EZEKIEL 11 - BUKUIT NE TILIIL Sireet ne Dutero Kanon

Kirwookyin pounik che yaacheen

¹ Kiganaba anyun Kabuuset ne Tiliil, ak komutwaa anyo ormariichetap kong'asiis ne po kootap Kamuktaindet ne Toroor, ne tokyingei kong'asiis: ak ogeero, kimi kurgeetap ormariichet piik tiptemu ak muut; ak ki ageer eng' kwenunnywa Jaasania weeriitap Ashur, kobooto Pelatiah weeriitap Benaiah, pounigap piik.

² Ak ki leenjo ineendet, Ee, weeriitap chii, chuuto piik che chobei yaityet, ak korwoochi kirwooget ne ya eng' nganasani:

³ che leen, Tom koriik peetuusyek che keteege kooriik: tereet nganasani, ak kibanyeek.

⁴ Maoten anyun agobo icheek, maoten, ee weeriitap chii.

⁵ Ak ki nyoonjo Kabuusetap Kamuktaindet ne Toroor, ak koleenjo, Mwa ile, Mwaei Kamuktaindet ne Toroor kole ki omwa ko uu ni, ee kootap Israel; amu angen tuguuk che obwaati.

⁶ Ki otes eng' nganasani piikwok che kibarei, ak ki onyiit ortinwekyik piik che ki kibar.

⁷ Mwaei anyun Kiptaiyat Kamuktaindet ne Toroor kole: Panyeek piikwok che kigebar che ki onde kwenutap nganaseet, ak nganasani ko tereet: ago kimutwok omang'une kwenunnyi.

⁸ Ki oiywei rotwetap chok; ak aibwok rotwetap chok, mwaei Kiptaiyat Kamuktaindet ne Toroor.

⁹ Ak amutwok omang'une kwenunnyi, ak andeok eunegap toek, ak ayai kirwoogutik eng' kwenung'ung'.

¹⁰ Obegu eng' rotwetap chok; arwookwok eng' kiwotetap Israel; si onai ole aa Kamuktaindet ne Toroor.

¹¹ Ma egu nganasani tereeng'wong', amoegu panyeek eng' kwenunnyi; arwookwok eng' kiwotetap Israel;

¹² ak onai ole aa Kamuktaindet ne Toroor: amu ma obendate ng'atuutikyuk, ama oyai kirwoogutikyuk, ago ki osup kirwoogutigap pororyosyek che mi komoswekwok.

¹³ Ak kime Pelatiah weeriitap Benaiah ye ki amaoteni, ki abut anyun kot kotiiny togeennyu ng'wony, ak ariir eng' kutit ne oo, ale, ee, Kiptaiyat Kamuktaindet ne Toroor! Tos igeesu che ki ng'et che po Israel?

Weegu `Kamuktaindet Israel

¹⁴ Ki nyoonjo anyun ng'olyootap Kamuktaindet ne Toroor, koleenjo,

¹⁵ Ee weeriitap chii, tupchosyeguk, che tupchosyeguk, piigap oreng'ung', kobooto koot komugul che po Israel, icheek tugul, chooto ko che ki komwachi piik che menyei Jerusalem, koleenji, oba ole loo eng' Kamuktaindet ne Toroor; ki kigoonech emoni kobunjech:

¹⁶ mwaa anyun ile, Mwaei Kiptaiyat Kamuktaindet ne Toroor kole: Nganda ki ayestochi icheek ole loo eng' pororyosyek, ak ki aseer icheek koyom emotinwek, kota aegu kora eng' icheek komosta ne tiliil eng' ne matya eng' emotinwek che ki koba.

¹⁷ Mwaa anyun ile, Mwaei Kiptaiyat Kamuktaindet ne Toroor kole: Ayumok omang'une pororyosyek, ak ayumok omang'une emotinwek ole ki oyestoochi, ak agoonok emetap Israel.

¹⁸ Ak koba olooto, ak koisto tuguuk tugul che samisen eng' olooto, kobooto tuguuk tugul che kiwechei, koistogei eng' olooto.

¹⁹ Ak agoochi icheek muguleldo agenge, ak ande icheek sabeet ne leel; ak aiste muguleldap koita eng' poorwekwak, ak agoochi icheek muguleldo ne po panyeek:

²⁰ si kobendatee ng'atuutikyuk, ak koriip kayomisutikyuk, ak koyai: ak koek icheek piikyuk, ak aegu Kamuktaindennywa.

²¹ Ago eng' icheeget che pendoti kosubi tuguukwak che samisen, ak tuguukwak che kiwechei, aipchini ortinwekwak metowekwak, mwaei Kiptaiyat Kamuktaindet ne Toroor.

Koistogei liilindap Kamuktaindet eng' Jerusalem

²² Yeityo kotirirenso kerubik, ak kimi tirook kobooto icheek; ak kimi paragunnywa liilindap Kiptaiyat Kamuktaindetap Israel.

²³ Ak kitogosta liilindap Kamuktaindet ne Toroor eng' kwenutap nganaseet ak kwo kotonone tulweet ne mi komostap kong'asiis eng' nganaseet.

²⁴ Ak kiganaba Kabuuset ne Tiliil, ak komutwaa eng' ng'ang'utyet eng' Kabuusetap Kamuktaindet, anyo Kaldea, agoi ait ole mi icheek che ki kiluul. Ki togosta anyun eng' ole ki ami ng'ang'utyonooto kiga ageer.

²⁵ Ki amwachi anyun icheek che kiga keluul, tuguuk tugul che kiga koboorwo Kamuktaindet ne Toroor.