EPESOEK 1 - BUKUIT NE TILIIL Sireet ne Dutero Kanon

Kagateet

¹ Paulo, kayooktoindet ne po Kristo Jeso eng' mageetap Kamuktaindet, asirchini piik che tiliileen che mi Epheso, kobooto che po kayaneet eng' Kristo Jeso:

² Ingotep myeeindo kobootok ak kaalyeet che punu Kamuktaindet Kwandanyo ak Kiptaiyat Jeso Kristo.

Kaberuuroigap oriit eng' Kristo

³ Iberuurot Kamuktaindet Kwandap Kiptaiyandennyo Jeso Kristo, ineendet ne ki koberuurech eng' konunotyot age tugul ne po Kabuuset eng' kipsengwet eng' Kristo:

⁴ ko uu ye kilewenech eng' ineendet ye kitom kelumda, si keegu che tiliileen che ma tinyei leluut eng' tainnyi eng' chamyet:

⁵ ko uu ye kiga sip kolewenech kenamech keegu weeriik eng' Jeso Kristo eng' ineendet, ko uu chameet ne myee ne po magennyi,

⁶ agoi kalasunetap toroornatetap myeeindonyi, ne ki koonech eng' aiyebindo eng' Chamaneet:

⁷ ne ki tinyei eng' ineendet katyagennyo eng' korotiikyik, nyoetap kaat ne po chalwogikyok, ko uu mogornatosyegap myeeindonyi,

⁸ che ki yai kotesak eng' acheek eng' utaatyet tugul ak naet,

⁹ ko kagoboorwech ung'ootyet ne po magennyi, ko uu chamennyi ne myee ne ki chop eng' ineendet

¹⁰ agoi tononjinet ne po riipseetap peetuusyek che yamegei, si koyum tuguuk tugul eng' Kristo, tuguuk che mi kipsengwet, ak tuguuk che mi ng'wony eng' ineendet,

¹¹ ne kiyaech eng' ineendet keegu porotennyi, ko kasip kolewenech, ko uu mageetap ineendet ne yaei tuguuk tugul ko uu kabwaatetap magennyi;

¹² si kobiit keegu kalasunetap toroornatennyi, acheek che kiga kisip kimang'u Kristo.

¹³ Ki ogas ak okweek eng' ineendet ng'olyootap imanit, logoiywek che myach che po yetuneng'wong' - eng' ineendet, ne kingo kaoyan, ko ki king'oochak eng' Kabuuset ne Tiliil ne po arorutyet,

¹⁴ ne tongoaniatap porotennyo, agoi katyagetap porotennyi, eng' kalasunetap toroornatennyi.

Saaetap Paulo

¹⁵ Amu niito anyun, kingo kaagas agobo kayaneet ne mi kwenung'wong', eng' Kiptaiyat Jeso, ak chamyet eng' tugul che tiliileen,

¹⁶ ko mata asiis agoito kongoi agobo okweek, ak amwaok eng' saautikyuk;

¹⁷ ale ingogoonok Kamuktaindet ne po Kiptaiyandennyo Jeso Kristo, Kwanda ne po toroornatet, Kabuuset ne po utaatyet ak ng'ang'utyet eng' naetap ineendet;

¹⁸ ko kagokweng'ogis konyegap mugulelwekwok, si kobiit onai kiit ne uu kamang'unetap kuursennyi, ak mogornatosyegap toroornatet ne po porotennyi eng' che tiliileen,

¹⁹ ak kiit ne uu ooindo ne siirtoot ne po kamuktaennyi eng' acheek che kiyani, ko uu poisyonooto po kimnateetap kamuktaennyi

²⁰ ne ki yai eng' Kristo, ye kingo ng'eet ineendet komong' eng' che ki pek, ak konde ineendet kotebee eunnyi ne po tai eng' komoswegap kipsengwet;

²¹ ne toroor kosiir laitornatet tugul, ak pounateet, ak kamuktaet, ak kiptainateet, ak kainet age tugul ne mwaat, ma kityo eng' kenyisyechu, ago eng' chooto pwoonei:

²² ak ki inde tuguuk tugul kogas iit eng' keldebesaigap keelyekyik, ak kogoochi ineendet koek metit eng' tuguuk tugul eng' kaniset,

²³ nooto ko poortanyi, nyiietap ineendet ne inyiiti tugul eng' tugul.