ma ogeer ng'ang'utyet ne po puch, ama omwa ng'oorset ne po lembech, ye omwae ole, Kale Kamuktaindet ne Toroor: ago ma amwa kiy?

⁸ Mwaei anyun Kiptaiyat Kamuktaindet ne Toroor kole: Amu ki omwa eng' tangoita, ak ogeer lembech, ogeer anyun, aboryenok, mwaei Kiptaiyat Kamuktaindet ne Toroor.

⁹ Ak koborye eunnyu maotik che keerei tangoita, ak che ng'orei lembechek: matebee kapkirwoogetap piikyuk, ama kisirchin bukuit ole kisirchin kootap Israel, ama pendi emetap Israel; si onai ole aa Kiptaiyat Kamuktaindet ne Toroor.

¹⁰ Ee, amu ki koberber piikyuk, koleenji, kaalyeet; ama mi kaalyeet; ak ye teech chiito inaatut, ogeero, male tartaarik che ma myachen:

¹¹ mwachi icheek che malse taartaarichuuto ileenji, luulei: piitu ropta ne oo; ak koroobon koik che eecheen che po ropta; ak kobet usoonet ne oo inatunooto.

¹² Ogeero, ye luul inatunooto, ko tos ma kiteebenok keele, Mi ano malset ne ki komale inatuniito?

¹³ Mwaei anyun Kiptaiyat Kamuktaindet kole: Abete inatuniito eng' usoonet ne oo eng' nereegekyuk che ng'woneen; ak kobiit ropta ne oo eng' nereegekyuk, ak koik che eecheen che po ropta eng' nereegekyuk che ng'woneen, si kobiit kogees.

¹⁴ Abute anyun inaatut ne ki omale taartaarik che ma myachen, ak aluul kot kotook lumeiywekyik: ak kobut, ak kigeswok eng' kwenunnyi; si onai ole aa Kamuktaindet ne Toroor.

¹⁵ Ayae anyun nereegekyuk che ng'woneen kosulda eng' inatunooto, kobooto icheek che kimale taartaarichooto; ak aleenjok, Ma komi inaatut, anan icheek che kimalei;

¹⁶ chooto ko maotigap Israel che maoteni agobo Jerusalem, ak kogeerei ng'ang'utigap kaalyeet agobo nganasanooto, ama miitei kaalyeet, mwaei Kiptaiyat Kamuktaindet ne Toroor.

Kirwookyin tiibiikap lembech che maotik

¹⁷ Ee inyee weeriitap chii, iuuiit togeng'ung' igirinde tiibiigap piiguk, che maoteni eng' mugulelwekwak icheegei; ak imaoten agobo icheek,

¹⁸ ak ileenji, mwaei Kiptaiyat Kamuktaindet ne Toroor kole: Pwo! Kwonyiik che nabei lolotinwegap ndaresik che po kutung'oik tugul che po eunek, ak konap angook che po metit, che yamei chii age tugul si kobiit koriige saboonwegap piik! Tos oriiche saboonwegap piikyuk, ak osaru saboonwegap piik kobunjook?

¹⁹ Ak ki ong'wanita eng' piikyuk agobo baale che po rubeito ak kererutigap magatiinik, si obar saboonwegap piik che ma nyoljin kobek, ak osaru saboonwegap piik che ma nyoljin kosapcho amu lembechekwok che omwachini piikyuk che chamei kogas lembechechooto.

²⁰ Mwaei anyun Kiptaiyat Kamuktaindet ne Toroor kole: Ogeero, aweche lolotinwegap ndaresikwok, che oriige saboonwegap piik ko uu toriitik, ak agereeri tuguuchooto eng' eunekwok; ak atyach saboonwechooto po piik koba, saboonwechooto oriiche ko uu toriitik.

²¹ Agereeri angookwok ak icheek, ak asaru piikyuk komong' eng' eunekwok, si ma kotebee eunekwok kogeny si keriichei; si onai ole aa Kamuktaindet ne Toroor.

²² Amu ki ogoochi muguleldap chii ne po iman koaragen eng' lembechek, chiito ne ma agoochi koaragen; ak ogimiit eunegap kiptengekyot, si ma week kometo ooreennyi ne ya, ak kesar kosap:

²³ ma ogeere anyun tangoita, anan ong'orse; ak asaru piikyuk komong' eng' eunekwok; si onai ole aa Kamuktaindet ne Toroor.