EPESOEK 5 - BUKUIT NE TILIIL Sireet ne Dutero Kanon

¹ Oegu anyun kasubiigap Kamuktaindet, ko uu lagok che ki chamei;

² ak obendate chamyet, ko uu ye ki chamaak Kristo agine, ak kogoitogei agobo acheek, koek kagoochinet ak tiseiywot eng' Kamuktaindet ne ng'uu ne nyamdut.

³ Ago ko uu ye nyoljin piik che tiliileen ko matong'alaale eng' kwenung'wong' sokseet, ak simdo tugul, anan kasetap myat;

⁴ anan teweernat, anan ng'alaaletap abusnateet, anan roryot ne po ng'aleek che yaach, ma nyolu chooto: ago kaigai kagoitoetap kongoi.

⁵ Amu ongen niito iman ole, ma mi chii ne soksei, anan chiitap simdo, anan ne kasei myat, nooto ne saaei kanamonik, ma mi eng' chu ne nyooru poroteet eng' laitornatetap Kristo ak Kamuktaindet.

⁶ Amat koberberak chii eng' ng'aleek che ma namegei ak kiy, amu nyoonjin nereeknateet ne po Kamuktaindet weeriitap ngelelnateet amu tuguuchuuto.

⁷ Nooto anyun, amoyai yamdaet agenge ak icheek;

⁸ amu ki oo mesundeito eng' peetuusyek alak, ago oo lapkeiyet nguno eng' Kiptaiyat: obendate ko uu lagogap lapkeiyet

⁹ (amu logoiyatap lapkeiyet ko eng' myeeindo tugul ak imanda ak imanit),

¹⁰ si onai nooto taachaksei eng' Kiptaiyat;

¹¹ amoyai yamdaet ak poisyonigap mesundeito, che ma tinyei logoek, ago kaigai oger kong';

¹² amu tuguuk che yaei icheek eng' ung'oot ko teweernat ngeleen kemwa.

¹³ Ago tuguuk tugul che kigerei kong' ko ng'ang'aksei eng' lapkeiyet: amu kiy age tugul ne kiboortoi ko lapkeiyet.

¹⁴ Nooto anyun, mwaei ineendet kole, “Kosu, inyee ne irue, ak ing'eet eng' che ki kobek, ak kokwenyin Kristo.”

¹⁵ Oriipkei anyun miising' eng' ole oteptoi eng' panwekwok, ma ko uu che ma utaatiin, ago ko uu che utaatiin;

¹⁶ oboisyee saisyek komyee, amu yaacheen peetuusyek.

¹⁷ Nooto anyun amoberberitu, ago oguiye kiit ne uu mageetap Kiptaiyat.

¹⁸ Amat obogitye eng' maiyek, che ibu mageet ne ya, ago ingonyiiak Kabuuset ne Tiliil;

¹⁹ ong'alaaljinigei eng' tyenwogigap kalasunet ak tyenwogik che ki kisir ak tyenwogigap saboon, otyeni tyendo ne rurei eng' mugulelwekwok eng' Kiptaiyat;

²⁰ ogoitoi kongoi kotugul agobo tuguuk tugul eng' kainetap Kiptaiyandennyo Jeso Kristo, ogoochini Kamuktaindet, ineendet Kwanda;

Sabeetap kap chii

²¹ Oming'injigei kei eng' kaiyweisyetap Kristo.

²² Osotichu, ogas iit manong'otaikwok, ko uu ye ogase iit Kiptaiyat.

²³ Amu manong'otyot ko metitap osotyot, ko uu Kristo agine ne metitap kaniset, ineendet yetindetap poorto.

²⁴ Ago ko uu ye kase iit kaniset Kristo, ko uu nooto ak icheek osotik eng' manong'otaikwak eng' kiy age tugul.

²⁵ Manong'otaichu, ocham osotikwok, ko uu Kristo agine ne ki cham kaniset, ak kogoitogei agobo ineendet;

²⁶ si kobiit kotabaan, ko kagotiliil eng' kaunetap peek eng' ng'olyoot,

²⁷ si kobiit komutyigei kaniset, nooto ne po toroornatet, ne ma tinyei kunenden anan siring'ut anan kiy age tugul ne uu nooto; ago koek ne tiliil ne ma tinyei tisya.

²⁸ Ko uu nooto kanyolji manong'otaik ak icheek kocham osotikwak ko uu ye chamei poorwekwak icheegei. Ineendet ne chamei osotyonnyi kochamegei ineegei:

²⁹ amu ma mi chii ne wechei poortanyi; ago paei ak koriibei, ko uu kiit ne yachin Kristo agine kaniset;

³⁰ amu ki kebeberwek che po poortanyi.

³¹ Amu ng'olyoondoni, kobagaaktoi chii kwandanyi ak kamet, ak konamgei ak osotyonnyi; ak koek icheeget tuwai poorto agenge.

³² Oo ung'ootyoni: ago ang'alaali agobo Kristo ak kaniset.

³³ Ago ingocham chii age tugul osotyonnyi, ko uu ole chamdogei; ak ingogonyit osotyot manong'otyondennyi.