EPESOEK 2 - BUKUIT NE TILIIL Sireet ne Dutero Kanon

Kong'eete meet agoi saboondo

¹ Ak kigosabok okweek, ye ki oo pegunotin eng' yaitwogikwok ak tengekwogikwok,

² che ki obendote ye kinye ko uu piteetap ng'wonyuni, osubi ne oo ne po kimnateet ne po soet, ne po kimnateet ne poisyei nguno eng' weeriitap ngelelnateet;

³ che ki kimenye agot acheek tugul kwenunnywa eng' maguutik che yaach che po poorto, keyae maguutik che po poorto ak che po kabwaatutik, ak ki kilagogap nereeknateet, eng' sigeet, ko uu alak:

⁴ ago Kamuktaindet, ne mogoryot eng' rireenetapkei, eng' chamyennyi ne oo ne ki chamenech,

⁵ agot ye ki kibegunotin eng' yaitwogikyok, ko ki isaabech kobooto Kristo (kigesorwok eng' myeeindo),

⁶ ak ki ing'eetech kobooto ineendet, ak ki koonech ketebi kobooto ineendet eng' komoswegap kipsengwet, eng' Kristo Jeso:

⁷ si kobiit kobarta eng' kenyiisyek che pwoonei mogornatosyek che siirtoot che po myeeindonyi eng' talasyet ne tokyineigei eng' Kristo Jeso:

⁸ amu kigesorwok eng' myeeindo eng' kayaneet; ago ma punwok niito: konunetap Kamuktaindet;

⁹ ama po poisyonik, si ma iloskei chii.

¹⁰ Amu kiboisyennyi acheek, ne ki kiyaech eng' Kristo Jeso agobo poisyonik che myachen, che kisip kochop Kamuktaindet si kebendatee chooto.

Agenge eng' Kristo

¹¹ Nooto anyun obwaat, ole okweek, che ki oo Pororyosyek eng' poorto atkinye, che kigurenok “che Ma Kimuratan” eng' icheek che kiguure “kamuratanet”, nooto kamuratanet eng' poorto ne ki kiyae eunek;

¹² ole ki omi taban eng' Kristo eng' peetuusyechooto, che ki oo kipsagarek eng' pororyetap Israel, ak ki oo toek eng' kayomisutik che po arorutyet, ki ma otinye kamang'unet ak ki ma otinye Kamuktaindet eng' ng'wonyuni.

¹³ Ago nguno eng' Kristo Jeso okweek che ki oo looen eng' peetuusyek alak, ko kagegoonok ooriigu eng' korotiigap Kristo.

¹⁴ Amu ineendet ko kalyennyo, ne ki yai tuwai koek agenge, ne kibut tooteetap kween ne po kaoiyet,

¹⁵ ko kagowong' eng' poortanyi puunyoondit, ng'atuutyetap ng'atuutik ne miitei eng' kayomisutik; si kobiit kotoi koyai eng' ineendet chooto aeng' koek chiito agenge ne leel koyai kaalyeet;

¹⁶ ak kotuiyo icheek tuwai eng' poorto agenge ak Kamuktaindet eng' kimurtoiyot, ko kagobar puunyoondit eng' nooto.

¹⁷ Ak ki nyo koamwok kaalyeet okweek che ki oo looen, ak kaalyeet eng' icheek che kineegiten:

¹⁸ amu kinyooru acheek tuwai eng' ineendet ooreennyo eng' Kabuuset ne Tiliil agenge, ne ki itee ole mi Kwanda.

¹⁹ Nooto anyun ma ko oo toek ak punootik ago oo piigap nganaseet agenge ak che tiliileen, ak che po kootap Kamuktaindet.

²⁰ Kigeteechak eng' lumdaetap che kiyooktoi ak maotik, Kristo Jeso ineendet ko koita ne oo ne po luuita;

²¹ ne kituiyechin teekseet age tugul ne ki kinamnyo koek agenge, koeet koek Hekaluut ne tiliil eng' Kiptaiyat;

²² ki kiteechak ak okweek oegu agenge eng' ineendet, ole menyei Kamuktaindet eng' Kabuuset ne Tiliil.