EPESOEK 6 - BUKUIT NE TILIIL Sireet ne Dutero Kanon

Lagok ak Sigiik

¹ Lagochu, ogas iit sigiikwok eng' Kiptaiyat: amu myee niito.

² Teech kwandang'ung' ak kamenng'ung' (niito ng'atuutyet ne po tai ne pooto kayomiset),

³ si kobiit komyeeit eng' inyee, si kota iwe keny eng' ng'wony.

⁴ Ak okweek, kwanisyechu, amotachatachi lagokwok, si konereekso: ago obai icheek eng' atep ne myee ak katigonetap Kiptaiyat.

Otwogik ak Kiptainik

⁵ Otwogichu, ogas iit icheek che kiptainikwok eng' poorto, eng' kaiyweisyet ak potanet, eng' muguleldo tugul, ko uu ye ogase iit Kristo;

⁶ ama eng' otwoknateet ne kigeerei, ko uu che iboiboi piik; ago ko uu otwogigap Kristo, oyae mageetap Kamuktaindet eng' muguleldo;

⁷ oyae poisyet eng' chamyet, ko uu eng' Kiptaiyat, ama eng' piik:

⁸ ongen ole kiy age tugul ne myee ne yaei chii age tugul, kotun taachei nooto kogeny eng' Kiptaiyat, ngo rataat anan kotyagat.

⁹ Ak okweek kiptainichu, oyachi icheek ak okweek ko uu nooto, amorasyini: ongen ole mi kipsengwet Kiptaiyannywa ak ko neng'wong', ama mi eng' ineendet tiytiyet ne po piik.

Kariigap lugeet che po Kamuktaindet

¹⁰ Ne po let anyun, oegu che kiimeen eng' Kiptaiyat, ak eng' kimnateetap kamugennyi.

¹¹ Olaach kariigap lugeet komugul che po Kamuktaindet, si kobiit omuuch ogirinde kaberberisyosyegap chesawilyet.

¹² Amu ma po kabelennyo pogei poorto ak korotiik, ago po laitornatosyek, ak kimnatosyek, eng' pounigap ng'wonyuni che po mesundeito, eng' lugosyegap tamirmirik che po yaityet eng' komoswegap kipsengwet.

¹³ Nooto anyun onam kariigap lugeet komugul che po Kamuktaindet, si kobiit omuuch ogirinde eng' peetuut ne ya, ak ye kaoyai tugul, otononse.

¹⁴ Otononse anyun, ko kaogermen suenutikwok eng' imanit, ak ko kaolaach karnetap tegeet ne po imanda,

¹⁵ ak ko kaoratyi keelyekwok pekyinet ne po logoiywek che myach che po kaalyeet;

¹⁶ ak onam kobooto chuun tugul long'eetap kayaneet, ne omuuchi omis kipchabonik tugul che po maat che po ineendet ne ya.

¹⁷ Ak onam kuutweetap yetunet, ak rotwetap chok ne po Kabuuset ne Tiliil, nooto ng'olyootap Kamuktaindet:

¹⁸ Osaa peetuusyek tugul eng' Kabuuset ne Tiliil kobooto saaet tugul ak kagaigaet, ak oriipsei eng' nooto eng' kagiiletapkei tugul ak kagaigaet, agobo tugul che tiliileen.

¹⁹ Ak agobo anee, si kobiit kegoono tweguunet, ayaat kutinnyu, abarta eng' nyiganateet ung'ootyet ne po logoiywek che myach,

²⁰ amu aa tononjinindet ne po nooto eng' nyororosyek; si kobiit ang'alaal eng' chooto eng' nyiganateet, ko uu ye nyolu amwa.

Ng'aleek che po let

²¹ Ago si kobiit onai ak okweek ng'aleekyuk, ole ateptoi, komwaiwok tuguuk tugul Tukiko, chamaneet ne ketupche ne kiboityot ne kiyani eng' Kiptaiyat:

²² ne koayokwok agobo ng'olyoondoniito, si kobiit onai ng'aleekyok, ak kogaigai ineendet mugulelwekwok.

²³ Ingotebi kaalyeet kobooto tupchosyek, ak chamyet ak kayaneet, che po Kamuktaindet Kwanda ak Kiptaiyat Jeso Kristo.

²⁴ Ingotep myeeindo kobooto icheek tugul che chamei Kiptaiyandennyo Jeso Kristo eng' atepto ne ma ng'emaksei.