EZEKIEL 10 - BUKUIT NE TILIIL Sireet ne Dutero Kanon

Ng'emisyetap Jerusalem

¹ Ki ageer anyun, ak ogeero, ki took eng' sengwetyet, ne ki mi paragutap kerubik, kiit ne ki uu koitap sapphire, ne uu itoondap kergeindap ng'echereetap laitornatet.

² Ak ki mwachi chiito ne ki ilaachi ngoryeetap katanit, koleenji chut kwenutap tirook che wirwirendos eng' kurereetap kerubik, ak inyiit euneguk tuwai ng'etetyot ne mi kwenutap kerubik, ak iseerchi nganaseet. Ak ki wo ineendet oriit ageere.

³ Ki tonondos anyun kerubik eng' komostap tai ne po koot, ye ki wendi chiichooto oriit; ak ki nyi pooldet seremut ne po oriit.

⁴ Ak ki togosta liilindap Kamuktaindet ne Toroor eng' kerubik, ak kotonone tugatugigap koot; ak ki nyi koot pooldet, ak ki nyi seremut kakweng'eetap liilindap Kamuktaindet ne Toroor.

⁵ Ak ki kigasei kirgirenetap kebebaigap kerubik agoi seremut ne po saang', ko uu kutitap Kamuktaindet Ne po Kamuktaet ye ng'alaali.

⁶ Ak ye kingo ng'at ineendet chiito ne ki ilaachi ngoryeetap katanit, koleenji, inemu maat eng' kwenutap tirook che wirwirendos eng' kwenutap kerubik. Ki wo oriit anyun ak kotonone ye neegit tireet.

⁷ Ak ki iito kerubindet eunnyi eng' kwenutap kerubik kotokyi maat ne ki mi kwenutap kerubik ak konem, ak konde eunegap ineendet ne ki ilaachi ngoryeetap katanit, ne ki nam maata ak komanda.

⁸ Ak ki took eng' kerubik ne uu eutap chiito eng' kurereetap kebebaikwak.

⁹ Ak ki ageer, ogeero, tirook ang'wan che ki mi ole neegitee kerubik, ki neegitee tireet age kerubindet age, ko neegitee tireet age kerubindet age; ak ki uu itoondap tiroochooto, itoondap koita ne kiguure berulo.

¹⁰ Ki tinyei kergeindo agenge icheek tugul ko ang'wan eng' itoondanywa, ko uu ye ki mi tireet kwenutap tireet age.

¹¹ Ye ki pendi, kobun komoswekwak ang'wan; ki ma kowelelegei kobendi, ago ki isubi komosta ne kagotokyigei ne tai ki ma kowelelegei ye ki pendi.

¹² Ak ki nyiitootiin koonyek komoswek tugul che po poorwekwak tugul, ak patoikwak, ak eunekwak, ak kebebaikwak, ak tirook, tiroochooto che ki tinyei kerubichooto ang'wanu.

¹³ Ki kiguure tiroochooto agase, tirook che wirwirendos.

¹⁴ Ak ki tinyei age tugul togoochik ang'wan: togeet ne po tai ko ki togeetap kerubindet, ak togeet ne po aeng' ko ki togeetap chiito, ak ne po somok ko ki togeetap ng'etundo, ak ne po ang'wan ko ki togeetap kipsiichit.

¹⁵ Ak kitogosta kerubik: niito ko ki it ne sabei ne ki ageer eng' ye neegitee aineetap Kebar.

¹⁶ Ak ye kingo pa kerubik, koba tiroochooto ak icheek koboiyotyin: ak kingo tirirenso kerubik kong'eetyo eng' ng'wony, koma istoegei tirook icheek.

¹⁷ Kingo tononso icheek, kotononso chu ak icheek; ak kingo togosta, kotogosta chu ak icheek: amu ki mi kabuusetap kioto sabei kobooto icheek.

¹⁸ Ak ki wo liilindap Kamuktaindet ne Toroor eng' tugatugigap koot, ak kitonone paragutap kerubik.

¹⁹ Ak kitirirenso kerubik, ak kotogosta eng' ng'wony ageere, ye kibendi, ak kimi tirook kobooto icheek; ak kitononso eng' kurgeet ne po ormariichetap kong'asiis ne po kootap Kamuktaindet ne Toroor; ak kimi paragunnywa liilindap Kiptaiyat Kamuktaindetap Israel.

²⁰ Niito ko kioto sabei ne ki ageer eng' kurereetap Kiptaiyat Kamuktaindetap Israel eng' ole neegitee aineetap Kebar ak ki anai ale kerubichooto.

²¹ Ki tinyei age tugul togoochik ang'wan ak ki tinyei age tugul kebebaik ang'wan; ak kimi kergeindap eunegap chiito kurereetap kebebaikwak.

²² Ak ki kergei togoochikwak ak togoochik che ki ageer eng' ole neegitee aineetap Kebar, icheeget kobooto itoonwekwak; kibendi age tugul kogeerei tai.