EPESOEK 3 - BUKUIT NE TILIIL Sireet ne Dutero Kanon

Poisyetap Paulo koamdechi Pororyosyek

¹ Amu niito anee Paulo, kimonjororyotap Kristo Jeso agobo okweek Pororyosyek,

² ngo ki ogas agobo tononjinetap myeeindap Kamuktaindet ne ki kigoono agobo okweek;

³ ko uu ye ki kiboorwo eng' ng'ang'utyet ung'ootyet, ko uu ye ki asip asir eng' tai eng' ng'aleek che ng'ering',

⁴ si, ye osomani, omuuchi oguiye ng'omnatennyu eng' ung'ootyetap Kristo;

⁵ ne ki ma kiboorchi weeriigap piik eng' ibinwek alak ko uu ye kageng'aang'ji nguno che kiyooktoi chechiik che tiliileen ak maotik eng' Kabuuset ne Tiliil;

⁶ keele, Pororyosyek ko yamdoigap nametap tuguuk, ak yamdoigap kebeberwegap poorto, ak yamdoigap arorutyet eng' Kristo Jeso eng' logoiywek che myach,

⁷ che ki kiyaena aek kiboityot, ko uu konunetap myeinooto po Kamuktaindet ne ki kigoono ko uu ye poisyei kamuktaennyi.

⁸ Ki kigoono myeini, anee, ne aa ming'in kosiir ineendet ne ming'in eng' che tiliileen tugul: aamji Pororyosyek mogornatosyegap Kristo che ma isiagaksei;

⁹ ak kiguiyechi piik tugul kiit ne uu tononjinetap ung'ootyet ne kiga kiuny kobooch kenyiisyek che ki kosiirto, eng' Kamuktaindet, ne ki toi koyai tuguuk tugul;

¹⁰ si kobiit konaak eng' kaniset nguno utaatyet ne oo ne po Kamuktaindet eng' laitornatosyek ak pounatosyek eng' komoswegap kipsengwet,

¹¹ ko uu mageetap koigeny ne kisip kolewen eng' Kristo Jeso Kiptaiyandennyo:

¹² ki tinyei eng' ineendet nyiganateet ak kamang'unet ne kiriikyine ineendet amu kiyani ineendet.

¹³ Eng' nooto anyun asoomok ale amat komeak mugulel amu nyalilwogikyuk agobo okweek, chooto ko toroornateng'wong'.

Saaet agobo somanigap siruutik

¹⁴ Amu niito anyun agutung'jini Kwanda,

¹⁵ ne nyoorunee ineendet kainennywa ooreet age tugul ne po kapchii, eng' kipsengwet ak ng'wony,

¹⁶ si kobiit kogoonok, ko uu mogornatosyegap toroornatennyi, ogimegitu eng' kamuktaet eng' Kabuusennyi eng' chiito ne po oriit;

¹⁷ si kobiit komeny Kristo mugulelwekwok eng' kayaneet; si kobiit, ye otinye tigitik ak lumdaet eng' chamyet,

¹⁸ onyooru kimnateet oguiye kobooto tugul che tiliileen ole tee tebeesindo ak koindo ak toroorindo ak loindo ne wendi ng'wony,

¹⁹ ak onai chamyetap Kristo ne siirei naet, si kobiit kinyiitak nyiyet tugul ne po Kamuktaindet.

²⁰ Ingobunji anyun ineendet ne imuuchi koyai miising' inne kosiir tugul che kisoome anan che kibwaati ko uu kamuktaet ne poisyei eng' acheek,

²¹ toroornatet eng' kaniset ak eng' Kristo Jeso agoi ibinwek tugul che po koigeny ak koigeny. Amen.