Daniel - DAG 14 - BUKUIT NE TILIIL Sireet ne Dutero Kanon

BEL AK MASWEETIT Daniel ak tisiigap Bel

¹ Ki kilewen Cyrus kolaitoran kingo keskei Laitoryat Astyages ak kegonor komuny ak aguiywogikyik.

² Ki pendoti Daniel ak laitoryat kotugul ak ki konyitoot inee kosiir choronokyik tugul.

³ Ki tinyei piigap Babilon kanamwet ne ki kiguure Bel ne ki kigoochin kibaabok taman ak aeng' che po peek, keechiirek artam ak tereenik lo che po divaik peetuusyek tugul.

⁴ Ki konyiiti laitoryat kanamwoni ak ki cham kowendi kotugul kogutung'jin. Ago ki kutung'jin `Daniel inee Kamuktaindennyi. Koleenji `laitoryat Daniel pesyo, “Amu nee asi megutung'ji Bel?”

⁵ Kowolji `Daniel koleenji, “Amu ma konyitii kanamonik che ki kiyae eunek, ago Kamuktaindet ne sabei, inee ne ki yai kipsengwet ak ng'wony kobou tyong'ik tugul che saptos.”

⁶ Koleenji `laitoryat, “Mebwaati ile kamuktain ne sabei Bel? Megeere che tee che amei ak koeei kotugul?”

⁷ Ki roori Daniel, ak kole, “Amegany kiberberin, ee laitoryat, amu kii ko menet kityo oriit, ko sugunwet parak. Ma amei kiy anan koeei kiy.”

⁸ Ki nereech eng' yooto anyun laitoryat ak koguur tisiigap Bel ak komwooch koleenji, “Ngot ko momwoiwo chiito ne amei tuguuchu, ko kaobegu.

⁹ Ngot obooru ole amei Bel, komeei Daniel amu kagong'alaal yaityo agobo Bel.” Koleenji `Daniel laitoryat, “Ingoyaak ko uu ye kemwa.”

¹⁰ Ki mi tisiik tamanwagik tisabu che po Bel, koma kiit chebyosok ak lagokwak. Ki pa `laitoryat ak Daniel hekaluutap Bel.

¹¹ Ye it koleenji `tisiigap Bel, “Keero, kagimande saang'; chop amitwogik ak divaik inyee, inyeendet ee laitoryat, yeityo iger kurgeet ak ing'oochee ng'ookseng'ung'.

¹² Ye iweege karon, ngot ko menyooru ile kagoam Bel kobek, kebegu; ang' puch kobegu Daniel ne mwaitoenech lembech.”

¹³ Ki ma mage kiy amu ki ingen kole ki koyai kurgeet eng' kurereetap meset ne cham kochutunee oriit asi koam konunoichooto.

¹⁴ Ki eng' ye kagomanda, kochopchi `laitoryat amitwogik Bel. Yeityo kong'at `Daniel kiboitiinikyik koip oreek, che ki iseerchi hekaluut tugul komi ak laitoryat icheegei. Yeityo koba saang', koger kurgeet ak kong'oochee ng'oochetap laitoryat, ak koba.

¹⁵ Kemoi kobwa tisiik ak chebyosokwak ak lagokwak ko uu kotugul koam ak koe tuguuk tugul.

¹⁶ Kingo eech karon, kong'eet Laitoryat ak komus komi ak Daniel.

¹⁷ koteebeee `laitoryat Daniel koleenji, “Tos kagetui ng'ooksosyek?” Kowolji koleenji, “Tomo, ee laitoryat.”

¹⁸ Ki eng' ye kiyaat kurgeet, kotaaben Laitoryat meset, yeityo kotwek eng' tuugeet ne oo kole, “Ii toroor wee Bel, ak ma miiteen lembech agot kitigin!”

¹⁹ Ki roori Daniel yeityo koete laitoryat kochut oriit. “Iroo ng'wony o! Keero po ng'oo kelyechu?”

²⁰ Kole laitoryat, “Ageere kelyegap murenik, chebyosok ak lagok.”

