EZEKIEL 12 - BUKUIT NE TILIIL Sireet ne Dutero Kanon

Kibooru luuletap Judah

¹ Ki nyoonjo kogeny ng'olyootap Kamuktaindet ne Toroor koleenjo,

² Ee weeriitap chii, imenye kwenutap koot ne ngelelyot, che tinyei koonyek che keertoe, ama keerei kiy; che tinyei itiik che kastoe, ama kasei kiy; amu icheek ko koot ne ngelelyot.

³ Ara anyun, inyee weeriitap chii, rat tuguuk agobo kautoet, ak iuu peet kogeerei icheek; ak iuu eng' komostang'ung' iwe komosta age kogeerei icheek: abeere imuuchi kobwaat, nganda icheek ko koot ne ngelelyot.

⁴ Ak iibu tuguuguk komong' peet kogeerei icheek, ko uu tuguugap kautoet: ak iwe imande inyeendet koskoleny kogeerei icheek, ko uu ye pendi piik luuleet.

⁵ Undur inaatut kogeerei icheek, ak iip tuguuguk kobun yooto.

⁶ Iibe itiinye kaat, kogeerei icheek, ak iip komanda ko kagoimen; ituche togeng'ung', si megeer emet: amu kaandein iegu kaboorunet eng' kootap Israel.

⁷ Ki ayai anyun ko uu nooto ko uu ye ki king'ata: ki aibu tuguukyuk kobwa saang' peet, ko uu tuguugap kautoet, ak ki aundur inaatut koskoleny, abalee eunnyu: ki aibu tuguukyuk kobwa saang' ko kagoimen, ak aip atiiny kaat kogeerei icheek.

⁸ Ak ki nyoonjo karon ng'olyootap Kamuktaindet ne Toroor koleenjo,

⁹ Ee weeriitap chii, tomo koteebenen kootap Israel, koot ngelelyot, koleenjin, Iyae nee?

¹⁰ Mwachi ileenji, mwaei Kiptaiyat Kamuktaindet ne Toroor kole: Po lautyoni pounindet eng' Jerusalem, kobooto koot komugul ne po Israel ole mi icheek.

¹¹ Mwa ile, Aa kaboorunet agobo okweek: ko uu ye ki ayai, keyachin icheek ko uu nooto: kiutoi, kiluulei.

¹² Ibei pounindet ne mi kwenunnywa, kotiinyi kaat, ko kagoimen, ak kwo: unduri icheek inaatut si kobiit kouutoe tuguukwak yooto: tuchei togeennyi, amu ma keerei ng'wony.

¹³ Aiitochini mestennyu ineendet, ak konam mestennyu ineendet: ak amut ineendet kwo Babilon emetap Kaldeik: ago ma keerei emonooto, nganda mechin olooto.

¹⁴ Ak aiyeste koba usoonet age tugul, piik tugul che miitei komoswekyik kotoret ineendet, ak lugosyekyik tugul; ak ang'usu rotwetap chok asube icheek.

¹⁵ Ak konai kole aa Kamuktaindet ne Toroor ye aiyeste icheek eng' pororyosyek, ak aseer icheek koyom emotinwek.

¹⁶ Ago atuuchi piik che ng'ering' eng' icheek kochililee rotwetap chok, ak rubeet, ak koroito; si kobiit kobarta tuguukwak tugul che kiwechei eng' pororyosyek ole tuun pendi; si konai kole aa Kamuktaindet ne Toroor.

¹⁷ Ki nyoonjo kogeny ng'olyootap Kamuktaindet ne Toroor koleenjo,

¹⁸ Ee weeriitap chii, am amitwogiguk eng' potanet, ak iee peeguk eng' karigisiset kobooto riibetapkei;

¹⁹ ak ileenji piigap emet, Mwaei Kiptaiyat Kamuktaindet ne Toroor agobo piik che menyei Jerusalem, ak che po emetap Israel kole: Kendoi amitwogikwak, ak koeei peekwak eng' kwong'eet, si koek karaatya emennyi eng' tuguuk tugul che mi, amu koroomnatetap piik tugul che menyei olooto.

²⁰ Ak king'emei nganasook che ki menyei, ak koguber emet; si onai ole aa Kamuktaindet ne Toroor.

Kotwoisyoksei ng'olyootap Kamuktaindet

²¹ Ak ki nyoonjo ng'olyootap Kamuktaindet ne Toroor koleenjo,

²² Ee weeriitap chii, nee kalewenoni otinye eng' emetap Israel, oleen, Kigogagei peetuusyek, ak koek puch ng'ang'utyet age tugul?

²³ Mwachi anyun icheek ileenji, mwaei Kiptaiyat Kamuktaindet ne Toroor ko uu ni kole: Ageesu kalewenoni, si ma koboisyee kogeny koek kalewenet eng' Israel; ago mwachi ileenji, kagoriik peetuusyek, ak kasuldaetap ng'ang'utyet age tugul.

²⁴ Amu ma kobiitu kogeny ng'ang'utyet age tugul ne po puch anan ng'oorset ne kilasei eng' kootap Israel.

²⁵ Amu aa Kamuktaindet ne Toroor; ang'alaali, ak kosulda ng'olyoot ne amwae; ma kigoitoi kogeny: amu amwae ng'olyoot, ak ageesu eng' peetuusyekwok, ee koot ne ii ngelelyot, mwaei Kiptaiyat Kamuktaindet ne Toroor.

²⁶ Ki nyoonjo kogeny ng'olyootap Kamuktaindet ne Toroor koleenjo,

²⁷ Ee weeriitap chii, keero, leen kootap Israel, Ng'ang'utyet ne keerei ineendet ko po peetuusyek che chaang' che pwoonei, ak komaoteni ineendet agobo peetuusyek che ta ko looen.

²⁸ Mwachi anyun ileenji, mwaei Kiptaiyat Kamuktaindet ne Toroor kole: Ma kigoitoi kogeny ng'olyoondennyu age tugul, ago isuldoi ng'olyoot ne amwae, mwaei Kiptaiyat Kamuktaindet ne Toroor.