²¹ Konereech Laitoryat ak kong'at kenam tisiik kobooto chebyosokwak ak lagokwak. Ki iboor anyun icheek ooreetap ung'oot ne ki poisye kochutu koo asi koam tuguuk che ki mi meset.

²² Eng' yooto kobar `laitoryat icheek tugul, ak kogoochi `Daniel Bel kotui ak kobut hekaluunnyi.

Kobarei Daniel Masweetit

²³ Eng' emet ko ki mi masweetit ne oo kot, ne ki iywei piigap Babilon.

²⁴ Ki leenji `laitoryat Daniel, “Ma koi ieesye ile ma kamuktaindet ne sabei ni; ara kutung'ji.”

²⁵ Koleenji Daniel, “Agutung'jini Kiptaiyat Kamuktaindennyu, amu ineendet ne sabei.

²⁶ Kono kasar, ee Laitoryat, amu agoi abar masweetini oo, ma paree rotwap chok anan rungu.” Koleenji Laitoryat, “Kagoonin chamjinet.”

²⁷ Ki chop anyun Daniel manget, mwaita ak suumeek yeityo koyo tugul, ak kochobee magatiinik che ki pae masweetit. Ki am masweetit kot kotyol. Kole anyun Daniel, “Oroo kiit ne cham ogutung'jini.”

²⁸ Kingo kas piigap Babilon ng'aleechu, konerekso kot ak kotoi kotetyi lugeet laitoryat kole, “Kogoek laitoryat Yahudyot; Ki kong'em Bel, ki kobar masweetit, ak ki kobar tisiik.”

²⁹ Koba taitap laitoryat ak kole, “Koonech Daniel, ang' puch kebariin ak koing'ung' tugul.”

³⁰ Ki keer Laitoryat ole ki igimundoi, ak amu kimnatanooto, kogoochi icheek Daniel.

Komi Daniel keriingetap ng'etuunyik

³¹ Ki wiirchi icheek Daniel keriingetap ng'etuunyik, ak ki tebee yooto Daniel peetuusyek lo.

³² Ki mi ng'etuunyik lo keriingonooto oriit, che ki kotugul kocham kigoochin muuswek aeng' ak keechiirek aeng'; ak nguno ko mata kigoochi kiy, keleen asi koam Daniel.

³³ Ki mi maotyot Habakkuk emetap Judah. Kiga kochop suuteek ak kobutulji magatyat taabeet ak ki wendi mbar koipchin che ki kesisyei.

³⁴ Koleenji malaikaiyatap Kamuktaindet, “Ip amitwogichu kagaichop koba Babilon, ipchi Daniel eng' keriingetap ng'etuunyik.”

³⁵ Kole Habakkuk, “Kiptaiyat, toomo ageere Babilon ak ko mangen kiy agobo keriingetap ng'etuunyik.”

³⁶ Ki imut anyun malaikaiyatap Kamuktaindet komutee naaryeetap metinnyi ak ko kanabee `inee suumeekyik; ak eng' pandap kipchurchur, koit inee Babilon, paragutap keriingetap ng'etuunyik.

³⁷ Koguurso Habakkuk, “Daniel, Daniel! Ip amitwogichu kagoyagun Kamuktaindet.”

³⁸ Kole Daniel, “Kaibwaata ee Kamuktaindet, ak ma iutye icheek che chamin.”

³⁹ Kong'eet Daniel ak koamis. Yeityo koweekta ngunooto `malaikaiyatap Kamuktaindet Habakkuk kwo oldanyi.

⁴⁰ Eng' peetuutap tisap, konyo laitoryat inyo koriir agobo Daniel. Ki eng' ye it keriingetap ng'etuunyik, kooro Daniel kotebyei ng'wony!

⁴¹ Kowaach laitoryat eng' kutit ne oo kole, “Ii toroor ee Kiptaiyat, Kamuktaindetap Daniel, ak ma mi age ko siirin!”

⁴² Yeityo kochuut anyun Daniel komong', ak ko wiirchi keriinget icheek che ki machei kebar Daniel ak ki am icheek `ng'etuunyik ngunooto kogeerei eng' konyekyik.